৩. খগ্গৱিসাণসুত্তং

৩৫. সব্বেসু ভূতেসু নিধায দণ্ডং, অৱিহেঠযং অঞ্ঞতৰম্পি তেসং;

ন পুত্তমিচ্ছেয্য কুতো সহাযং, একো চৰে খগ্গৱিসাণকপ্পো.

৩৬. সংসগ্গজাতস্স ভৱন্তি স্নেহা, স্নেহন্ৱযং দুক্খমিদং পহোতি;

আদীনৱং স্নেহজং পেক্খমানো, একো চৰে খগ্গৱিসাণকপ্পো.

৩৭. মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো;

এতং ভযং সন্থৱে [সন্ধৱে (ক.)] পেক্খমানো, একো চৰে খগ্গৱিসাণকপ্পো.

৩৮. ৱংসো ৱিসালোৱ যথা ৱিসত্তো, পুত্তেসু দাৰেসু চ যা অপেক্খা;

ৱংসক্কড়ীৰোৱ [ৱংসকড়ীৰোৱ (সী.), ৱংসাকড়ীৰোৱ (স্যা. কং. পী.), ৱংসেকড়ীৰোৱ (নিদ্দেস)] অসজ্জমানো, একো চৰে খগ্গৱিসাণকপ্পো.

৩৯. মিগো অৰঞ্ঞম্হি যথা অবদ্ধো [অবন্ধো (স্যা. কং.)], যেনিচ্ছকং গচ্ছতি গোচৰায;

ৱিঞ্ঞূ নৰো সেৰিতং পেক্খমানো, একো চৰে খগ্গৱিসাণকপ্পো.

৪০. আমন্তনা হোতি সহাযমজ্ঝে, ৱাসে ঠানে গমনে চাৰিকায;

অনভিজ্ঝিতং সেৰিতং পেক্খমানো, একো চৰে খগ্গৱিসাণকপ্পো.

৪১. খিড্ডা ৰতী হোতি সহাযমজ্ঝে, পুত্তেসু চ ৱিপুলং হোতি পেমং;

পিযৱিপ্পযোগং ৱিজিগুচ্ছমানো, একো চৰে খগ্গৱিসাণকপ্পো.

৪২. চাতুদ্দিসো অপ্পটিঘো চ হোতি, সন্তুস্সমানো ইতৰীতৰেন;

পৰিস্সযানং সহিতা অছম্ভী, একো চৰে খগ্গৱিসাণকপ্পো.

৪৩. দুস্সঙ্গহা পব্বজিতাপি একে, অথো গহট্ঠা ঘৰমাৱসন্তা;

অপ্পোস্সুক্কো পৰপুত্তেসু হুত্ৱা, একো চৰে খগ্গৱিসাণকপ্পো.

৪৪. ওৰোপযিত্ৱা গিহিব্যঞ্জনানি [গিহিৱ্যঞ্জনানি (স্যা. কং. পী.)], সঞ্ছিন্নপত্তো [সংসীনপত্তো (সী.)] যথা কোৱিড়াৰো;

ছেত্ৱান ৱীৰো গিহিবন্ধনানি, একো চৰে খগ্গৱিসাণকপ্পো.

৪৫. সচে লভেথ নিপকং সহাযং, সদ্ধিং চৰং সাধুৱিহাৰিধীৰং;

অভিভুয্য সব্বানি পৰিস্সযানি, চৰেয্য তেনত্তমনো সতীমা.

৪৬. নো চে লভেথ নিপকং সহাযং, সদ্ধিং চৰং সাধুৱিহাৰিধীৰং;

ৰাজাৱ ৰট্ঠং ৱিজিতং পহায, একো চৰে মাতঙ্গৰঞ্ঞেৱ নাগো.

৪৭. অদ্ধা পসংসাম সহাযসম্পদং, সেট্ঠা সমা সেৱিতব্বা সহাযা;

এতে অলদ্ধা অনৱজ্জভোজী, একো চৰে খগ্গৱিসাণকপ্পো.

৪৮. দিস্ৱা সুৱণ্ণস্স পভস্সৰানি, কম্মাৰপুত্তেন সুনিট্ঠিতানি;

সঙ্ঘট্টমানানি দুৱে ভুজস্মিং, একো চৰে খগ্গৱিসাণকপ্পো.

৪৯. এৱং দুতিযেন [দুতিযেন (সব্বত্থ)] সহা মমস্স, ৱাচাভিলাপো অভিসজ্জনা ৱা;

এতং ভযং আযতিং পেক্খমানো, একো চৰে খগ্গৱিসাণকপ্পো.

৫০. কামা হি চিত্ৰা মধুৰা মনোৰমা, ৱিৰূপৰূপেন মথেন্তি চিত্তং;

আদীনৱং কামগুণেসু দিস্ৱা, একো চৰে খগ্গৱিসাণকপ্পো.

৫১. ঈতী চ গণ্ডো চ উপদ্দৱো চ, ৰোগো চ সল্লঞ্চ ভযঞ্চ মেতং;

এতং ভযং কামগুণেসু দিস্ৱা, একো চৰে খগ্গৱিসাণকপ্পো.

৫২. সীতঞ্চ উণ্হঞ্চ খুদং পিপাসং, ৱাতাতপে ডংসসৰীসপে [ডংসসিৰিংসপে (সী. স্যা. কং. পী.)] চ;

সব্বানিপেতানি অভিসম্ভৱিত্ৱা, একো চৰে খগ্গৱিসাণকপ্পো.

৫৩. নাগোৱ যূথানি ৱিৱজ্জযিত্ৱা, সঞ্জাতখন্ধো পদুমী উড়াৰো;

যথাভিৰন্তং ৱিহৰং [ৱিহৰে (সী. পী. নিদ্দেস)] অৰঞ্ঞে, একো চৰে খগ্গৱিসাণকপ্পো.

৫৪. অট্ঠানতং সঙ্গণিকাৰতস্স, যং ফস্সযে [ফুস্সযে (স্যা.)] সামযিকং ৱিমুত্তিং;

আদিচ্চবন্ধুস্স ৱচো নিসম্ম, একো চৰে খগ্গৱিসাণকপ্পো.

৫৫. দিট্ঠীৱিসূকানি উপাতিৱত্তো, পত্তো নিযামং পটিলদ্ধমগ্গো;

উপ্পন্নঞাণোম্হি অনঞ্ঞনেয্যো, একো চৰে খগ্গৱিসাণকপ্পো.

৫৬. নিল্লোলুপো নিক্কুহো নিপ্পিপাসো, নিম্মক্খো নিদ্ধন্তকসাৱমোহো;

নিৰাসযো [নিৰাসাসো (ক.)] সব্বলোকে ভৱিত্ৱা, একো চৰে খগ্গৱিসাণকপ্পো.

৫৭. পাপং সহাযং পৰিৱজ্জযেথ, অনত্থদস্সিং ৱিসমে নিৱিট্ঠং;

সযং ন সেৱে পসুতং পমত্তং, একো চৰে খগ্গৱিসাণকপ্পো.

৫৮. বহুস্সুতং ধম্মধৰং ভজেথ, মিত্তং উড়াৰং পটিভানৱন্তং;

অঞ্ঞায অত্থানি ৱিনেয্য কঙ্খং, একো চৰে খগ্গৱিসাণকপ্পো.

৫৯. খিড্ডং ৰতিং কামসুখঞ্চ লোকে, অনলঙ্কৰিত্ৱা অনপেক্খমানো;

ৱিভূসনট্ঠানা ৱিৰতো সচ্চৱাদী, একো চৰে খগ্গৱিসাণকপ্পো.

৬০. পুত্তঞ্চ দাৰং পিতৰঞ্চ মাতৰং, ধনানি ধঞ্ঞানি চ বন্ধৱানি [বন্ধৱানি চ (পী.)];

হিত্ৱান কামানি যথোধিকানি, একো চৰে খগ্গৱিসাণকপ্পো.

৬১. সঙ্গো এসো পৰিত্তমেত্থ সোখ্যং, অপ্পস্সাদো দুক্খমেত্থ ভিয্যো;

গড়ো এসো ইতি ঞত্ৱা মুতীমা [মতীমা (স্যা. ক.)], একো চৰে খগ্গৱিসাণকপ্পো.

৬২. সন্দালযিত্ৱান [পদালযিত্ৱান (ক.)] সংযোজনানি, জালংৱ ভেত্ৱা সলিলম্বুচাৰী;

অগ্গীৱ দড্ঢং অনিৱত্তমানো, একো চৰে খগ্গৱিসাণকপ্পো.

৬৩. ওক্খিত্তচক্খূ ন চ পাদলোলো, গুত্তিন্দ্ৰিযো ৰক্খিতমানসানো;

অনৱস্সুতো অপৰিডয্হমানো, একো চৰে খগ্গৱিসাণকপ্পো.

৬৪. ওহাৰযিত্ৱা গিহিব্যঞ্জনানি, সঞ্ছন্নপত্তো [সঞ্ছিন্নপত্তো (স্যা. পী.), পচ্ছিন্নপত্তো (ক.)] যথা পাৰিছত্তো;

কাসাযৱত্থো অভিনিক্খমিত্ৱা, একো চৰে খগ্গৱিসাণকপ্পো.

৬৫. ৰসেসু গেধং অকৰং অলোলো, অনঞ্ঞপোসী সপদানচাৰী;

কুলে কুলে অপ্পটিবদ্ধচিত্তো [অপ্পটিবন্ধচিত্তো (ক.)], একো চৰে খগ্গৱিসাণকপ্পো.

৬৬. পহায পঞ্চাৱৰণানি চেতসো, উপক্কিলেসে ব্যপনুজ্জ সব্বে;

অনিস্সিতো ছেত্ৱ [ছেত্ৱা (স্যা. পী. ক.)] সিনেহদোসং [স্নেহদোসং (ক.)], একো চৰে খগ্গৱিসাণকপ্পো.

৬৭. ৱিপিট্ঠিকত্ৱান সুখং দুখঞ্চ, পুব্বেৱ চ সোমনস্সদোমনস্সং;

লদ্ধানুপেক্খং সমথং ৱিসুদ্ধং, একো চৰে খগ্গৱিসাণকপ্পো.

৬৮. আৰদ্ধৱীৰিযো পৰমত্থপত্তিযা, অলীনচিত্তো অকুসীতৱুত্তি;

দড়্হনিক্কমো থামবলূপপন্নো, একো চৰে খগ্গৱিসাণকপ্পো.

৬৯. পটিসল্লানং ঝানমৰিঞ্চমানো, ধম্মেসু নিচ্চং অনুধম্মচাৰী;

আদীনৱং সম্মসিতা ভৱেসু, একো চৰে খগ্গৱিসাণকপ্পো.

৭০. তণ্হক্খযং পত্থযমপ্পমত্তো, অনেড়মূগো [অনেলমূগো (স্যা. পী. ক.)] সুতৱা সতীমা;

সঙ্খাতধম্মো নিযতো পধানৱা, একো চৰে খগ্গৱিসাণকপ্পো.

৭১. সীহোৱ সদ্দেসু অসন্তসন্তো, ৱাতোৱ জালম্হি অসজ্জমানো;

পদুমংৱ তোযেন অলিপ্পমানো [অলিম্পমানো (সী. স্যা. ক.)], একো চৰে খগ্গৱিসাণকপ্পো.

৭২. সীহো যথা দাঠবলী পসয্হ, ৰাজা মিগানং অভিভুয্য চাৰী;

সেৱেথ পন্তানি সেনাসনানি, একো চৰে খগ্গৱিসাণকপ্পো.

৭৩. মেত্তং উপেক্খং কৰুণং ৱিমুত্তিং, আসেৱমানো মুদিতঞ্চ কালে;

সব্বেন লোকেন অৱিৰুজ্ঝমানো, একো চৰে খগ্গৱিসাণকপ্পো.

৭৪. ৰাগঞ্চ দোসঞ্চ পহায মোহং, সন্দালযিত্ৱান সংযোজনানি;

অসন্তসং জীৱিতসঙ্খযম্হি, একো চৰে খগ্গৱিসাণকপ্পো.

৭৫. ভজন্তি সেৱন্তি চ কাৰণত্থা, নিক্কাৰণা দুল্লভা অজ্জ মিত্তা;

অত্তট্ঠপঞ্ঞা অসুচী মনুস্সা, একো চৰে খগ্গৱিসাণকপ্পো.

খগ্গৱিসাণসুত্তং ততিযং নিট্ঠিতং.