৭. ধনপালসেট্ঠিপেতৱত্থু

২২৭. ‘‘নগ্গো দুব্বণ্ণৰূপোসি, কিসো ধমনিসন্থতো;

উপ্ফাসুলিকো কিসিকো, কো নু ত্ৱমসি মাৰিস’’.

২২৮. ‘‘অহং ভদন্তে পেতোম্হি, দুগ্গতো যমলোকিকো;

পাপকম্মং কৰিত্ৱান, পেতলোকং ইতো গতো’’.

২২৯. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, পেতলোকং ইতো গতো’’.

২৩০. ‘‘নগৰং অত্থি পণ্ণানং [দসন্নানং (সী. স্যা. পী.)], এৰকচ্ছন্তি ৱিস্সুতং;

তত্থ সেট্ঠি পুৰে আসিং, ধনপালোতি মং ৱিদূ.

২৩১. ‘‘অসীতি সকটৱাহানং, হিৰঞ্ঞস্স অহোসি মে;

পহূতং মে জাতৰূপং, মুত্তা ৱেড়ুৰিযা বহূ.

২৩২. ‘‘তাৱ মহদ্ধনস্সাপি, ন মে দাতুং পিযং অহু;

পিদহিত্ৱা দ্ৱাৰং ভুঞ্জিং [ভুঞ্জামি (সী. স্যা.)], মা মং যাচনকাদ্দসুং.

২৩৩. ‘‘অস্সদ্ধো মচ্ছৰী চাসিং, কদৰিযো পৰিভাসকো;

দদন্তানং কৰোন্তানং, ৱাৰযিস্সং বহু জনে [বহুজ্জনং (সী. স্যা.)].

২৩৪. ‘‘ৱিপাকো নত্থি দানস্স, সংযমস্স কুতো ফলং;

পোক্খৰঞ্ঞোদপানানি, আৰামানি চ ৰোপিতে;

পপাযো চ ৱিনাসেসিং, দুগ্গে সঙ্কমনানি চ.

২৩৫. ‘‘স্ৱাহং অকতকল্যাণো, কতপাপো ততো চুতো;

উপপন্নো পেত্তিৱিসযং, খুপ্পিপাসসমপ্পিতো.

২৩৬. ‘‘পঞ্চপণ্ণাসৱস্সানি, যতো কালঙ্কতো অহং;

নাভিজানামি ভুত্তং ৱা, পীতং ৱা পন পানিযং.

২৩৭. ‘‘যো সংযমো সো ৱিনাসো,যো ৱিনাসো সো সংযমো;

পেতা হি কিৰ জানন্তি, যো সংযমো সো ৱিনাসো.

২৩৮. ‘‘অহং পুৰে সংযমিস্সং, নাদাসিং বহুকে ধনে;

সন্তেসু দেয্যধম্মেসু, দীপং নাকাসিমত্তনো;

স্ৱাহং পচ্ছানুতপ্পামি, অত্তকম্মফলূপগো.

২৩৯. [পে. ৱ. ৬৯] ‘‘উদ্ধং চতূহি মাসেহি, কালংকিৰিযা ভৱিস্সতি;

একন্তকটুকং ঘোৰং, নিৰযং পপতিস্সহং.

২৪০. [পে. ৱ. ৭০] ‘‘চতুক্কণ্ণং চতুদ্ৱাৰং, ৱিভত্তং ভাগসো মিতং;

অযোপাকাৰপৰিযন্তং, অযসা পটিকুজ্জিতং.

২৪১. [পে. ৱ. ৭১] ‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফৰিত্ৱা তিট্ঠতি সব্বদা.

২৪২. [পে. ৱ. ৭২] ‘‘তত্থাহং দীঘমদ্ধানং, দুক্খং ৱেদিস্স ৱেদনং;

ফলং পাপস্স কম্মস্স, তস্মা সোচামহং ভুসং.

২৪৩. ‘‘তং ৱো ৱদামি ভদ্দং ৱো, যাৱন্তেত্থ সমাগতা;

মাকত্থ পাপকং কম্মং, আৱি ৱা যদি ৱা ৰহো.

২৪৪. ‘‘সচে তং পাপকং কম্মং, কৰিস্সথ কৰোথ ৱা;

ন ৱো দুক্খা পমুত্যত্থি [পমুত্তত্থি (সব্বত্থ) উদা. ৪৪ পস্সিতব্বং], উপ্পচ্চাপি [উপেচ্চাপি (স্যা. ক.)] পলাযতং.

২৪৫. ‘‘মত্তেয্যা হোথ পেত্তেয্যা, কুলে জেট্ঠাপচাযিকা;

সামঞ্ঞা হোথ ব্ৰহ্মঞ্ঞা, এৱং সগ্গং গমিস্সথা’’তি.

ধনপালসেট্ঠিপেতৱত্থু সত্তমং.