৩. অভিসমযকথা

১৯. অভিসমযোতি. কেন অভিসমেতি? চিত্তেন অভিসমেতি.

হঞ্চি চিত্তেন অভিসমেতি, তেন হি অঞ্ঞাণী অভিসমেতি? ন অঞ্ঞাণী অভিসমেতি. ঞাণেন অভিসমেতি.

হঞ্চি ঞাণেন অভিসমেতি, তেন হি অচিত্তেন চ ঞাণেন চ অচিত্তকো [তেন হি অচিত্তকো (স্যা.)] অভিসমেতি? ন অচিত্তকো অভিসমেতি. চিত্তেন চ ঞাণেন চ অভিসমেতি.

হঞ্চি চিত্তেন চ ঞাণেন চ অভিসমেতি, তেন হি কামাৱচৰচিত্তেন চ ঞাণেন চ অভিসমেতি? ন কামাৱচৰচিত্তেন চ ঞাণেন চ অভিসমেতি.

তেন হি ৰূপাৱচৰচিত্তেন চ ঞাণেন চ অভিসমেতি? ন ৰূপাৱচৰচিত্তেন চ ঞাণেন চ অভিসমেতি.

তেন হি অৰূপাৱচৰচিত্তেন চ ঞাণেন চ অভিসমেতি? ন অৰূপাৱচৰচিত্তেন চ ঞাণেন চ অভিসমেতি.

তেন হি কম্মস্সকতচিত্তেন চ ঞাণেন চ অভিসমেতি? ন কম্মস্সকতচিত্তেন চ ঞাণেন চ অভিসমেতি.

তেন হি সচ্চানুলোমিকচিত্তেন চ ঞাণেন চ অভিসমেতি? ন সচ্চানুলোমিকচিত্তেন চ ঞাণেন চ অভিসমেতি.

তেন হি অতীতচিত্তেন চ ঞাণেন চ অভিসমেতি? ন অতীতচিত্তেন চ ঞাণেন চ অভিসমেতি.

তেন হি অনাগতচিত্তেন চ ঞাণেন চ অভিসমেতি? ন অনাগতচিত্তেন চ ঞাণেন চ অভিসমেতি.

তেন হি পচ্চুপ্পন্নলোকিযচিত্তেন চ ঞাণেন চ অভিসমেতি? ন পচ্চুপ্পন্নলোকিযচিত্তেন চ ঞাণেন চ অভিসমেতি. লোকুত্তৰমগ্গক্খণে পচ্চুপ্পন্নচিত্তেন চ ঞাণেন চ অভিসমেতি.

কথং লোকুত্তৰমগ্গক্খণে পচ্চুপ্পন্নচিত্তেন চ ঞাণেন চ অভিসমেতি? লোকুত্তৰমগ্গক্খণে উপ্পাদাধিপতেয্যং চিত্তং ঞাণস্স হেতু পচ্চযো চ. তংসম্পযুত্তং নিৰোধগোচৰং দস্সনাধিপতেয্যং ঞাণং চিত্তস্স হেতু পচ্চযো চ. তংসম্পযুত্তং ঞাণং নিৰোধগোচৰং. এৱং লোকুত্তৰমগ্গক্খণে পচ্চুপ্পন্নচিত্তেন চ ঞাণেন চ অভিসমেতি.

২০. কিং নু এত্তকোযেৱ অভিসমযোতি? ন হি.লোকুত্তৰমগ্গক্খণে দস্সনাভিসমযো সম্মাদিট্ঠি, অভিনিৰোপনাভিসমযো সম্মাসঙ্কপ্পো, পৰিগ্গহাভিসমযো সম্মাৱাচা, সমুট্ঠানাভিসমযো সম্মাকম্মন্তো, ৱোদানাভিসমযো সম্মাআজীৱো, পগ্গহাভিসমযো সম্মাৱাযামো, উপট্ঠানাভিসমযো সম্মাসতি, অৱিক্খেপাভিসমযো সম্মাসমাধি; উপট্ঠানাভিসমযো সতিসম্বোজ্ঝঙ্গো, পৱিচযাভিসমযো ধম্মৱিচযসম্বোজ্ঝঙ্গো, পগ্গহাভিসমযো ৱীৰিযসম্বোজ্ঝঙ্গো, ফৰণাভিসমযো পীতিসম্বোজ্ঝঙ্গো, উপসমাভিসমযো পস্সদ্ধিসম্বোজ্ঝঙ্গো, অৱিক্খেপাভিসমযো সমাধিসম্বোজ্ঝঙ্গো, পটিসঙ্খানাভিসমযো উপেক্খাসম্বোজ্ঝঙ্গো; অস্সদ্ধিযে অকম্পিযাভিসমযো সদ্ধাবলং, কোসজ্জে অকম্পিযাভিসমযো ৱীৰিযবলং, পমাদে অকম্পিযাভিসমযো সতিবলং, উদ্ধচ্চে অকম্পিযাভিসমযো সমাধিবলং, অৱিজ্জায অকম্পিযাভিসমযো পঞ্ঞাবলং; অধিমোক্খাভিসমযো সদ্ধিন্দ্ৰিযং, পগ্গহাভিসমযো ৱীৰিযিন্দ্ৰিযং, উপট্ঠানাভিসমযো সতিন্দ্ৰিযং, অৱিক্খেপাভিসমযো সমাধিন্দ্ৰিযং, দস্সনাভিসমযো পঞ্ঞিন্দ্ৰিযং. আধিপতেয্যট্ঠেন ইন্দ্ৰিযাভিসমযো, অকম্পিযট্ঠেন বলাভিসমযো, নিয্যানট্ঠেন বোজ্ঝঙ্গাভিসমযো, হেতুট্ঠেন মগ্গাভিসমযো, উপট্ঠানট্ঠেন সতিপট্ঠানাভিসমযো, পদহট্ঠেন সম্মপ্পধানাভিসমযো, ইজ্ঝনট্ঠেন ইদ্ধিপাদাভিসমযো, তথট্ঠেন সচ্চাভিসমযো, অৱিক্খেপট্ঠেন সমথাভিসমযো, অনুপস্সনট্ঠেন ৱিপস্সনাভিসমযো, একৰসট্ঠেন সমথৱিপস্সনাভিসমযো, অনতিৱত্তনট্ঠেন যুগনদ্ধাভিসমযো, সংৱৰট্ঠেন সীলৱিসুদ্ধিঅভিসমযো, অৱিক্খেপট্ঠেন ৱিসুদ্ধিঅভিসমযো, দস্সনট্ঠেন দিট্ঠিৱিসুদ্ধিঅভিসমযো, মুত্তট্ঠেন ৱিমোক্খাভিসমযো, পটিৱেধট্ঠেন ৱিজ্জাভিসমযো, পৰিচ্চাগট্ঠেন ৱিমুত্তিঅভিসমযো, সমুচ্ছেদট্ঠেন খযে ঞাণং অভিসমযো. ছন্দো মূলট্ঠেন অভিসমযো, মনসিকাৰো সমুট্ঠানট্ঠেন অভিসমযো, ফস্সো সমোধানট্ঠেন অভিসমযো, ৱেদনা সমোসৰণট্ঠেন অভিসমযো, সমাধি পমুখট্ঠেন অভিসমযো, সতি আধিপতেয্যট্ঠেন অভিসমযো, পঞ্ঞা ততুত্তৰট্ঠেন অভিসমযো, ৱিমুত্তি সাৰট্ঠেন অভিসমযো, অমতোগধং নিব্বানং পৰিযোসানট্ঠেন অভিসমযো.

২১. কিং নু এত্তকোযেৱ অভিসমযোতি? ন হি. সোতাপত্তিমগ্গক্খণে দস্সনাভিসমযো সম্মাদিট্ঠি…পে… অমতোগধং নিব্বানং পৰিযোসানট্ঠেন অভিসমযো.

কিং নু এত্তকোযেৱ অভিসমযোতি? ন হি. সোতাপত্তিফলক্খণে দস্সনাভিসমযো সম্মাদিট্ঠি…পে… পটিপ্পস্সদ্ধট্ঠেন অনুপ্পাদে ঞাণং অভিসমযো. ছন্দো মূলট্ঠেন অভিসমযো…পে… অমতোগধং ৫ নিব্বানং পৰিযোসানট্ঠেন অভিসমযো.

কিং নু এত্তকোযেৱ অভিসমযোতি?

ন হি. সকদাগামিমগ্গক্খণে…পে… সকদাগামিফলক্খণে… অনাগামিমগ্গক্খণে… অনাগামিফলক্খণে… অৰহত্তমগ্গক্খণে…পে… অৰহত্তফলক্খণে দস্সনাভিসমযো সম্মাদিট্ঠি, অভিনিৰোপনাভিসমযো সম্মাসঙ্কপ্পো…পে… পটিপ্পস্সদ্ধট্ঠেন অনুপ্পাদে ঞাণং অভিসমযো. ছন্দো মূলট্ঠেন অভিসমযো…পে… অমতোগধং নিব্বানং পৰিযোসানট্ঠেন অভিসমযো.

য্ৱাযং [স্যাযং (স্যা. পী.)] কিলেসে পজহতি, অতীতে কিলেসে পজহতি…পে… অনাগতে কিলেসে পজহতি, পচ্চুপ্পন্নে কিলেসে পজহতি, অতীতে কিলেসে পজহতীতি. হঞ্চি অতীতে কিলেসে পজহতি, তেন হি খীণং খেপেতি, নিৰুদ্ধং নিৰোধেতি, ৱিগতং ৱিগমেতি, অত্থঙ্গতং অত্থঙ্গমেতি, অতীতং যং ন অত্থি তং পজহতীতি? ন অতীতে কিলেসে পজহতীতি. অনাগতে কিলেসে পজহতীতি. হঞ্চি অনাগতে কিলেসে পজহতি, তেন হি অজাতং পজহতি, অনিব্বত্তং পজহতি, অনুপ্পন্নং পজহতি, অপাতুভূতং পজহতি, অনাগতং যং ন অত্থি তং পজহতীতি? ন অনাগতে কিলেসে পজহতীতি. পচ্চুপ্পন্নে কিলেসে পজহতীতি. হঞ্চি পচ্চুপ্পন্নে কিলেসে পজহতি, তেন হি ৰত্তো ৰাগং পজহতি, দুট্ঠো দোসং পজহতি, মূড়্হো মোহং পজহতি, ৱিনিবদ্ধো মানং পজহতি, পৰামট্ঠো দিট্ঠিং পজহতি,

ৱিক্খেপগতো উদ্ধচ্চং পজহতি, অনিট্ঠঙ্গতো ৱিচিকিচ্ছং পজহতি, থামগতো অনুসযং পজহতি, কণ্হসুক্কধম্মা যুগনদ্ধা সমমেৱ ৱত্তন্তি, সংকিলেসিকা [তংসংকিলেসিকা (স্যা. ক.)] মগ্গভাৱনা হোতি?

ন হি অতীতে কিলেসে পজহতি, ন অনাগতে কিলেসে পজহতি, ন পচ্চুপ্পন্নে কিলেসে পজহতীতি. হঞ্চি ন অতীতে কিলেসে পজহতি, ন অনাগতে…পে… ন পচ্চুপ্পন্নে কিলেসে পজহতি, তেন হি নত্থি মগ্গভাৱনা, নত্থি ফলসচ্ছিকিৰিযা, নত্থি কিলেসপ্পহানং, নত্থি ধম্মাভিসমযোতি? অত্থি মগ্গভাৱনা, অত্থি ফলসচ্ছিকিৰিযা, অত্থি কিলেসপ্পহানং, অত্থি ধম্মাভিসমযো. যথা কথং ৱিয? সেয্যথাপি তৰুণো ৰুক্খো অজাতফলো. তমেনং পুৰিসো মূলং ছিন্দেয্য. যে তস্স ৰুক্খস্স অজাতফলা, তে অজাতাযেৱ ন জাযন্তি, অনিব্বত্তাযেৱ ন নিব্বত্তন্তি, অনুপ্পন্নাযেৱ ন উপ্পজ্জন্তি, অপাতুভূতাযেৱ ন পাতুভৱন্তি. এৱমেৱং উপ্পাদো হেতু, উপ্পাদো পচ্চযো কিলেসানং নিব্বত্তিযাতি. উপ্পাদে আদীনৱং দিস্ৱা অনুপ্পাদে চিত্তং পক্খন্দতি. অনুপ্পাদে চিত্তস্স পক্খন্দত্তা যে উপ্পাদপচ্চযা কিলেসা নিব্বত্তেয্যুং, তে অজাতাযেৱ ন জাযন্তি, অনিব্বত্তাযেৱ ন নিব্বত্তন্তি, অনুপ্পন্নাযেৱ ন উপ্পজ্জন্তি, অপাতুভূতাযেৱ ন পাতুভৱন্তি. এৱং হেতুনিৰোধা দুক্খনিৰোধো. পৱত্তং হেতু, নিমিত্তং হেতু, আযূহনা হেতু. আযূহনা পচ্চযো কিলেসানং নিব্বত্তিযাতি. আযূহনে আদীনৱং দিস্ৱা অনাযূহনে চিত্তং পক্খন্দতি. অনাযূহনে চিত্তস্স পক্খন্দত্তা, যে আযূহনপচ্চযা কিলেসা নিব্বত্তেয্যুং, তে অজাতাযেৱ ন জাযন্তি, অনিব্বত্তাযেৱ ন নিব্বত্তন্তি, অনুপ্পন্নাযেৱ ন উপ্পজ্জন্তি, অপাতুভূতাযেৱ ন পাতুভৱন্তি. এৱং হেতুনিৰোধা দুক্খনিৰোধো. এৱং অত্থি মগ্গভাৱনা, অত্থি ফলসচ্ছিকিৰিযা, অত্থি কিলেসপ্পহানং, অত্থি ধম্মাভিসমযোতি.

অভিসমযকথা নিট্ঠিতা.