১১. নাগপেতৱত্থু

৭৩. ‘‘পুৰতোৱ [পুৰতো চ (স্যা.)] সেতেন পলেতি হত্থিনা, মজ্ঝে পন অস্সতৰীৰথেন;

পচ্ছা চ কঞ্ঞা সিৱিকায নীযতি, ওভাসযন্তী দস সব্বতো [সব্বতো (ক.)] দিসা.

৭৪. ‘‘তুম্হে পন মুগ্গৰহত্থপাণিনো, ৰুদংমুখা ছিন্নপভিন্নগত্তা;

মনুস্সভূতা কিমকত্থ পাপং, যেনঞ্ঞমঞ্ঞস্স পিৱাথ লোহিত’’ন্তি.

৭৫. ‘‘পুৰতোৱ যো গচ্ছতি কুঞ্জৰেন, সেতেন নাগেন চতুক্কমেন;

অম্হাক পুত্তো অহু জেট্ঠকো সো [সোৱ জেট্ঠো (ক.)], দানানি দত্ৱান সুখী পমোদতি.

৭৬. ‘‘যো সো মজ্ঝে অস্সতৰীৰথেন, চতুব্ভি যুত্তেন সুৱগ্গিতেন;

অম্হাক পুত্তো অহু মজ্ঝিমো সো, অমচ্ছৰী দানৱতী ৱিৰোচতি.

৭৭. ‘‘যা সা চ পচ্ছা সিৱিকায নীযতি, নাৰী সপঞ্ঞা মিগমন্দলোচনা;

অম্হাক ধীতা অহু সা কনিট্ঠিকা, ভাগড্ঢভাগেন সুখী পমোদতি.

৭৮. ‘‘এতে চ দানানি অদংসু পুব্বে, পসন্নচিত্তা সমণব্ৰাহ্মণানং;

মযং পন মচ্ছৰিনো অহুম্হ, পৰিভাসকা সমণব্ৰাহ্মণানং;

এতে চ দত্ৱা পৰিচাৰযন্তি, মযঞ্চ সুস্সাম নড়োৱ ছিন্নো’’তি [খিত্তোতি (সী.)].

৭৯. ‘‘কিং তুম্হাকং ভোজনং কিং সযানং, কথঞ্চ যাপেথ সুপাপধম্মিনো;

পহূতভোগেসু অনপ্পকেসু, সুখং ৱিৰাধায [ৱিৰাগায (স্যা. ক.)] দুক্খজ্জ পত্তা’’তি.

৮০. ‘‘অঞ্ঞমঞ্ঞং ৱধিত্ৱান, পিৱাম পুব্বলোহিতং;

বহুং পিত্ৱা ন ধাতা হোম, নচ্ছাদিম্হসে [নৰুচ্চাদিম্হসে (ক.)] মযং.

৮১. ‘‘ইচ্চেৱ মচ্চা পৰিদেৱযন্তি, অদাযকা পেচ্চ [মচ্ছৰিনো (ক.)] যমস্স ঠাযিনো;

যে তে ৱিদিচ্চ [ৱিদিত্ৱা (সী.)] অধিগম্ম ভোগে, ন ভুঞ্জৰে নাপি কৰোন্তি পুঞ্ঞং.

৮২. ‘‘তে খুপ্পিপাসূপগতা পৰত্থ, পচ্ছা [পেতা (সী.)] চিৰং ঝাযৰে ডয্হমানা;

কম্মানি কত্ৱান দুখুদ্ৰানি, অনুভোন্তি দুক্খং কটুকপ্ফলানি.

৮৩. ‘‘ইত্তৰং হি ধনং ধঞ্ঞং, ইত্তৰং ইধ জীৱিতং;

ইত্তৰং ইত্তৰতো ঞত্ৱা, দীপং কযিৰাথ পণ্ডিতো.

৮৪. ‘‘যে তে এৱং পজানন্তি, নৰা ধম্মস্স কোৱিদা;

তে দানে নপ্পমজ্জন্তি, সুত্ৱা অৰহতং ৱচো’’তি.

নাগপেতৱত্থু একাদসমং.