১০. পুৰাভেদসুত্তং

৮৫৪. ‘‘কথংদস্সী কথংসীলো, উপসন্তোতি ৱুচ্চতি;

তং মে গোতম পব্ৰূহি, পুচ্ছিতো উত্তমং নৰং’’.

৮৫৫. ‘‘ৱীততণ্হো পুৰা ভেদা, (ইতি ভগৱা) পুব্বমন্তমনিস্সিতো;

ৱেমজ্ঝে নুপসঙ্খেয্যো, তস্স নত্থি পুৰক্খতং.

৮৫৬. ‘‘অক্কোধনো অসন্তাসী, অৱিকত্থী অকুক্কুচো;

মন্তভাণী [মন্তাভাণী (স্যা. পী.)] অনুদ্ধতো, স ৱে ৱাচাযতো মুনি.

৮৫৭. ‘‘নিৰাসত্তি অনাগতে, অতীতং নানুসোচতি;

ৱিৱেকদস্সী ফস্সেসু, দিট্ঠীসু চ ন নীযতি [নিয্যতি (বহূসু)].

৮৫৮. ‘‘পতিলীনো অকুহকো, অপিহালু অমচ্ছৰী;

অপ্পগব্ভো অজেগুচ্ছো, পেসুণেয্যে চ নো যুতো.

৮৫৯. ‘‘সাতিযেসু অনস্সাৱী, অতিমানে চ নো যুতো;

সণ্হো চ পটিভানৱা [পটিভাণৱা (স্যা. পী.)], ন সদ্ধো ন ৱিৰজ্জতি.

৮৬০. ‘‘লাভকম্যা ন সিক্খতি, অলাভে চ ন কুপ্পতি;

অৱিৰুদ্ধো চ তণ্হায, ৰসেসু নানুগিজ্ঝতি.

৮৬১. ‘‘উপেক্খকো সদা সতো, ন লোকে মঞ্ঞতে সমং;

ন ৱিসেসী ন নীচেয্যো, তস্স নো সন্তি উস্সদা.

৮৬২. ‘‘যস্স নিস্সযনা [নিস্সযতা (সী. স্যা. পী.)] নত্থি, ঞত্ৱা ধম্মং অনিস্সিতো;

ভৱায ৱিভৱায ৱা, তণ্হা যস্স ন ৱিজ্জতি.

৮৬৩. ‘‘তং ব্ৰূমি উপসন্তোতি, কামেসু অনপেক্খিনং;

গন্থা তস্স ন ৱিজ্জন্তি, অতৰী সো ৱিসত্তিকং.

৮৬৪. ‘‘ন তস্স পুত্তা পসৱো, খেত্তং ৱত্থুঞ্চ ৱিজ্জতি;

অত্তা ৱাপি নিৰত্তা ৱা [অত্তং ৱাপি নিৰত্তং ৱা (বহূসু)], ন তস্মিং উপলব্ভতি.

৮৬৫. ‘‘যেন নং ৱজ্জুং পুথুজ্জনা, অথো সমণব্ৰাহ্মণা;

তং তস্স অপুৰক্খতং, তস্মা ৱাদেসু নেজতি.

৮৬৬. ‘‘ৱীতগেধো অমচ্ছৰী, ন উস্সেসু ৱদতে মুনি;

ন সমেসু ন ওমেসু, কপ্পং নেতি অকপ্পিযো.

৮৬৭. ‘‘যস্স লোকে সকং নত্থি, অসতা চ ন সোচতি;

ধম্মেসু চ ন গচ্ছতি, স ৱে সন্তোতি ৱুচ্চতী’’তি.

পুৰাভেদসুত্তং দসমং নিট্ঠিতং.