১০. আড়ৱকসুত্তং

এৱং মে সুতং – একং সমযং ভগৱা আড়ৱিযং ৱিহৰতি আড়ৱকস্স যক্খস্স ভৱনে. অথ খো আড়ৱকো যক্খো যেন ভগৱা তেনুপসঙ্কমি; উপসঙ্কমিত্ৱা ভগৱন্তং এতদৱোচ – ‘‘নিক্খম, সমণা’’তি. ‘‘সাধাৱুসো’’তি ভগৱা নিক্খমি. ‘‘পৱিস, সমণা’’তি. ‘‘সাধাৱুসো’’তি ভগৱা পাৱিসি.

দুতিযম্পি খো…পে… ততিযম্পি খো আড়ৱকো যক্খো ভগৱন্তং এতদৱোচ – ‘‘নিক্খম, সমণা’’তি. ‘‘সাধাৱুসো’’তি ভগৱা নিক্খমি. ‘‘পৱিস, সমণা’’তি. ‘‘সাধাৱুসো’’তি ভগৱা পাৱিসি.

চতুত্থম্পি খো আড়ৱকো যক্খো ভগৱন্তং এতদৱোচ – ‘‘নিক্খম, সমণা’’তি. ‘‘ন খ্ৱাহং তং, আৱুসো, নিক্খমিস্সামি. যং তে কৰণীযং, তং কৰোহী’’তি.

‘‘পঞ্হং তং, সমণ, পুচ্ছিস্সামি. সচে মে ন ব্যাকৰিস্সসি, চিত্তং ৱা তে খিপিস্সামি, হদযং ৱা তে ফালেস্সামি, পাদেসু ৱা গহেত্ৱা পাৰগঙ্গায খিপিস্সামী’’তি.

‘‘ন খ্ৱাহং তং, আৱুসো, পস্সামি সদেৱকে লোকে সমাৰকে সব্ৰহ্মকে সস্সমণব্ৰাহ্মণিযা পজায সদেৱমনুস্সায যো মে চিত্তং ৱা খিপেয্য হদযং ৱা ফালেয্য পাদেসু ৱা গহেত্ৱা পাৰগঙ্গায খিপেয্য. অপি চ ত্ৱং, আৱুসো, পুচ্ছ যদাকঙ্খসী’’তি. অথ খো আড়ৱকো যক্খো ভগৱন্তং গাথায অজ্ঝভাসি –

১৮৩. ‘‘কিং সূধ ৱিত্তং পুৰিসস্স সেট্ঠং, কিং সু সুচিণ্ণং সুখমাৱহাতি;

কিং সু [কিং সূ (সী.)] হৱে সাদুতৰং ৰসানং, কথং জীৱিং জীৱিতমাহু সেট্ঠং’’.

১৮৪. ‘‘সদ্ধীধ ৱিত্তং পুৰিসস্স সেট্ঠং, ধম্মো সুচিণ্ণো সুখমাৱহাতি;

সচ্চং হৱে সাদুতৰং ৰসানং, পঞ্ঞাজীৱিং জীৱিতমাহু সেট্ঠং’’.

১৮৫. ‘‘কথং সু তৰতি ওঘং, কথং সু তৰতি অণ্ণৱং;

কথং সু দুক্খমচ্চেতি, কথং সু পৰিসুজ্ঝতি’’.

১৮৬. ‘‘সদ্ধা তৰতি ওঘং, অপ্পমাদেন অণ্ণৱং;

ৱীৰিযেন [ৱিৰিযেন (সী. স্যা. কং. পী.)] দুক্খমচ্চেতি, পঞ্ঞায পৰিসুজ্ঝতি’’.

১৮৭. ‘‘কথং সু লভতে পঞ্ঞং, কথং সু ৱিন্দতে ধনং;

কথং সু কিত্তিং পপ্পোতি, কথং মিত্তানি গন্থতি;

অস্মা লোকা পৰং লোকং, কথং পেচ্চ ন সোচতি’’.

১৮৮. ‘‘সদ্দহানো অৰহতং, ধম্মং নিব্বানপত্তিযা;

সুস্সূসং [সুস্সূসা (সী. পী.)] লভতে পঞ্ঞং, অপ্পমত্তো ৱিচক্খণো.

১৮৯. ‘‘পতিৰূপকাৰী ধুৰৱা, উট্ঠাতা ৱিন্দতে ধনং;

সচ্চেন কিত্তিং পপ্পোতি, দদং মিত্তানি গন্থতি.

১৯০. ‘‘যস্সেতে চতুৰো ধম্মা, সদ্ধস্স ঘৰমেসিনো;

সচ্চং ধম্মো [দমো (?)] ধিতি চাগো, স ৱে পেচ্চ ন সোচতি.

১৯১. ‘‘ইঙ্ঘ অঞ্ঞেপি পুচ্ছস্সু, পুথূ সমণব্ৰাহ্মণে;

যদি সচ্চা দমা চাগা, খন্ত্যা ভিয্যোধ ৱিজ্জতি’’.

১৯২. ‘‘কথং নু দানি পুচ্ছেয্যং, পুথূ সমণব্ৰাহ্মণে;

যোহং [সোহং (সী. পী.)] অজ্জ পজানামি, যো অত্থো সম্পৰাযিকো.

১৯৩. ‘‘অত্থায ৱত মে বুদ্ধো, ৱাসাযাড়ৱিমাগমা;

যোহং [অট্ঠিন্হাৰূহি সংযুত্তো (স্যা. ক.)] অজ্জ পজানামি, যত্থ দিন্নং মহপ্ফলং.

১৯৪. ‘‘সো অহং ৱিচৰিস্সামি, গামা গামং পুৰা পুৰং;

নমস্সমানো সম্বুদ্ধং, ধম্মস্স চ সুধম্মত’’ন্তি.

আড়ৱকসুত্তং দসমং নিট্ঠিতং.