২. সতিপট্ঠানৱাৰো

৪১. ‘‘‘অযং কাযে কাযানুপস্সনা’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. সা খো পনাযং কাযে কাযানুপস্সনা ভাৱেতব্বাতি মে, ভিক্খৱে,…পে… ভাৱিতাতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি’’.

‘‘অযং ৱেদনাসু…পে… অযং চিত্তে… অযং ধম্মেসু ধম্মানুপস্সনাতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. সা খো পনাযং ধম্মেসু ধম্মানুপস্সনা ভাৱেতব্বাতি মে, ভিক্খৱে…পে… ভাৱিতাতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি’’.

অযং কাযে কাযানুপস্সনাতি পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি…পে… সা খো পনাযং কাযে কাযানুপস্সনা ভাৱেতব্বাতি…পে… ভাৱিতাতি পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি.

চক্খুং উদপাদীতি – কেনট্ঠেন…পে… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে… আলোকো উদপাদীতি – ওভাসট্ঠেন.

চক্খুং ধম্মো, দস্সনট্ঠো অত্থো…পে… আলোকো ধম্মো, ওভাসট্ঠো অত্থো. ইমে পঞ্চ ধম্মা পঞ্চ অত্থা কাযৱত্থুকা সতিপট্ঠানৱত্থুকা…পে… ৱেদনাৱত্থুকা সতিপট্ঠানৱত্থুকা… চিত্তৱত্থুকা সতিপট্ঠানৱত্থুকা… ধম্মৱত্থুকা সতিপট্ঠানৱত্থুকা সতিপট্ঠানাৰম্মণা সতিপট্ঠানগোচৰা সতিপট্ঠানসঙ্গহিতা সতিপট্ঠানপৰিযাপন্না সতিপট্ঠানে সমুদাগতা সতিপট্ঠানে ঠিতা সতিপট্ঠানে পতিট্ঠিতা.

ধম্মচক্কন্তি কেনট্ঠেন ধম্মচক্কং? ধম্মঞ্চ পৱত্তেতি চক্কঞ্চাতি – ধম্মচক্কং. চক্কঞ্চ পৱত্তেতি ধম্মঞ্চাতি – ধম্মচক্কং. ধম্মেন পৱত্তেতীতি – ধম্মচক্কং. ধম্মচৰিযায পৱত্তেতীতি – ধম্মচক্কং. ধম্মে ঠিতো পৱত্তেতীতি – ধম্মচক্কং. ধম্মে পতিট্ঠিতো পৱত্তেতীতি – ধম্মচক্কং …পে… অমতোগধং নিব্বানং পৰিযোসানট্ঠেন ধম্মো. তং ধম্মং পৱত্তেতীতি – ধম্মচক্কং.