১১. ৱিজযসুত্তং

১৯৫. চৰং ৱা যদি ৱা তিট্ঠং, নিসিন্নো উদ ৱা সযং;

সমিঞ্জেতি পসাৰেতি, এসা কাযস্স ইঞ্জনা.

১৯৬. অট্ঠিনহাৰুসংযুত্তো, তচমংসাৱলেপনো;

ছৱিযা কাযো পটিচ্ছন্নো, যথাভূতং ন দিস্সতি.

১৯৭. অন্তপূৰো উদৰপূৰো, যকনপেড়স্স [যকপেড়স্স (সী. স্যা.)] ৱত্থিনো;

হদযস্স পপ্ফাসস্স, ৱক্কস্স পিহকস্স চ.

১৯৮. সিঙ্ঘাণিকায খেড়স্স, সেদস্স চ মেদস্স চ;

লোহিতস্স লসিকায, পিত্তস্স চ ৱসায চ.

১৯৯. অথস্স নৱহি সোতেহি, অসুচী সৱতি সব্বদা;

অক্খিম্হা অক্খিগূথকো, কণ্ণম্হা কণ্ণগূথকো.

২০০. সিঙ্ঘাণিকা চ নাসতো, মুখেন ৱমতেকদা;

পিত্তং সেম্হঞ্চ ৱমতি, কাযম্হা সেদজল্লিকা.

২০১. অথস্স সুসিৰং সীসং, মত্থলুঙ্গস্স পূৰিতং;

সুভতো নং মঞ্ঞতি, বালো অৱিজ্জায পুৰক্খতো.

২০২. যদা চ সো মতো সেতি, উদ্ধুমাতো ৱিনীলকো;

অপৱিদ্ধো সুসানস্মিং, অনপেক্খা হোন্তি ঞাতযো.

২০৩. খাদন্তি নং সুৱানা [সুপাণা (পী.)] চ, সিঙ্গালা [সিগালা (সী. স্যা. কং. পী.)] ৱকা কিমী;

কাকা গিজ্ঝা চ খাদন্তি, যে চঞ্ঞে সন্তি পাণিনো.

২০৪. সুত্ৱান বুদ্ধৱচনং, ভিক্খু পঞ্ঞাণৱা ইধ;

সো খো নং পৰিজানাতি, যথাভূতঞ্হি পস্সতি.

২০৫. যথা ইদং তথা এতং, যথা এতং তথা ইদং;

অজ্ঝত্তঞ্চ বহিদ্ধা চ, কাযে ছন্দং ৱিৰাজযে.

২০৬. ছন্দৰাগৱিৰত্তো সো, ভিক্খু পঞ্ঞাণৱা ইধ;

অজ্ঝগা অমতং সন্তিং, নিব্বানং পদমচ্চুতং.

২০৭. দ্ৱিপাদকোযং [দিপাদকোযং (সী. স্যা. কং. পী.)] অসুচি, দুগ্গন্ধো পৰিহাৰতি [পৰিহীৰতি (সী. স্যা. কং. পী.)];

নানাকুণপপৰিপূৰো, ৱিস্সৱন্তো ততো ততো.

২০৮. এতাদিসেন কাযেন, যো মঞ্ঞে উণ্ণমেতৱে [উন্নমেতৱে (?)];

পৰং ৱা অৱজানেয্য, কিমঞ্ঞত্ৰ অদস্সনাতি.

ৱিজযসুত্তং একাদসমং নিট্ঠিতং.