৪. ৰেৱতীপেতৱত্থু

৭১৪. [ৱি. ৱ. ৮৬৩] ‘‘উট্ঠেহি ৰেৱতে সুপাপধম্মে, অপাৰুতদ্ৱাৰে অদানসীলে;

নেস্সাম তং যত্থ থুনন্তি দুগ্গতা, সমপ্পিতা [সমজ্জতা (সী.)] নেৰযিকা দুখেনা’’তি.

৭১৫. ইচ্চেৱ [ইচ্চেৱং (স্যা. ক.)] ৱত্ৱান যমস্স দূতা, তে দ্ৱে যক্খা লোহিতক্খা ব্ৰহন্তা;

পচ্চেকবাহাসু গহেত্ৱা ৰেৱতং, পক্কামযুং দেৱগণস্স সন্তিকে.

৭১৬. ‘‘আদিচ্চৱণ্ণং ৰুচিৰং পভস্সৰং, ব্যম্হং সুভং কঞ্চনজালছন্নং;

কস্সেতমাকিণ্ণজনং ৱিমানং, সুৰিযস্স ৰংসীৰিৱ জোতমানং.

৭১৭. ‘‘নাৰীগণা চন্দনসাৰলিত্তা [চন্দনসাৰানুলিত্তা (স্যা.)], উভতো ৱিমানং উপসোভযন্তি;

তং দিস্সতি সুৰিযসমানৱণ্ণং, কো মোদতি সগ্গপত্তো ৱিমানে’’তি.

৭১৮. ‘‘বাৰাণসিযং নন্দিযো নামাসি, উপাসকো অমচ্ছৰী দানপতি ৱদঞ্ঞূ;

তস্সেতমাকিণ্ণজনং ৱিমানং, সুৰিযস্স ৰংসীৰিৱ জোতমানং.

৭১৯. ‘‘নাৰীগণা চন্দনসাৰলিত্তা, উভতো ৱিমানং উপসোভযন্তি;

তং দিস্সতি সুৰিযসমানৱণ্ণং, সো মোদতি সগ্গপত্তো ৱিমানে’’তি.

৭২০. ‘‘নন্দিযস্সাহং ভৰিযা, অগাৰিনী সব্বকুলস্স ইস্সৰা;

ভত্তু ৱিমানে ৰমিস্সামি দানহং, ন পত্থযে নিৰযদস্সনাযা’’তি.

৭২১. ‘‘এসো তে নিৰযো সুপাপধম্মে, পুঞ্ঞং তযা অকতং জীৱলোকে;

ন হি মচ্ছৰী ৰোসকো পাপধম্মো, সগ্গূপগানং লভতি সহব্যত’’ন্তি.

৭২২. ‘‘কিং নু গূথঞ্চ মুত্তঞ্চ, অসুচী পটিদিস্সতি;

দুগ্গন্ধং কিমিদং মীড়্হং, কিমেতং উপৱাযতী’’তি.

৭২৩. ‘‘এস সংসৱকো নাম, গম্ভীৰো সতপোৰিসো;

যত্থ ৱস্সসহস্সানি, তুৱং পচ্চসি ৰেৱতে’’তি.

৭২৪. ‘‘কিং নু কাযেন ৱাচায, মনসা দুক্কটং কতং;

কেন সংসৱকো লদ্ধো, গম্ভীৰো সতপোৰিসো’’তি.

৭২৫. ‘‘সমণে ব্ৰাহ্মণে চাপি, অঞ্ঞে ৱাপি ৱনিব্বকে;

মুসাৱাদেন ৱঞ্চেসি, তং পাপং পকতং তযা.

৭২৬. ‘‘তেন সংসৱকো লদ্ধো, গম্ভীৰো সতপোৰিসো;

তত্থ ৱস্সসহস্সানি, তুৱং পচ্চসি ৰেৱতে.

৭২৭. ‘‘হত্থেপি ছিন্দন্তি অথোপি পাদে, কণ্ণেপি ছিন্দন্তি অথোপি নাসং;

অথোপি কাকোড়গণা সমেচ্চ, সঙ্গম্ম খাদন্তি ৱিফন্দমান’’ন্তি.

৭২৮. ‘‘সাধু খো মং পটিনেথ, কাহামি কুসলং বহুং;

দানেন সমচৰিযায, সংযমেন দমেন চ;

যং কত্ৱা সুখিতা হোন্তি, ন চ পচ্ছানুতপ্পৰে’’তি.

৭২৯. ‘‘পুৰে তুৱং পমজ্জিত্ৱা, ইদানি পৰিদেৱসি;

সযং কতানং কম্মানং, ৱিপাকং অনুভোস্সসী’’তি.

৭৩০. ‘‘কো দেৱলোকতো মনুস্সলোকং, গন্ত্ৱান পুট্ঠো মে এৱং ৱদেয্য;

‘নিক্খিত্তদণ্ডেসু দদাথ দানং, অচ্ছাদনং সেয্য [সযন (সী.)] মথন্নপানং;

ন হি মচ্ছৰী ৰোসকো পাপধম্মো, সগ্গূপগানং লভতি সহব্যতং’.

৭৩১. ‘‘সাহং নূন ইতো গন্ত্ৱা, যোনিং লদ্ধান মানুসিং;

ৱদঞ্ঞূ সীলসম্পন্না, কাহামি কুসলং বহুং;

দানেন সমচৰিযায, সংযমেন দমেন চ.

৭৩২. ‘‘আৰামানি চ ৰোপিস্সং, দুগ্গে সঙ্কমনানি চ;

পপঞ্চ উদপানঞ্চ, ৱিপ্পসন্নেন চেতসা.

৭৩৩. ‘‘চাতুদ্দসিং পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

৭৩৪. ‘‘উপোসথং উপৱসিস্সং, সদা সীলেসু সংৱুতা;

ন চ দানে পমজ্জিস্সং, সামং দিট্ঠমিদং মযা’’তি.

৭৩৫. ইচ্চেৱং ৱিপ্পলপন্তিং, ফন্দমানং ততো ততো;

খিপিংসু নিৰযে ঘোৰে, উদ্ধংপাদং অৱংসিৰং.

৭৩৬. ‘‘অহং পুৰে মচ্ছৰিনী অহোসিং, পৰিভাসিকা সমণব্ৰাহ্মণানং;

ৱিতথেন চ সামিকং ৱঞ্চযিত্ৱা, পচ্চামহং নিৰযে ঘোৰৰূপে’’তি.

ৰেৱতীপেতৱত্থু চতুত্থং.