৩. নন্দকপেতৱত্থু

৬৫৮. ৰাজা পিঙ্গলকো নাম, সুৰট্ঠানং অধিপতি অহু;

মোৰিযানং উপট্ঠানং গন্ত্ৱা, সুৰট্ঠং পুনৰাগমা.

৬৫৯. উণ্হে মজ্ঝন্হিকে [মজ্ঝন্তিকে (সব্বত্থ)] কালে, ৰাজা পঙ্কং [ৱঙ্কং (ক.)] উপাগমি;

অদ্দস মগ্গং ৰমণীযং, পেতানং তং ৱণ্ণুপথং [ৱণ্ণনাপথং (সী. স্যা.)].

৬৬০. সাৰথিং আমন্তযী ৰাজা –

‘‘অযং মগ্গো ৰমণীযো, খেমো সোৱত্থিকো সিৱো;

ইমিনা সাৰথি যাম, সুৰট্ঠানং সন্তিকে ইতো’’.

৬৬১. তেন পাযাসি সোৰট্ঠো, সেনায চতুৰঙ্গিনিযা;

উব্বিগ্গৰূপো পুৰিসো, সোৰট্ঠং এতদব্ৰৱি.

৬৬২. ‘‘কুম্মগ্গং পটিপন্নম্হা, ভিংসনং লোমহংসনং;

পুৰতো দিস্সতি মগ্গো, পচ্ছতো চ ন দিস্সতি.

৬৬৩. ‘‘কুম্মগ্গং পটিপন্নম্হা, যমপুৰিসান সন্তিকে;

অমানুসো ৱাযতি গন্ধো, ঘোসো সুয্যতি [সূযতি (সী. স্যা.)] দাৰুণো’’.

৬৬৪. সংৱিগ্গো ৰাজা সোৰট্ঠো, সাৰথিং এতদব্ৰৱি;

‘‘কুম্মগ্গং পটিপন্নম্হা, ভিংসনং লোমহংসনং;

পুৰতো দিস্সতি মগ্গো, পচ্ছতো চ ন দিস্সতি.

৬৬৫. ‘‘কুম্মগ্গং পটিপন্নম্হা, যমপুৰিসান সন্তিকে;

অমানুসো ৱাযতি গন্ধো, ঘোসো সুয্যতি দাৰুণো’’.

৬৬৬. হত্থিক্খন্ধং সমাৰুয্হ, ওলোকেন্তো চতুদ্দিসং [চতুদ্দিস্সা (ক.)];

অদ্দস নিগ্ৰোধং ৰমণীযং [ৰুক্খং নিগ্ৰোধং (স্যা. ক.)], পাদপং ছাযাসম্পন্নং;

নীলব্ভৱণ্ণসদিসং, মেঘৱণ্ণসিৰীনিভং.

৬৬৭. সাৰথিং আমন্তযী ৰাজা, ‘‘কিং এসো দিস্সতি ব্ৰহা;

নীলব্ভৱণ্ণসদিসো, মেঘৱণ্ণসিৰীনিভো’’.

৬৬৮. ‘‘নিগ্ৰোধো সো মহাৰাজ, পাদপো ছাযাসম্পন্নো;

নীলব্ভৱণ্ণসদিসো, মেঘৱণ্ণসিৰীনিভো’’.

৬৬৯. তেন পাযাসি সোৰট্ঠো, যেন সো দিস্সতে ব্ৰহা;

নীলব্ভৱণ্ণসদিসো, মেঘৱণ্ণসিৰীনিভো.

৬৭০. হত্থিক্খন্ধতো ওৰুয্হ, ৰাজা ৰুক্খং উপাগমি;

নিসীদি ৰুক্খমূলস্মিং, সামচ্চো সপৰিজ্জনো;

পূৰং পানীযসৰকং, পূৱে ৱিত্তে চ অদ্দস.

৬৭১. পুৰিসো চ দেৱৱণ্ণী, সব্বাভৰণভূসিতো;

উপসঙ্কমিত্ৱা ৰাজানং, সোৰট্ঠং এতদব্ৰৱি.

৬৭২. ‘‘স্ৱাগতং তে মহাৰাজ, অথো তে অদুৰাগতং;

পিৱতু দেৱো পানীযং, পূৱে খাদ অৰিন্দম’’.

৬৭৩. পিৱিত্ৱা ৰাজা পানীযং, সামচ্চো সপৰিজ্জনো;

পূৱে খাদিত্ৱা পিত্ৱা চ, সোৰট্ঠো এতদব্ৰৱি.

৬৭৪. ‘‘দেৱতা নুসি গন্ধব্বো, অদু সক্কো পুৰিন্দদো;

অজানন্তা তং পুচ্ছাম, কথং জানেমু তং ময’’ন্তি.

৬৭৫. ‘‘নাম্হি দেৱো ন গন্ধব্বো, নাপি [নম্হি (ক.)] সক্কো পুৰিন্দদো;

পেতো অহং মহাৰাজ, সুৰট্ঠা ইধ মাগতো’’তি.

৬৭৬. ‘‘কিংসীলো কিংসমাচাৰো, সুৰট্ঠস্মিং পুৰে তুৱং;

কেন তে ব্ৰহ্মচৰিযেন, আনুভাৱো অযং তৱা’’তি.

৬৭৭. ‘‘তং সুণোহি মহাৰাজ, অৰিন্দম ৰট্ঠৱড্ঢন;

অমচ্চা পাৰিসজ্জা চ, ব্ৰাহ্মণো চ পুৰোহিতো.

৬৭৮. ‘‘সুৰট্ঠস্মিং অহং দেৱ, পুৰিসো পাপচেতসো;

মিচ্ছাদিট্ঠি চ দুস্সীলো, কদৰিযো পৰিভাসকো.

৬৭৯. ‘‘‘দদন্তানং কৰোন্তানং, ৱাৰযিস্সং বহুজ্জনং;

অঞ্ঞেসং দদমানানং, অন্তৰাযকৰো অহং.

৬৮০. ‘‘‘ৱিপাকো নত্থি দানস্স, সংযমস্স কুতো ফলং;

নত্থি আচৰিযো নাম, অদন্তং কো দমেস্সতি.

৬৮১. ‘‘‘সমতুল্যানি ভূতানি, কুতো [কুলে (স্যা. ক.)] জেট্ঠাপচাযিকো;

নত্থি বলং ৱীৰিযং ৱা, কুতো উট্ঠানপোৰিসং.

৬৮২. ‘‘‘নত্থি দানফলং নাম, ন ৱিসোধেতি ৱেৰিনং;

লদ্ধেয্যং লভতে মচ্চো, নিযতিপৰিণামজং [পৰিণামজা (সী. ক.)].

৬৮৩. ‘‘‘নত্থি মাতা পিতা ভাতা, লোকো নত্থি ইতো পৰং;

নত্থি দিন্নং নত্থি হুতং, সুনিহিতং ন ৱিজ্জতি.

৬৮৪. ‘‘‘যোপি হনেয্য পুৰিসং, পৰস্স ছিন্দতে [পুৰিসস্স ছিন্দে (স্যা. ক.)] সিৰং;

ন কোচি কঞ্চি হনতি, সত্তন্নং ৱিৱৰমন্তৰে.

৬৮৫. ‘‘‘অচ্ছেজ্জাভেজ্জো হি [ভেজ্জো (সী.), অভেজ্জো (স্যা.), ভেজ্জাসি (ক.)] জীৱো, অট্ঠংসো গুড়পৰিমণ্ডলো;

যোজনানং সতং পঞ্চ, কো জীৱং ছেত্তুমৰহতি.

৬৮৬. ‘‘‘যথা সুত্তগুড়ে খিত্তে, নিব্বেঠেন্তং পলাযতি;

এৱমেৱ চ সো জীৱো, নিব্বেঠেন্তো পলাযতি.

৬৮৭. ‘‘‘যথা গামতো নিক্খম্ম, অঞ্ঞং গামং পৱিসতি;

এৱমেৱ চ সো জীৱো, অঞ্ঞং বোন্দিং পৱিসতি.

৬৮৮. ‘‘‘যথা গেহতো নিক্খম্ম, অঞ্ঞং গেহং পৱিসতি;

এৱমেৱ চ সো জীৱো, অঞ্ঞং বোন্দিং পৱিসতি.

৬৮৯. ‘‘‘চুল্লাসীতি [চুড়াসীতি (সী. স্যা. ক.)] মহাকপ্পিনো [মহাকপ্পুনো (সী.)], সতসহস্সানি হি;

যে বালা যে চ পণ্ডিতা, সংসাৰং খেপযিত্ৱান;

দুক্খস্সন্তং কৰিস্সৰে.

৬৯০. ‘‘‘মিতানি সুখদুক্খানি, দোণেহি পিটকেহি চ;

জিনো সব্বং পজানাতি’, সম্মূড়্হা ইতৰা পজা.

৬৯১. ‘‘এৱংদিট্ঠি পুৰে আসিং, সম্মূড়্হো মোহপাৰুতো;

মিচ্ছাদিট্ঠি চ দুস্সীলো, কদৰিযো পৰিভাসকো.

৬৯২. ‘‘ওৰং মে ছহি মাসেহি, কালঙ্কিৰিযা ভৱিস্সতি;

একন্তকটুকং ঘোৰং, নিৰযং পপতিস্সহং.

৬৯৩. [পে. ৱ. ৭০] ‘‘চতুক্কণ্ণং চতুদ্ৱাৰং, ৱিভত্তং ভাগসো মিতং;

অযোপাকাৰপৰিযন্তং, অযসা পটিকুজ্জিতং.

৬৯৪. [পে. ৱ. ৭১] ‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফৰিত্ৱা তিট্ঠতি সব্বদা.

৬৯৫. ‘‘ৱস্সানি সতসহস্সানি, ঘোসো সুয্যতি তাৱদে;

লক্খো এসো মহাৰাজ, সতভাগৱস্সকোটিযো.

৬৯৬. ‘‘কোটিসতসহস্সানি, নিৰযে পচ্চৰে জনা;

মিচ্ছাদিট্ঠী চ দুস্সীলা, যে চ অৰিযূপৱাদিনো.

৬৯৭. ‘‘তত্থাহং দীঘমদ্ধানং, দুক্খং ৱেদিস্স ৱেদনং;

ফলং পাপস্স কম্মস্স, তস্মা সোচামহং ভুসং.

৬৯৮. ‘‘তং সুণোহি মহাৰাজ, অৰিন্দম ৰট্ঠৱড্ঢন;

ধীতা ময্হং মহাৰাজ, উত্তৰা ভদ্দমত্থু তে.

৬৯৯. ‘‘কৰোতি ভদ্দকং কম্মং, সীলেসুপোসথে ৰতা;

সঞ্ঞতা সংৱিভাগী চ, ৱদঞ্ঞূ ৱীতমচ্ছৰা.

৭০০. ‘‘অখণ্ডকাৰী সিক্খায, সুণ্হা পৰকুলেসু চ;

উপাসিকা সক্যমুনিনো, সম্বুদ্ধস্স সিৰীমতো.

৭০১. ‘‘ভিক্খু চ সীলসম্পন্নো, গামং পিণ্ডায পাৱিসি;

ওক্খিত্তচক্খু সতিমা, গুত্তদ্ৱাৰো সুসংৱুতো.

৭০২. ‘‘সপদানং চৰমানো, অগমা তং নিৱেসনং;

‘তমদ্দস মহাৰাজ, উত্তৰা ভদ্দমত্থু তে’.

৭০৩. ‘‘পূৰং পানীযসৰকং, পূৱে ৱিত্তে চ সা অদা;

‘পিতা মে কালঙ্কতো, ভন্তে তস্সেতং উপকপ্পতু’.

৭০৪. ‘‘সমনন্তৰানুদ্দিট্ঠে, ৱিপাকো উদপজ্জথ;

ভুঞ্জামি কামকামীহং, ৰাজা ৱেস্সৱণো যথা.

৭০৫. ‘‘তং সুণোহি মহাৰাজ, অৰিন্দম ৰট্ঠৱড্ঢন;

সদেৱকস্স লোকস্স, বুদ্ধো অগ্গো পৱুচ্চতি;

তং বুদ্ধং সৰণং গচ্ছ, সপুত্তদাৰো অৰিন্দম.

৭০৬. ‘‘অট্ঠঙ্গিকেন মগ্গেন, ফুসন্তি অমতং পদং;

তং ধম্মং সৰণং গচ্ছ, সপুত্তদাৰো অৰিন্দম.

৭০৭. ‘‘চত্তাৰো চ পটিপন্না [মগ্গপটিপন্না (সী. স্যা.)], চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো;

তং সঙ্ঘং সৰণং গচ্ছ, সপুত্তদাৰো অৰিন্দম.

৭০৮. ‘‘পাণাতিপাতা ৱিৰমস্সু খিপ্পং, লোকে অদিন্নং পৰিৱজ্জযস্সু;

অমজ্জপো মা চ মুসা অভাণী, সকেন দাৰেন চ হোহি তুট্ঠো’’তি.

৭০৯. ‘‘অত্থকামোসি মে যক্খ, হিতকামোসি দেৱতে;

কৰোমি তুয্হং ৱচনং, ত্ৱংসি আচৰিযো মম.

৭১০. ‘‘উপেমি সৰণং বুদ্ধং, ধম্মঞ্চাপি অনুত্তৰং;

সঙ্ঘঞ্চ নৰদেৱস্স, গচ্ছামি সৰণং অহং.

৭১১. ‘‘পাণাতিপাতা ৱিৰমামি খিপ্পং, লোকে অদিন্নং পৰিৱজ্জযামি;

অমজ্জপো নো চ মুসা ভণামি, সকেন দাৰেন চ হোমি তুট্ঠো.

৭১২. ‘‘ওফুণামি [ওপুণামি (সী.), ওফুনামি (স্যা. ক.), ওপুনামি (?)] মহাৱাতে, নদিযা সীঘগামিযা;

ৱমামি পাপিকং দিট্ঠিং, বুদ্ধানং সাসনে ৰতো’’.

৭১৩. ইদং ৱত্ৱান সোৰট্ঠো, ৱিৰমিত্ৱা পাপদস্সনা [পাপদস্সনং (স্যা. ক.)];

নমো ভগৱতো কত্ৱা, পামোক্খো ৰথমাৰুহীতি.

নন্দকপেতৱত্থু ততিযং.