১০. খল্লাটিযপেতিৱত্থু

৫৮. ‘‘কা নু অন্তোৱিমানস্মিং, তিট্ঠন্তী নূপনিক্খমি;

উপনিক্খমস্সু ভদ্দে, পস্সাম তং বহিট্ঠিত’’ন্তি.

৫৯. ‘‘অট্টীযামি হৰাযামি, নগ্গা নিক্খমিতুং বহি;

কেসেহম্হি পটিচ্ছন্না, পুঞ্ঞং মে অপ্পকং কত’’ন্তি.

৬০. ‘‘হন্দুত্তৰীযং দদামি তে, ইদং দুস্সং নিৱাসয;

ইদং দুস্সং নিৱাসেত্ৱা, এহি নিক্খম সোভনে;

উপনিক্খমস্সু ভদ্দে, পস্সাম তং বহিট্ঠিত’’ন্তি.

৬১. ‘‘হত্থেন হত্থে তে দিন্নং, ন ময্হং উপকপ্পতি;

এসেত্থুপাসকো সদ্ধো, সম্মাসম্বুদ্ধসাৱকো.

৬২. ‘‘এতং অচ্ছাদযিত্ৱান, মম দক্খিণমাদিস;

তথাহং [অথাহং (সী.)] সুখিতা হেস্সং, সব্বকামসমিদ্ধিনী’’তি.

৬৩. তঞ্চ তে ন্হাপযিত্ৱান, ৱিলিম্পেত্ৱান ৱাণিজা;

ৱত্থেহচ্ছাদযিত্ৱান, তস্সা দক্খিণমাদিসুং.

৬৪. সমনন্তৰানুদ্দিট্ঠে [সমনন্তৰা অনুদ্দিট্ঠে (স্যা. ক.)], ৱিপাকো উদপজ্জথ [উপপজ্জথ (সী. স্যা.)];

ভোজনচ্ছাদনপানীযং [ভোজনচ্ছাদনং পানীযং (স্যা. ক.)], দক্খিণায ইদং ফলং.

৬৫. ততো সুদ্ধা সুচিৱসনা, কাসিকুত্তমধাৰিনী;

হসন্তী ৱিমানা নিক্খমি, ‘দক্খিণায ইদং ফল’’’ন্তি.

৬৬. ‘‘সুচিত্তৰূপং ৰুচিৰং, ৱিমানং তে পভাসতি;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৭. ‘‘ভিক্খুনো চৰমানস্স, দোণিনিম্মজ্জনিং অহং;

অদাসিং উজুভূতস্স, ৱিপ্পসন্নেন চেতসা.

৬৮. ‘‘তস্স কম্মস্স কুসলস্স, ৱিপাকং দীঘমন্তৰং;

অনুভোমি ৱিমানস্মিং, তঞ্চ দানি পৰিত্তকং.

৬৯. ‘‘উদ্ধং চতূহি মাসেহি, কালংকিৰিযা [কালংকিৰিযা (ক.)] ভৱিস্সতি;

একন্তকটুকং ঘোৰং, নিৰযং পপতিস্সহং.

৭০. [ম. নি. ৩.২৫০, ২৬৭; অ. নি. ৩.৩৬; পে. ৱ. ২৪০, ৬৯৩] ‘‘চতুক্কণ্ণং চতুদ্ৱাৰং, ৱিভত্তং ভাগসো মিতং;

অযোপাকাৰপৰিযন্তং, অযসা পটিকুজ্জিতং.

৭১. ‘‘তস্স অযোমযা ভূমি, জলিতা তেজসা যুতা;

সমন্তা যোজনসতং, ফৰিত্ৱা তিট্ঠতি সব্বদা.

৭২. ‘‘তত্থাহং দীঘমদ্ধানং, দুক্খং ৱেদিস্স ৱেদনং;

ফলঞ্চ পাপকম্মস্স, তস্মা সোচামহং ভুস’’ন্তি.

খল্লাটিযপেতিৱত্থু দসমং.