৩. ইদ্ধিপাদৱাৰো

৪২. ‘‘‘অযং ছন্দসমাধিপধানসঙ্খাৰসমন্নাগতো ইদ্ধিপাদো’তি মে, ভিক্খৱে পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. ‘সো খো পনাযং ছন্দসমাধিপধানসঙ্খাৰসমন্নাগতো ইদ্ধিপাদো ভাৱেতব্বো’তি মে, ভিক্খৱে…পে… ভাৱিতোতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি.

‘‘অযং ৱীৰিযসমাধি…পে… অযং চিত্তসমাধি…পে… অযং ৱীমংসাসমাধিপধানসঙ্খাৰসমন্নাগতো ইদ্ধিপাদোতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি. সো খো পনাযং ৱীমংসাসমাধিপধানসঙ্খাৰসমন্নাগতো ইদ্ধিপাদো ভাৱেতব্বোতি মে, ভিক্খৱে…পে… ভাৱিতোতি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি’’.

অযং ছন্দসমাধিপধানসঙ্খাৰসমন্নাগতো ইদ্ধিপাদোতি পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি…পে… সো খো পনাযং ছন্দসমাধিপধানসঙ্খাৰসমন্নাগতো ইদ্ধিপাদো ভাৱেতব্বোতি…পে… ভাৱিতোতি পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি.

চক্খুং উদপাদীতি – কেনট্ঠেন? ঞাণং উদপাদীতি – কেনট্ঠেন? পঞ্ঞা উদপাদীতি – কেনট্ঠেন? ৱিজ্জা উদপাদীতি – কেনট্ঠেন? আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন. ঞাণং উদপাদীতি – ঞাতট্ঠেন. পঞ্ঞা উদপাদীতি – পজাননট্ঠেন. ৱিজ্জা উদপাদীতি – পটিৱেধট্ঠেন. আলোকো উদপাদীতি – ওভাসট্ঠেন.

চক্খুং ধম্মো, দস্সনট্ঠো অত্থো. ঞাণং ধম্মো, ঞাতট্ঠো অত্থো. পঞ্ঞা ধম্মো, পজাননট্ঠো অত্থো. ৱিজ্জা ধম্মো, পটিৱেধট্ঠো অত্থো. আলোকো ধম্মো, ওভাসট্ঠো অত্থো. ইমে পঞ্চ ধম্মা পঞ্চ অত্থা ছন্দৱত্থুকা ইদ্ধিপাদৱত্থুকা ইদ্ধিপাদাৰম্মণা ইদ্ধিপাদগোচৰা ইদ্ধিপাদসঙ্গহিতা ইদ্ধিপাদপৰিযাপন্না ইদ্ধিপাদে সমুদাগতা ইদ্ধিপাদে ঠিতা ইদ্ধিপাদে পতিট্ঠিতা.

ধম্মচক্কন্তি কেনট্ঠেন ধম্মচক্কং? ধম্মঞ্চ পৱত্তেতি চক্কঞ্চাতি – ধম্মচক্কং. চক্কঞ্চ পৱত্তেতি ধম্মঞ্চাতি – ধম্মচক্কং. ধম্মেন পৱত্তেতীতি – ধম্মচক্কং. ধম্মচৰিযায পৱত্তেতীতি – ধম্মচক্কং. ধম্মে ঠিতো পৱত্তেতীতি – ধম্মচক্কং. ধম্মে পতিট্ঠিতো পৱত্তেতীতি – ধম্মচক্কং. ধম্মে পতিট্ঠাপেন্তো পৱত্তেতীতি – ধম্মচক্কং. ধম্মে ৱসিপ্পত্তো পৱত্তেতীতি – ধম্মচক্কং. ধম্মে ৱসিং পাপেন্তো পৱত্তেতীতি – ধম্মচক্কং. ধম্মে পাৰমিপ্পত্তো পৱত্তেতীতি – ধম্মচক্কং. ধম্মে পাৰমিং পাপেন্তো পৱত্তেতীতি – ধম্মচক্কং…পে… ধম্মং অপচাযমানো পৱত্তেতীতি – ধম্মচক্কং. ধম্মদ্ধজো পৱত্তেতীতি – ধম্মচক্কং. ধম্মকেতু পৱত্তেতীতি – ধম্মচক্কং. ধম্মাধিপতেয্যো পৱত্তেতীতি – ধম্মচক্কং. তং খো পন ধম্মচক্কং অপ্পটিৱত্তিযং সমণেন ৱা ব্ৰাহ্মণেন ৱা দেৱেন ৱা মাৰেন ৱা ব্ৰহ্মুনা ৱা কেনচি ৱা লোকস্মিন্তি – ধম্মচক্কং.

সদ্ধিন্দ্ৰিযং ধম্মো. তং ধম্মং পৱত্তেতীতি – ধম্মচক্কং…পে… অমতোগধং নিব্বানং পৰিযোসানট্ঠেন ধম্মো. তং ধম্মং পৱত্তেতীতি – ধম্মচক্কং.

অযং ৱীৰিযসমাধিপধানসঙ্খাৰসমন্নাগতো ইদ্ধিপাদোতি পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি…পে… সো খো পনাযং ৱীৰিযসমাধিপধানসঙ্খাৰসমন্নাগতো ইদ্ধিপাদো ভাৱেতব্বোতি…পে… ভাৱিতোতি পুব্বে অননুস্সুতেসু ধম্মেসু চক্খুং উদপাদি…পে… আলোকো উদপাদি.

চক্খুং উদপাদীতি – কেনট্ঠেন…পে… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে… আলোকো উদপাদীতি – ওভাসট্ঠেন.

চক্খুং ধম্মো, দস্সনট্ঠো অত্থো…পে… আলোকো ধম্মো, ওভাসট্ঠো অত্থো. ইমে পঞ্চ ধম্মা পঞ্চ অত্থা ৱীৰিযৱত্থুকা ইদ্ধিপাদৱত্থুকা…পে… চিত্তৱত্থুকা ইদ্ধিপাদৱত্থুকা… ৱীমংসাৱত্থুকা ইদ্ধিপাদৱত্থুকা ইদ্ধিপাদাৰম্মণা ইদ্ধিপাদগোচৰা ইদ্ধিপাদসঙ্গহিতা ইদ্ধিপাদপৰিযাপন্না ইদ্ধিপাদে সমুদাগতা ইদ্ধিপাদে ঠিতা ইদ্ধিপাদে পতিট্ঠিতা.

ধম্মচক্কন্তি কেনট্ঠেন ধম্মচক্কং? ধম্মঞ্চ পৱত্তেতি চক্কঞ্চাতি – ধম্মচক্কং. চক্কঞ্চ পৱত্তেতি ধম্মঞ্চাতি – ধম্মচক্কং. ধম্মেন পৱত্তেতীতি – ধম্মচক্কং. ধম্মচৰিযায পৱত্তেতীতি – ধম্মচক্কং. ধম্মে ঠিতো পৱত্তেতীতি – ধম্মচক্কং. ধম্মে পতিট্ঠিতো পৱত্তেতীতি – ধম্মচক্কং…পে… অমতোগধং নিব্বানং পৰিযোসানট্ঠেন ধম্মো. তং ধম্মং পৱত্তেতীতি – ধম্মচক্কন্তি.

ধম্মচক্ককথা নিট্ঠিতা.