৬. পৰাভৱসুত্তং

এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো অঞ্ঞতৰা দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতা খো সা দেৱতা ভগৱন্তং গাথায অজ্ঝভাসি –

৯১. ‘‘পৰাভৱন্তং পুৰিসং, মযং পুচ্ছাম গোতম [গোতমং (সী. স্যা.)];

ভগৱন্তং [ভৱন্তং (স্যা. ক.)] পুট্ঠুমাগম্ম, কিং পৰাভৱতো মুখং’’.

৯২. ‘‘সুৱিজানো ভৱং হোতি, সুৱিজানো [দুৱিজানো (স্যা. ক.)] পৰাভৱো;

ধম্মকামো ভৱং হোতি, ধম্মদেস্সী পৰাভৱো’’.

৯৩. ‘‘ইতি হেতং ৱিজানাম, পঠমো সো পৰাভৱো;

দুতিযং ভগৱা ব্ৰূহি, কিং পৰাভৱতো মুখং’’.

৯৪. ‘‘অসন্তস্স পিযা হোন্তি, সন্তে ন কুৰুতে পিযং;

অসতং ধম্মং ৰোচেতি, তং পৰাভৱতো মুখং’’.

৯৫. ‘‘ইতি হেতং ৱিজানাম, দুতিযো সো পৰাভৱো;

ততিযং ভগৱা ব্ৰূহি, কিং পৰাভৱতো মুখং’’.

৯৬. ‘‘নিদ্দাসীলী সভাসীলী, অনুট্ঠাতা চ যো নৰো;

অলসো কোধপঞ্ঞাণো, তং পৰাভৱতো মুখং’’.

৯৭. ‘‘ইতি হেতং ৱিজানাম, ততিযো সো পৰাভৱো;

চতুত্থং ভগৱা ব্ৰূহি, কিং পৰাভৱতো মুখং’’.

৯৮. ‘‘যো মাতৰং [যো মাতৰং ৱা (সী. স্যা. কং. পী.)] পিতৰং ৱা, জিণ্ণকং গতযোব্বনং;

পহু সন্তো ন ভৰতি, তং পৰাভৱতো মুখং’’.

৯৯. ‘‘ইতি হেতং ৱিজানাম, চতুত্থো সো পৰাভৱো;

পঞ্চমং ভগৱা ব্ৰূহি, কিং পৰাভৱতো মুখং’’.

১০০. ‘‘যো ব্ৰাহ্মণং [যো ব্ৰাহ্মণং ৱা (সী. স্যা. কং. পী.)] সমণং ৱা, অঞ্ঞং ৱাপি ৱনিব্বকং;

মুসাৱাদেন ৱঞ্চেতি, তং পৰাভৱতো মুখং’’.

১০১. ‘‘ইতি হেতং ৱিজানাম, পঞ্চমো সো পৰাভৱো;

ছট্ঠমং ভগৱা ব্ৰূহি, কিং পৰাভৱতো মুখং’’.

১০২. ‘‘পহূতৱিত্তো পুৰিসো, সহিৰঞ্ঞো সভোজনো;

একো ভুঞ্জতি সাদূনি, তং পৰাভৱতো মুখং’’.

১০৩. ‘‘ইতি হেতং ৱিজানাম, ছট্ঠমো সো পৰাভৱো;

সত্তমং ভগৱা ব্ৰূহি, কিং পৰাভৱতো মুখং’’.

১০৪. ‘‘জাতিত্থদ্ধো ধনত্থদ্ধো, গোত্তত্থদ্ধো চ যো নৰো;

সঞ্ঞাতিং অতিমঞ্ঞেতি, তং পৰাভৱতো মুখং’’.

১০৫. ‘‘ইতি হেতং ৱিজানাম, সত্তমো সো পৰাভৱো;

অট্ঠমং ভগৱা ব্ৰূহি, কিং পৰাভৱতো মুখং’’.

১০৬. ‘‘ইত্থিধুত্তো সুৰাধুত্তো, অক্খধুত্তো চ যো নৰো;

লদ্ধং লদ্ধং ৱিনাসেতি, তং পৰাভৱতো মুখং’’.

১০৭. ‘‘ইতি হেতং ৱিজানাম, অট্ঠমো সো পৰাভৱো;

নৱমং ভগৱা ব্ৰূহি, কিং পৰাভৱতো মুখং’’.

১০৮. ‘‘সেহি দাৰেহি অসন্তুট্ঠো [দাৰেহ্যসন্তুট্ঠো (ক.)], ৱেসিযাসু পদুস্সতি [পদিস্সতি (সী.)];

দুস্সতি [দিস্সতি (সী. পী.)] পৰদাৰেসু, তং পৰাভৱতো মুখং’’.

১০৯. ‘‘ইতি হেতং ৱিজানাম, নৱমো সো পৰাভৱো;

দসমং ভগৱা ব্ৰূহি, কিং পৰাভৱতো মুখং’’.

১১০. ‘‘অতীতযোব্বনো পোসো, আনেতি তিম্বৰুত্থনিং;

তস্সা ইস্সা ন সুপতি, তং পৰাভৱতো মুখং’’.

১১১. ‘‘ইতি হেতং ৱিজানাম, দসমো সো পৰাভৱো;

একাদসমং ভগৱা ব্ৰূহি, কিং পৰাভৱতো মুখং’’.

১১২. ‘‘ইত্থিং সোণ্ডিং ৱিকিৰণিং, পুৰিসং ৱাপি তাদিসং;

ইস্সৰিযস্মিং ঠপেতি [ঠাপেতি (সী. পী.), থপেতি (ক.)], তং পৰাভৱতো মুখং’’.

১১৩. ‘‘ইতি হেতং ৱিজানাম, একাদসমো সো পৰাভৱো;

দ্ৱাদসমং ভগৱা ব্ৰূহি, কিং পৰাভৱতো মুখং’’.

১১৪. ‘‘অপ্পভোগো মহাতণ্হো, খত্তিযে জাযতে কুলে;

সো চ ৰজ্জং পত্থযতি, তং পৰাভৱতো মুখং’’.

১১৫. ‘‘এতে পৰাভৱে লোকে, পণ্ডিতো সমৱেক্খিয;

অৰিযো দস্সনসম্পন্নো, স লোকং ভজতে সিৱ’’ন্তি.

পৰাভৱসুত্তং ছট্ঠং নিট্ঠিতং.