১১. জতুকণ্ণিমাণৱপুচ্ছা

১১০২. ‘‘সুত্ৱানহং ৱীৰমকামকামিং, (ইচ্চাযস্মা জতুকণ্ণি)

ওঘাতিগং পুট্ঠুমকামমাগমং;

সন্তিপদং ব্ৰূহি সহজনেত্ত, যথাতচ্ছং ভগৱা ব্ৰূহি মে তং.

১১০৩. ‘‘ভগৱা হি কামে অভিভুয্য ইৰিযতি, আদিচ্চোৱ পথৱিং তেজী তেজসা;

পৰিত্তপঞ্ঞস্স মে ভূৰিপঞ্ঞ, আচিক্খ ধম্মং যমহং ৱিজঞ্ঞং;

জাতিজৰায ইধ ৱিপ্পহানং’’.

১১০৪. ‘‘কামেসু ৱিনয গেধং, (জতুকণ্ণীতি ভগৱা) নেক্খম্মং দট্ঠু খেমতো;

উগ্গহীতং নিৰত্তং ৱা, মা তে ৱিজ্জিত্থ কিঞ্চনং.

১১০৫. ‘‘যং পুব্বে তং ৱিসোসেহি, পচ্ছা তে মাহু কিঞ্চনং;

মজ্ঝে চে নো গহেস্সসি, উপসন্তো চৰিস্সসি.

১১০৬. ‘‘সব্বসো নামৰূপস্মিং, ৱীতগেধস্স ব্ৰাহ্মণ;

আসৱাস্স ন ৱিজ্জন্তি, যেহি মচ্চুৱসং ৱজে’’তি.

জতুকণ্ণিমাণৱপুচ্ছা একাদসমা নিট্ঠিতা.