৭. ৱসলসুত্তং

এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. তেন খো পন সমযেন অগ্গিকভাৰদ্ৱাজস্স ব্ৰাহ্মণস্স নিৱেসনে অগ্গি পজ্জলিতো হোতি আহুতি পগ্গহিতা. অথ খো ভগৱা সাৱত্থিযং সপদানং পিণ্ডায চৰমানো যেন অগ্গিকভাৰদ্ৱাজস্স ব্ৰাহ্মণস্স নিৱেসনং তেনুপসঙ্কমি.

অদ্দসা খো অগ্গিকভাৰদ্ৱাজো ব্ৰাহ্মণো ভগৱন্তং দূৰতোৱ আগচ্ছন্তং. দিস্ৱান ভগৱন্তং এতদৱোচ – ‘‘তত্ৰেৱ [অত্ৰেৱ (স্যা. ক.)], মুণ্ডক; তত্ৰেৱ, সমণক; তত্ৰেৱ, ৱসলক তিট্ঠাহী’’তি.

এৱং ৱুত্তে, ভগৱা অগ্গিকভাৰদ্ৱাজং ব্ৰাহ্মণং এতদৱোচ – ‘‘জানাসি পন ত্ৱং, ব্ৰাহ্মণ, ৱসলং ৱা ৱসলকৰণে ৱা ধম্মে’’তি? ‘‘ন খ্ৱাহং, ভো গোতম, জানামি ৱসলং ৱা ৱসলকৰণে ৱা ধম্মে; সাধু মে ভৱং গোতমো তথা ধম্মং দেসেতু, যথাহং জানেয্যং ৱসলং ৱা ৱসলকৰণে ৱা ধম্মে’’তি. ‘‘তেন হি, ব্ৰাহ্মণ, সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভো’’তি খো অগ্গিকভাৰদ্ৱাজো ব্ৰাহ্মণো ভগৱতো পচ্চস্সোসি. ভগৱা এতদৱোচ –

১১৬. ‘‘কোধনো উপনাহী চ, পাপমক্খী চ যো নৰো;

ৱিপন্নদিট্ঠি মাযাৱী, তং জঞ্ঞা ৱসলো ইতি.

১১৭. ‘‘একজং ৱা দ্ৱিজং [দিজং (পী.)] ৱাপি, যোধ পাণং ৱিহিংসতি;

যস্স পাণে দযা নত্থি, তং জঞ্ঞা ৱসলো ইতি.

১১৮. ‘‘যো হন্তি পৰিৰুন্ধতি [উপৰুন্ধেতি (স্যা.), উপৰুন্ধতি (ক.)], গামানি নিগমানি চ;

নিগ্গাহকো [নিগ্ঘাতকো (?)] সমঞ্ঞাতো, তং জঞ্ঞা ৱসলো ইতি.

১১৯. ‘‘গামে ৱা যদি ৱা ৰঞ্ঞে, যং পৰেসং মমাযিতং;

থেয্যা অদিন্নমাদেতি [অদিন্নং আদিযতি (সী. পী.)], তং জঞ্ঞা ৱসলো ইতি.

১২০. ‘‘যো হৱে ইণমাদায, চুজ্জমানো [ভুঞ্জমানো (?)] পলাযতি;

ন হি তে ইণমত্থীতি, তং জঞ্ঞা ৱসলো ইতি.

১২১. ‘‘যো ৱে কিঞ্চিক্খকম্যতা, পন্থস্মিং ৱজন্তং জনং;

হন্ত্ৱা কিঞ্চিক্খমাদেতি, তং জঞ্ঞা ৱসলো ইতি.

১২২. ‘‘অত্তহেতু পৰহেতু, ধনহেতু চ [ধনহেতু ৱ (ক.)] যো নৰো;

সক্খিপুট্ঠো মুসা ব্ৰূতি, তং জঞ্ঞা ৱসলো ইতি.

১২৩. ‘‘যো ঞাতীনং সখীনং ৱা, দাৰেসু পটিদিস্সতি;

সাহসা [সহসা (সী. স্যা.)] সম্পিযেন ৱা, তং জঞ্ঞা ৱসলো ইতি.

১২৪. ‘‘যো মাতৰং পিতৰং ৱা, জিণ্ণকং গতযোব্বনং;

পহু সন্তো ন ভৰতি, তং জঞ্ঞা ৱসলো ইতি.

১২৫. ‘‘যো মাতৰং পিতৰং ৱা, ভাতৰং ভগিনিং সসুং;

হন্তি ৰোসেতি ৱাচায, তং জঞ্ঞা ৱসলো ইতি.

১২৬. ‘‘যো অত্থং পুচ্ছিতো সন্তো, অনত্থমনুসাসতি;

পটিচ্ছন্নেন মন্তেতি, তং জঞ্ঞা ৱসলো ইতি.

১২৭. ‘‘যো কত্ৱা পাপকং কম্মং, মা মং জঞ্ঞাতি ইচ্ছতি [ৱিভ. ৮৯৪ পস্সিতব্বং];

যো পটিচ্ছন্নকম্মন্তো, তং জঞ্ঞা ৱসলো ইতি.

১২৮. ‘‘যো ৱে পৰকুলং গন্ত্ৱা, ভুত্ৱান [সুত্ৱা চ (স্যা. ক.)] সুচিভোজনং;

আগতং নপ্পটিপূজেতি, তং জঞ্ঞা ৱসলো ইতি.

১২৯. ‘‘যো ব্ৰাহ্মণং সমণং ৱা, অঞ্ঞং ৱাপি ৱনিব্বকং;

মুসাৱাদেন ৱঞ্চেতি, তং জঞ্ঞা ৱসলো ইতি.

১৩০. ‘‘যো ব্ৰাহ্মণং সমণং ৱা, ভত্তকালে উপট্ঠিতে;

ৰোসেতি ৱাচা ন চ দেতি, তং জঞ্ঞা ৱসলো ইতি.

১৩১. ‘‘অসতং যোধ পব্ৰূতি, মোহেন পলিগুণ্ঠিতো;

কিঞ্চিক্খং নিজিগীসানো [নিজিগিংসানো (সী. স্যা. কং. পী.)], তং জঞ্ঞা ৱসলো ইতি.

১৩২. ‘‘যো চত্তানং সমুক্কংসে, পৰে চ মৱজানাতি [মৱজানতি (সী. স্যা. পী.)];

নিহীনো সেন মানেন, তং জঞ্ঞা ৱসলো ইতি.

১৩৩. ‘‘ৰোসকো কদৰিযো চ, পাপিচ্ছো মচ্ছৰী সঠো;

অহিৰিকো অনোত্তপ্পী, তং জঞ্ঞা ৱসলো ইতি.

১৩৪. ‘‘যো বুদ্ধং পৰিভাসতি, অথ ৱা তস্স সাৱকং;

পৰিব্বাজং [পৰিব্বজং (ক.), পৰিব্বাজকং (স্যা. কং.)] গহট্ঠং ৱা, তং জঞ্ঞা ৱসলো ইতি.

১৩৫. ‘‘যো ৱে অনৰহং [অনৰহা (সী. পী.)] সন্তো, অৰহং পটিজানাতি [পটিজানতি (সী. স্যা. পী.)];

চোৰো সব্ৰহ্মকে লোকে, এসো খো ৱসলাধমো.

১৩৬. ‘‘এতে খো ৱসলা ৱুত্তা, মযা যেতে পকাসিতা;

ন জচ্চা ৱসলো হোতি, ন জচ্চা হোতি ব্ৰাহ্মণো;

কম্মুনা [কম্মনা (সী. পী.)] ৱসলো হোতি, কম্মুনা হোতি ব্ৰাহ্মণো.

১৩৭. ‘‘তদমিনাপি জানাথ, যথামেদং [যথাপেদং (ক.)] নিদস্সনং;

চণ্ডালপুত্তো সোপাকো [সপাকো (?)], মাতঙ্গো ইতি ৱিস্সুতো.

১৩৮. ‘‘সো যসং পৰমং পত্তো [সো যসপ্পৰমপ্পত্তো (স্যা. ক.)], মাতঙ্গো যং সুদুল্লভং;

আগচ্ছুং তস্সুপট্ঠানং, খত্তিযা ব্ৰাহ্মণা বহূ.

১৩৯. ‘‘দেৱযানং অভিৰুয্হ, ৱিৰজং সো মহাপথং;

কামৰাগং ৱিৰাজেত্ৱা, ব্ৰহ্মলোকূপগো অহু;

ন নং জাতি নিৱাৰেসি, ব্ৰহ্মলোকূপপত্তিযা.

১৪০. ‘‘অজ্ঝাযককুলে জাতা, ব্ৰাহ্মণা মন্তবন্ধৱা;

তে চ পাপেসু কম্মেসু, অভিণ্হমুপদিস্সৰে.

১৪১. ‘‘দিট্ঠেৱ ধম্মে গাৰয্হা, সম্পৰাযে চ দুগ্গতি;

ন নে জাতি নিৱাৰেতি, দুগ্গত্যা [দুগ্গচ্চা (সী. স্যা. কং. পী.)] গৰহায ৱা.

১৪২. ‘‘ন জচ্চা ৱসলো হোতি, ন জচ্চা হোতি ব্ৰাহ্মণো;

কম্মুনা ৱসলো হোতি, কম্মুনা হোতি ব্ৰাহ্মণো’’তি.

এৱং ৱুত্তে, অগ্গিকভাৰদ্ৱাজো ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি.

ৱসলসুত্তং সত্তমং নিট্ঠিতং.