২. দুতিযৱগ্গো

১১. ‘‘পামোজ্জবহুলো ভিক্খু, ধম্মে বুদ্ধপ্পৱেদিতে;

অধিগচ্ছে পদং সন্তং, সঙ্খাৰূপসমং সুখ’’ন্তি.

… চূড়ৱচ্ছো [চূলগৱচ্ছো (সী.)] থেৰো….

১২. ‘‘পঞ্ঞাবলী সীলৱতূপপন্নো, সমাহিতো ঝানৰতো সতীমা;

যদত্থিযং ভোজনং ভুঞ্জমানো, কঙ্খেথ কালং ইধ ৱীতৰাগো’’তি.

… মহাৱচ্ছো [মহাগৱচ্ছো (সী.)] থেৰো….

১৩. ‘‘নীলব্ভৱণ্ণা ৰুচিৰা, সীতৱাৰী সুচিন্ধৰা;

ইন্দগোপকসঞ্ছন্না, তে সেলা ৰমযন্তি ম’’ন্তি.

… ৱনৱচ্ছো থেৰো….

১৪. ‘‘উপজ্ঝাযো মং অৱচ, ইতো গচ্ছাম সীৱক;

গামে মে ৱসতি কাযো, অৰঞ্ঞং মে গতো মনো;

সেমানকোপি গচ্ছামি, নত্থি সঙ্গো ৱিজানত’’ন্তি.

… সিৱকো সামণেৰো….

১৫. ‘‘পঞ্চ ছিন্দে পঞ্চ জহে, পঞ্চ চুত্তৰি ভাৱযে;

পঞ্চসঙ্গাতিগো ভিক্খু, ওঘতিণ্ণোতি ৱুচ্চতী’’তি.

… কুণ্ডধানো থেৰো….

১৬. ‘‘যথাপি ভদ্দো আজঞ্ঞো, নঙ্গলাৱত্তনী সিখী;

গচ্ছতি অপ্পকসিৰেন, এৱং ৰত্তিন্দিৱা মম;

গচ্ছন্তি অপ্পকসিৰেন, সুখে লদ্ধে নিৰামিসে’’তি.

… বেলট্ঠসীসো থেৰো….

১৭. ‘‘মিদ্ধী যদা হোতি মহগ্ঘসো চ, নিদ্দাযিতা সম্পৰিৱত্তসাযী;

মহাৱৰাহোৱ নিৱাপপুট্ঠো, পুনপ্পুনং গব্ভমুপেতি মন্দো’’তি.

… দাসকো থেৰো….

১৮. ‘‘অহু বুদ্ধস্স দাযাদো, ভিক্খু ভেসকড়াৱনে;

কেৱলং অট্ঠিসঞ্ঞায, অফৰী পথৱিং [পঠৱিং (সী. স্যা.)] ইমং;

মঞ্ঞেহং কামৰাগং সো, খিপ্পমেৱ পহিস্সতী’’তি [পহীযভি (সব্বত্থ পাড়িযং)].

… সিঙ্গালপিতা [সীগালপিতা (সী.)] থেৰো….

১৯. [ধ. প. ৮০, ১৪৫ ধম্মপদেপি] ‘‘উদকং হি নযন্তি নেত্তিকা, উসুকাৰা নমযন্তি [দমযন্তি (ক.)] তেজনং;

দাৰুং নমযন্তি তচ্ছকা, অত্তানং দমযন্তি সুব্বতা’’তি.

… কুলো [কুণ্ডলো (সী.), কুড়ো (স্যা. ক.)] থেৰো….

২০. ‘‘মৰণে মে ভযং নত্থি, নিকন্তি নত্থি জীৱিতে;

সন্দেহং নিক্খিপিস্সামি, সম্পজানো পটিস্সতো’’তি [পতিস্সতোতি (সী. স্যা.)].

… অজিতো থেৰো ….

ৱগ্গো দুতিযো নিট্ঠিতো.

তস্সুদ্দানং –

চূড়ৱচ্ছো মহাৱচ্ছো, ৱনৱচ্ছো চ সীৱকো;

কুণ্ডধানো চ বেলট্ঠি, দাসকো চ ততোপৰি;

সিঙ্গালপিতিকো থেৰো, কুলো চ অজিতো দসাতি.