৪. নন্দাপেতিৱত্থু

১৬৮. ‘‘কাড়ী দুব্বণ্ণৰূপাসি, ফৰুসা ভীৰুদস্সনা;

পিঙ্গলাসি কড়াৰাসি, ন তং মঞ্ঞামি মানুসি’’ন্তি.

১৬৯. ‘‘অহং নন্দা নন্দিসেন, ভৰিযা তে পুৰে অহুং;

পাপকম্মং কৰিত্ৱান, পেতলোকং ইতো গতা’’তি.

১৭০. ‘‘কিং নু কাযেন ৱাচায, মনসা দুক্কটং কতং;

কিস্স কম্মৱিপাকেন, পেতলোকং ইতো গতা’’তি.

১৭১. ‘‘চণ্ডী চ ফৰুসা চাসিং [চণ্ডী ফৰুসৱাচা চ (সী.)], তযি চাপি অগাৰৱা;

তাহং দুৰুত্তং ৱত্ৱান, পেতলোকং ইতো গতা’’তি.

১৭২. ‘‘হন্দুত্তৰীযং দদামি তে, ইমং [ইদং (সী. অট্ঠ.)] দুস্সং নিৱাসয;

ইমং দুস্সং নিৱাসেত্ৱা, এহি নেস্সামি তং ঘৰং.

১৭৩. ‘‘ৱত্থঞ্চ অন্নপানঞ্চ, লচ্ছসি ত্ৱং ঘৰং গতা;

পুত্তে চ তে পস্সিস্সসি, সুণিসাযো চ দক্খসী’’তি.

১৭৪. ‘‘হত্থেন হত্থে তে দিন্নং, ন ময্হং উপকপ্পতি;

ভিক্খূ চ সীলসম্পন্নে, ৱীতৰাগে বহুস্সুতে.

১৭৫. ‘‘তপ্পেহি অন্নপানেন, মম দক্খিণমাদিস;

তদাহং সুখিতা হেস্সং, সব্বকামসমিদ্ধিনী’’তি.

১৭৬. সাধূতি সো পটিস্সুত্ৱা, দানং ৱিপুলমাকিৰি;

অন্নং পানং খাদনীযং, ৱত্থসেনাসনানি চ;

ছত্তং গন্ধঞ্চ মালঞ্চ, ৱিৱিধা চ উপাহনা.

১৭৭. ভিক্খূ চ সীলসম্পন্নে, ৱীতৰাগে বহুস্সুতে;

তপ্পেত্ৱা অন্নপানেন, তস্সা দক্খিণমাদিসী.

১৭৮. সমনন্তৰানুদ্দিট্ঠে, ৱিপাকো উদপজ্জথ;

ভোজনচ্ছাদনপানীযং, দক্খিণায ইদং ফলং.

১৭৯. ততো সুদ্ধা সুচিৱসনা, কাসিকুত্তমধাৰিনী;

ৱিচিত্তৱত্থাভৰণা, সামিকং উপসঙ্কমি.

১৮০. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

১৮১. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১৮২. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

১৮৩. ‘‘অহং নন্দা নন্দিসেন, ভৰিযা তে পুৰে অহুং;

পাপকম্মং কৰিত্ৱান, পেতলোকং ইতো গতা.

১৮৪. ‘‘তৱ দিন্নেন দানেন, মোদামি অকুতোভযা;

চিৰং জীৱ গহপতি, সহ সব্বেহি ঞাতিভি;

অসোকং ৱিৰজং খেমং, আৱাসং ৱসৱত্তিনং.

১৮৫. ‘‘ইধ ধম্মং চৰিত্ৱান, দানং দত্ৱা গহপতি;

ৱিনেয্য মচ্ছেৰমলং সমূলং, অনিন্দিতো সগ্গমুপেহি ঠান’’ন্তি.

নন্দাপেতিৱত্থু চতুত্থং.