৪. মেত্তাকথা

২২. সাৱত্থিনিদানং. ‘‘মেত্তায, ভিক্খৱে, চেতোৱিমুত্তিযা আসেৱিতায ভাৱিতায বহুলীকতায যানীকতায ৱত্থুকতায অনুট্ঠিতায পৰিচিতায সুসমাৰদ্ধায একাদসানিসংসা পাটিকঙ্খা. কতমে একাদস? সুখং সুপতি, সুখং পটিবুজ্ঝতি, ন পাপকং সুপিনং পস্সতি, মনুস্সানং পিযো হোতি, অমনুস্সানং পিযো হোতি, দেৱতা ৰক্খন্তি, নাস্স অগ্গি ৱা ৱিসং ৱা সত্থং ৱা কমতি, তুৱটং চিত্তং সমাধিযতি, মুখৱণ্ণো ৱিপ্পসীদতি, অসম্মূড়্হো কালঙ্কৰোতি, উত্তৰি [উত্তৰিং (স্যা. পী.) অ. নি. ১১.১৫ পস্সিতব্বা] অপ্পটিৱিজ্ঝন্তো ব্ৰহ্মলোকূপগো হোতি. মেত্তায, ভিক্খৱে, চেতোৱিমুত্তিযা আসেৱিতায ভাৱিতায বহুলীকতায যানীকতায ৱত্থুকতায অনুট্ঠিতায পৰিচিতায সুসমাৰদ্ধায – ইমে একাদসানিসংসা পাটিকঙ্খা’’.

অত্থি অনোধিসো ফৰণা মেত্তাচেতোৱিমুত্তি, অত্থি ওধিসো ফৰণা মেত্তাচেতোৱিমুত্তি, অত্থি দিসাফৰণা মেত্তাচেতোৱিমুত্তি. কতিহাকাৰেহি অনোধিসো ফৰণা মেত্তাচেতোৱিমুত্তি, কতিহাকাৰেহি ওধিসো ফৰণা মেত্তাচেতোৱিমুত্তি, কতিহাকাৰেহি দিসাফৰণা মেত্তাচেতোৱিমুত্তি? পঞ্চহাকাৰেহি অনোধিসো ফৰণা মেত্তাচেতোৱিমুত্তি, সত্তহাকাৰেহি ওধিসো ফৰণা মেত্তাচেতোৱিমুত্তি, দসহাকাৰেহি দিসাফৰণা মেত্তাচেতোৱিমুত্তি.

কতমেহি পঞ্চহাকাৰেহি অনোধিসো ফৰণা মেত্তাচেতোৱিমুত্তি? সব্বে সত্তা অৱেৰা অব্যাপজ্জা [অব্যাপজ্ঝা (স্যা.)] অনীঘা সুখী অত্তানং পৰিহৰন্তু. সব্বে পাণা…পে… সব্বে ভূতা…পে… সব্বে পুগ্গলা…পে… সব্বে অত্তভাৱপৰিযাপন্না অৱেৰা অব্যাপজ্জা অনীঘা সুখী অত্তানং পৰিহৰন্তূতি. ইমেহি পঞ্চহাকাৰেহি অনোধিসো ফৰণা মেত্তাচেতোৱিমুত্তি.

কতমেহি সত্তহাকাৰেহি ওধিসো ফৰণা মেত্তাচেতোৱিমুত্তি? সব্বা ইত্থিযো অৱেৰা অব্যাপজ্জা অনীঘা সুখী অত্তানং পৰিহৰন্তু. সব্বে পুৰিসা…পে… সব্বে অৰিযা…পে… সব্বে অনৰিযা…পে… সব্বে দেৱা…পে… সব্বে মনুস্সা…পে… সব্বে ৱিনিপাতিকা অৱেৰা অব্যাপজ্জা অনীঘা সুখী অত্তানং পৰিহৰন্তূতি. ইমেহি সত্তহাকাৰেহি ওধিসো ফৰণা মেত্তাচেতোৱিমুত্তি.

কতমেহি দসহাকাৰেহি দিসাফৰণা মেত্তাচেতোৱিমুত্তি? সব্বে পুৰত্থিমায দিসায সত্তা অৱেৰা অব্যাপজ্জা অনীঘা সুখী অত্তানং পৰিহৰন্তু. সব্বে পচ্ছিমায দিসায সত্তা…পে… সব্বে উত্তৰায দিসায সত্তা…পে… সব্বে দক্খিণায দিসায সত্তা…পে… সব্বে পুৰত্থিমায অনুদিসায সত্তা…পে… সব্বে পচ্ছিমায অনুদিসায সত্তা…পে… সব্বে উত্তৰায অনুদিসায সত্তা…পে… সব্বে দক্খিণায অনুদিসায সত্তা…পে… সব্বে হেট্ঠিমায দিসায সত্তা…পে… সব্বে উপৰিমায দিসায সত্তা অৱেৰা অব্যাপজ্জা অনীঘা সুখী অত্তানং পৰিহৰন্তু. সব্বে পুৰত্থিমায দিসায পাণা…পে… ভূতা… পুগ্গলা… অত্তভাৱপৰিযাপন্না… সব্বা ইত্থিযো… সব্বে পুৰিসা… সব্বে অৰিযা… সব্বে অনৰিযা… সব্বে দেৱা… সব্বে মনুস্সা… সব্বে ৱিনিপাতিকা অৱেৰা অব্যাপজ্জা অনীঘা সুখী অত্তানং পৰিহৰন্তু. সব্বে পচ্ছিমায দিসায ৱিনিপাতিকা…পে… সব্বে উত্তৰায দিসায ৱিনিপাতিকা… সব্বে দক্খিণায দিসায ৱিনিপাতিকা… সব্বে পুৰত্থিমায অনুদিসায ৱিনিপাতিকা… সব্বে পচ্ছিমায অনুদিসায ৱিনিপাতিকা… সব্বে উত্তৰায অনুদিসায ৱিনিপাতিকা… সব্বে দক্খিণায অনুদিসায ৱিনিপাতিকা… সব্বে হেট্ঠিমায দিসায ৱিনিপাতিকা… সব্বে উপৰিমায দিসায ৱিনিপাতিকা অৱেৰা অব্যাপজ্জা অনীঘা সুখী অত্তানং পৰিহৰন্তূতি. ইমেহি দসহাকাৰেহি দিসাফৰণা মেত্তাচেতোৱিমুত্তি.

১. ইন্দ্ৰিযৱাৰো

২৩. সব্বেসং সত্তানং পীড়নং ৱজ্জেত্ৱা অপীড়নায, উপঘাতং ৱজ্জেত্ৱা অনুপঘাতেন, সন্তাপং ৱজ্জেত্ৱা অসন্তাপেন, পৰিযাদানং ৱজ্জেত্ৱা অপৰিযাদানেন, ৱিহেসং ৱজ্জেত্ৱা অৱিহেসায, সব্বে সত্তা অৱেৰিনো হোন্তু মা ৱেৰিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকাৰেহি সব্বে সত্তে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপৰিযুট্ঠানেহি ৱিমুচ্চতীতি – ৱিমুত্তি. মেত্তা চ চেতো চ ৱিমুত্তি চাতি – মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্ৰিযপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – ৱীৰিযং পগ্গণ্হাতি. ৱীৰিযিন্দ্ৰিযপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি. সতিন্দ্ৰিযপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – চিত্তং সমাদহতি. সমাধিন্দ্ৰিযপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – পঞ্ঞায পজানাতি. পঞ্ঞিন্দ্ৰিযপৰিভাৱিতা হোতি মেত্তাচেতোৱিমুত্তি.

ইমানি পঞ্চিন্দ্ৰিযানি মেত্তায চেতোৱিমুত্তিযা আসেৱনা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি আসেৱীযতি. ইমানি পঞ্চিন্দ্ৰিযানি মেত্তায চেতোৱিমুত্তিযা ভাৱনা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি ভাৱীযতি. ইমানি পঞ্চিন্দ্ৰিযানি মেত্তায চেতোৱিমুত্তিযা বহুলীকতা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি বহুলীকৰীযতি. ইমানি পঞ্চিন্দ্ৰিযানি মেত্তায চেতোৱিমুত্তিযা অলঙ্কাৰা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি স্ৱালঙ্কতা হোতি. ইমানি পঞ্চিন্দ্ৰিযানি মেত্তায চেতোৱিমুত্তিযা পৰিক্খাৰা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি সুপৰিক্খতা হোতি. ইমানি পঞ্চিন্দ্ৰিযানি মেত্তায চেতোৱিমুত্তিযা পৰিৱাৰা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি সুপৰিৱুতা হোতি. ইমানি পঞ্চিন্দ্ৰিযানি মেত্তায চেতোৱিমুত্তিযা আসেৱনা হোন্তি, ভাৱনা হোন্তি, বহুলীকতা হোন্তি, অলঙ্কাৰা হোন্তি, পৰিক্খাৰা হোন্তি, পৰিৱাৰা হোন্তি, পাৰিপূৰী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা [সংসীদনা (ক. সী. অট্ঠ.)] হোন্তি, সন্তিট্ঠনা হোন্তি, ৱিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৱত্থুকতা হোন্তি, অনুট্ঠিতা হোন্তি, পৰিচিতা হোন্তি, সুসমাৰদ্ধা হোন্তি, সুভাৱিতা হোন্তি, স্ৱাধিট্ঠিতা হোন্তি, সুসমুগ্গতা হোন্তি, সুৱিমুত্তা হোন্তি, নিব্বত্তেন্তি জোতেন্তি পতাপেন্তি.

২. বলৱাৰো

২৪. সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – অস্সদ্ধিযে ন কম্পতি. সদ্ধাবলপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – কোসজ্জে ন কম্পতি. ৱীৰিযবলপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – পমাদে ন কম্পতি. সতিবলপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – উদ্ধচ্চে ন কম্পতি. সমাধিবলপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – অৱিজ্জায ন কম্পতি. পঞ্ঞাবলপৰিভাৱিতা হোতি মেত্তাচেতোৱিমুত্তি.

ইমানি পঞ্চ বলানি মেত্তায চেতোৱিমুত্তিযা আসেৱনা হোন্তি. ইমেহি পঞ্চহি বলেহি মেত্তাচেতোৱিমুত্তি আসেৱীযতি. ইমানি পঞ্চ বলানি মেত্তায চেতোৱিমুত্তিযা ভাৱনা হোন্তি. ইমেহি পঞ্চহি বলেহি মেত্তাচেতোৱিমুত্তি ভাৱীযতি. ইমানি পঞ্চ বলানি মেত্তায চেতোৱিমুত্তিযা বহুলীকতা হোন্তি. ইমেহি পঞ্চহি বলেহি মেত্তাচেতোৱিমুত্তি বহুলীকৰীযতি. ইমানি পঞ্চ বলানি মেত্তায চেতোৱিমুত্তিযা অলঙ্কাৰা হোন্তি. ইমেহি পঞ্চহি বলেহি মেত্তাচেতোৱিমুত্তি স্ৱালঙ্কতা হোতি. ইমানি পঞ্চ বলানি মেত্তায চেতোৱিমুত্তিযা পৰিক্খাৰা হোন্তি. ইমেহি পঞ্চহি বলেহি মেত্তাচেতোৱিমুত্তি সুপৰিক্খতা হোতি. ইমানি পঞ্চ বলানি মেত্তায চেতোৱিমুত্তিযা পৰিৱাৰা হোন্তি. ইমেহি পঞ্চহি বলেহি মেত্তাচেতোৱিমুত্তি সুপৰিৱুতা হোতি. ইমানি পঞ্চ বলানি মেত্তায চেতোৱিমুত্তিযা আসেৱনা হোন্তি, ভাৱনা হোন্তি, বহুলীকতা হোন্তি, অলঙ্কাৰা হোন্তি, পৰিক্খাৰা হোন্তি, পৰিৱাৰা হোন্তি, পাৰিপূৰী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৱিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৱত্থুকতা হোন্তি, অনুট্ঠিতা হোন্তি, পৰিচিতা হোন্তি, সুসমাৰদ্ধা হোন্তি, সুভাৱিতা হোন্তি, স্ৱাধিট্ঠিতা হোন্তি, সুসমুগ্গতা হোন্তি, সুৱিমুত্তা হোন্তি নিব্বত্তেন্তি জোতেন্তি পতাপেন্তি.

৩. বোজ্ঝঙ্গৱাৰো

২৫. সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি. সতিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – পঞ্ঞায পৱিচিনাতি. ধম্মৱিচযসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – ৱীৰিযং পগ্গণ্হাতি. ৱীৰিযসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – পৰিড়াহং পটিপ্পস্সম্ভেতি. পীতিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – দুট্ঠুল্লং পটিপ্পস্সম্ভেতি. পস্সদ্ধিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – চিত্তং সমাদহতি. সমাধিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – ঞাণেন কিলেসে পটিসঙ্খাতি. উপেক্খাসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

ইমে সত্ত বোজ্ঝঙ্গা মেত্তায চেতোৱিমুত্তিযা আসেৱনা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি আসেৱীযতি. ইমে সত্ত বোজ্ঝঙ্গা মেত্তায চেতোৱিমুত্তিযা ভাৱনা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি ভাৱীযতি. ইমে সত্ত বোজ্ঝঙ্গা মেত্তায চেতোৱিমুত্তিযা বহুলীকতা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি বহুলীকৰীযতি. ইমে সত্ত বোজ্ঝঙ্গা মেত্তায চেতোৱিমুত্তিযা অলঙ্কাৰা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি স্ৱালঙ্কতা হোতি. ইমে সত্ত বোজ্ঝঙ্গা মেত্তায চেতোৱিমুত্তিযা পৰিক্খাৰা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি সুপৰিক্খতা হোতি. ইমে সত্ত বোজ্ঝঙ্গা মেত্তায চেতোৱিমুত্তিযা পৰিৱাৰা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি সুপৰিৱুতা হোতি. ইমে সত্ত বোজ্ঝঙ্গা মেত্তায চেতোৱিমুত্তিযা আসেৱনা হোন্তি, ভাৱনা হোন্তি, বহুলীকতা হোন্তি, অলঙ্কাৰা হোন্তি, পৰিক্খাৰা হোন্তি, পৰিৱাৰা হোন্তি, পাৰিপূৰী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৱিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৱত্থুকতা হোন্তি, অনুট্ঠিতা হোন্তি, পৰিচিতা হোন্তি, সুসমাৰদ্ধা হোন্তি, সুভাৱিতা হোন্তি, স্ৱাধিট্ঠিতা হোন্তি, সুসমুগ্গতা হোন্তি, সুৱিমুত্তা হোন্তি, নিব্বত্তেন্তি জোতেন্তি পতাপেন্তি.

৪. মগ্গঙ্গৱাৰো

২৬. সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা পস্সতি. সম্মাদিট্ঠিপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা অভিনিৰোপেতি. সম্মাসঙ্কপ্পপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা পৰিগ্গণ্হাতি. সম্মাৱাচাপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা সমুট্ঠাপেতি. সম্মাকম্মন্তপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা ৱোদাপেতি. সম্মাআজীৱপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা পগ্গণ্হাতি. সম্মাৱাযামপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা উপট্ঠাপেতি. সম্মাসতিপৰিভাৱিতা হোতি মেত্তাচেতোৱিমুত্তি.

সব্বে সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা সমাদহতি. সম্মাসমাধিপৰিভাৱিতা হোতি মেত্তাচেতোৱিমুত্তি.

ইমে অট্ঠ মগ্গঙ্গা মেত্তায চেতোৱিমুত্তিযা আসেৱনা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি আসেৱীযতি. ইমে অট্ঠ মগ্গঙ্গা মেত্তায চেতোৱিমুত্তিযা ভাৱনা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি ভাৱীযতি. ইমে অট্ঠ মগ্গঙ্গা মেত্তায চেতোৱিমুত্তিযা বহুলীকতা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি বহুলীকৰীযতি. ইমে অট্ঠ মগ্গঙ্গা মেত্তায চেতোৱিমুত্তিযা অলঙ্কাৰা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি স্ৱালঙ্কতা হোন্তি. ইমে অট্ঠ মগ্গঙ্গা মেত্তায চেতোৱিমুত্তিযা পৰিক্খাৰা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি সুপৰিক্খতা হোতি. ইমে অট্ঠ মগ্গঙ্গা মেত্তায চেতোৱিমুত্তিযা পৰিৱাৰা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি সুপৰিৱুতা হোতি. ইমে অট্ঠ মগ্গঙ্গা মেত্তায চেতোৱিমুত্তিযা আসেৱনা হোন্তি, ভাৱনা হোন্তি, বহুলীকতা হোন্তি, অলঙ্কাৰা হোন্তি, পৰিক্খাৰা হোন্তি, পৰিৱাৰা হোন্তি, পাৰিপূৰী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৱিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৱত্থুকতা হোন্তি, অনুট্ঠিতা হোন্তি, পৰিচিতা হোন্তি, সুসমাৰদ্ধা হোন্তি, সুভাৱিতা হোন্তি, স্ৱাধিট্ঠিতা হোন্তি, সুসমুগ্গতা হোন্তি, সুৱিমুত্তা হোন্তি নিব্বত্তেন্তি জোতেন্তি পতাপেন্তি.

২৭. সব্বেসং পাণানং…পে… সব্বেসং ভূতানং… সব্বেসং পুগ্গলানং… সব্বেসং অত্তভাৱপৰিযাপন্নানং… সব্বাসং ইত্থীনং… সব্বেসং পুৰিসানং… সব্বেসং অৰিযানং… সব্বেসং অনৰিযানং… সব্বেসং দেৱানং… সব্বেসং মনুস্সানং… সব্বেসং ৱিনিপাতিকানং পীড়নং ৱজ্জেত্ৱা অপীড়নায, উপঘাতং ৱজ্জেত্ৱা অনুপঘাতেন, সন্তাপং ৱজ্জেত্ৱা অসন্তাপেন, পৰিযাদানং ৱজ্জেত্ৱা অপৰিযাদানেন, ৱিহেসং ৱজ্জেত্ৱা অৱিহেসায, সব্বে ৱিনিপাতিকা অৱেৰিনো হোন্তু মা ৱেৰিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকাৰেহি সব্বে ৱিনিপাতিকে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপৰিযুট্ঠানেহি ৱিমুচ্চতীতি – ৱিমুত্তি. মেত্তা চ চেতো চ ৱিমুত্তি চাতি – মেত্তাচেতোৱিমুত্তি.

সব্বে ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্ৰিযপৰিভাৱিতা হোতি মেত্তাচেতোৱিমুত্তি…পে… নিব্বত্তেন্তি জোতেন্তি পতাপেন্তি.

সব্বেসং পুৰত্থিমায দিসায সত্তানং…পে… সব্বেসং পচ্ছিমায দিসায সত্তানং… সব্বেসং উত্তৰায দিসায সত্তানং… সব্বেসং দক্খিণায দিসায সত্তানং… সব্বেসং পুৰত্থিমায অনুদিসায সত্তানং… সব্বেসং পচ্ছিমায অনুদিসায সত্তানং… সব্বেসং উত্তৰায অনুদিসায সত্তানং… সব্বেসং দক্খিণায অনুদিসায সত্তানং… সব্বেসং হেট্ঠিমায দিসায সত্তানং… সব্বেসং উপৰিমায দিসায সত্তানং পীড়নং ৱজ্জেত্ৱা অপীড়নায, উপঘাতং ৱজ্জেত্ৱা অনুপঘাতেন, সন্তাপং ৱজ্জেত্ৱা অসন্তাপেন, পৰিযাদানং ৱজ্জেত্ৱা অপৰিযাদানেন, ৱিহেসং ৱজ্জেত্ৱা অৱিহেসায, সব্বে উপৰিমায দিসায সত্তা অৱেৰিনো হোন্তু মা ৱেৰিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকাৰেহি সব্বে উপৰিমায দিসায সত্তে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপৰিযুট্ঠানেহি ৱিমুচ্চতীতি – ৱিমুত্তি. মেত্তা চ চেতো চ ৱিমুত্তি চাতি – মেত্তাচেতোৱিমুত্তি.

সব্বে উপৰিমায দিসায সত্তা অৱেৰিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্ৰিযপৰিভাৱিতা হোতি মেত্তাচেতোৱিমুত্তি…পে… নিব্বত্তেন্তি জোতেন্তি পতাপেন্তি.

সব্বেসং পুৰত্থিমায দিসায পাণানং…পে… ভূতানং… পুগ্গলানং অত্তভাৱপৰিযাপন্নানং… সব্বাসং ইত্থীনং… সব্বেসং পুৰিসানং… সব্বেসং অৰিযানং… সব্বেসং অনৰিযানং… সব্বেসং দেৱানং… সব্বেসং মনুস্সানং… সব্বেসং ৱিনিপাতিকানং… সব্বেসং পচ্ছিমায দিসায ৱিনিপাতিকানং… সব্বেসং উত্তৰায দিসায ৱিনিপাতিকানং… সব্বেসং দক্খিণায দিসায ৱিনিপাতিকানং… সব্বেসং পুৰত্থিমায অনুদিসায ৱিনিপাতিকানং… সব্বেসং পচ্ছিমায অনুদিসায ৱিনিপাতিকানং… সব্বেসং উত্তৰায অনুদিসায ৱিনিপাতিকানং… সব্বেসং দক্খিণায অনুদিসায ৱিনিপাতিকানং… সব্বেসং হেট্ঠিমায দিসায ৱিনিপাতিকানং… সব্বেসং উপৰিমায দিসায ৱিনিপাতিকানং পীড়নং ৱজ্জেত্ৱা অপীড়নায, উপঘাতং ৱজ্জেত্ৱা অনুপঘাতেন, সন্তাপং ৱজ্জেত্ৱা অসন্তাপেন, পৰিযাদানং ৱজ্জেত্ৱা অপৰিযাদানেন, ৱিহেসং ৱজ্জেত্ৱা অৱিহেসায, সব্বে উপৰিমায দিসায ৱিনিপাতিকা অৱেৰিনো হোন্তু মা ৱেৰিনো, সুখিনো হোন্তু মা দুক্খিনো, সুখিতত্তা হোন্তু মা দুক্খিতত্তাতি – ইমেহি অট্ঠহাকাৰেহি সব্বে উপৰিমায দিসায ৱিনিপাতিকে মেত্তাযতীতি – মেত্তা. তং ধম্মং চেতযতীতি – চেতো. সব্বব্যাপাদপৰিযুট্ঠানেহি ৱিমুচ্চতীতি – ৱিমুত্তি. মেত্তা চ চেতো চ ৱিমুত্তি চাতি – মেত্তাচেতোৱিমুত্তি.

সব্বে উপৰিমায দিসায ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – সদ্ধায অধিমুচ্চতি. সদ্ধিন্দ্ৰিযপৰিভাৱিতা হোতি মেত্তাচেতোৱিমুত্তি.

সব্বে উপৰিমায দিসায ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – ৱীৰিযং পগ্গণ্হাতি. ৱীৰিযিন্দ্ৰিযপৰিভাৱিতা হোতি মেত্তাচেতোৱিমুত্তি.

সতিং উপট্ঠাপেতি. সতিন্দ্ৰিযপৰিভাৱিতা হোতি মেত্তাচেতোৱিমুত্তি. চিত্তং সমাদহতি. সমাধিন্দ্ৰিযপৰিভাৱিতা হোতি মেত্তাচেতোৱিমুত্তি. পঞ্ঞায পজানাতি. পঞ্ঞিন্দ্ৰিযপৰিভাৱিতা হোতি মেত্তাচেতোৱিমুত্তি.

ইমানি পঞ্চিন্দ্ৰিযানি মেত্তায চেতোৱিমুত্তিযা আসেৱনা হোন্তি. ইমেহি পঞ্চহি ইন্দ্ৰিযেহি মেত্তাচেতোৱিমুত্তি আসেৱীযতি…পে… নিব্বত্তেন্তি জোতেন্তি পতাপেন্তি.

সব্বে উপৰিমায দিসায ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – অস্সদ্ধিযে ন কম্পতি. সদ্ধাবলপৰিভাৱিতা হোতি মেত্তাচেতোৱিমুত্তি. কোসজ্জে ন কম্পতি. ৱীৰিযবলপৰিভাৱিতা হোতি মেত্তাচেতোৱিমুত্তি. পমাদে ন কম্পতি. সতিবলপৰিভাৱিতা হোতি মেত্তাচেতোৱিমুত্তি. উদ্ধচ্চে ন কম্পতি. সমাধিবলপৰিভাৱিতা হোতি মেত্তাচেতোৱিমুত্তি. অৱিজ্জায ন কম্পতি. পঞ্ঞাবলপৰিভাৱিতা হোতি মেত্তাচেতোৱিমুত্তি.

ইমানি পঞ্চ বলানি মেত্তায চেতোৱিমুত্তিযা আসেৱনা হোন্তি. ইমেহি পঞ্চহি বলেহি মেত্তাচেতোৱিমুত্তি আসেৱীযতি…পে… নিব্বত্তেন্তি জোতেন্তি পতাপেন্তি.

সব্বে উপৰিমায দিসায ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – সতিং উপট্ঠাপেতি. সতিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

পঞ্ঞায পৱিচিনাতি. ধম্মৱিচযসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি. ৱীৰিযং পগ্গণ্হাতি. ৱীৰিযসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি. পৰিড়াহং পটিপ্পস্সম্ভেতি. পীতিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি. দুট্ঠুল্লং পটিপ্পস্সম্ভেতি. পস্সদ্ধিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি. চিত্তং সমাদহতি. সমাধিসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি. ঞাণেন কিলেসে পটিসঙ্খাতি. উপেক্খাসম্বোজ্ঝঙ্গপৰিভাৱিতা হোতি মেত্তাচেতোৱিমুত্তি.

ইমে সত্ত বোজ্ঝঙ্গা মেত্তায চেতোৱিমুত্তিযা আসেৱনা হোন্তি. ইমেহি সত্তহি বোজ্ঝঙ্গেহি মেত্তাচেতোৱিমুত্তি আসেৱীযতি…পে… নিব্বত্তেন্তি জোতেন্তি পতাপেন্তি.

সব্বে উপৰিমায দিসায ৱিনিপাতিকা অৱেৰিনো হোন্তু, খেমিনো হোন্তু, সুখিনো হোন্তূতি – সম্মা পস্সতি. সম্মাদিট্ঠি পৰিভাৱিতা হোতি মেত্তাচেতোৱিমুত্তি. সম্মা অভিনিৰোপেতি. সম্মাসঙ্কপ্পপৰিভাৱিতা হোতি মেত্তাচেতোৱিমুত্তি. সম্মা পৰিগ্গণ্হাতি. সম্মাৱাচাপৰিভাৱিতা হোতি মেত্তাচেতোৱিমুত্তি. সম্মা সমুট্ঠাপেতি. সম্মাকম্মন্তপৰিভাৱিতা হোতি মেত্তাচেতোৱিমুত্তি. সম্মা ৱোদাপেতি. সম্মা আজীৱপৰিভাৱিতা হোতি মেত্তাচেতোৱিমুত্তি. সম্মা পগ্গণ্হাতি. সম্মাৱাযামপৰিভাৱিতা হোতি মেত্তাচেতোৱিমুত্তি. সম্মা উপট্ঠাতি. সম্মাসতিপৰিভাৱিতা হোতি মেত্তাচেতোৱিমুত্তি. সম্মা সমাদহতি. সম্মাসমাধিপৰিভাৱিতা হোতি মেত্তাচেতোৱিমুত্তি.

ইমে অট্ঠ মগ্গঙ্গা মেত্তায চেতোৱিমুত্তিযা আসেৱনা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি আসেৱীযতি…পে… ইমে অট্ঠ মগ্গঙ্গা মেত্তায চেতোৱিমুত্তিযা পৰিভাৱিতা হোন্তি. ইমেহি অট্ঠহি মগ্গঙ্গেহি মেত্তাচেতোৱিমুত্তি সুপৰিৱুতা হোতি. ইমে অট্ঠ মগ্গঙ্গা মেত্তায চেতোৱিমুত্তিযা আসেৱনা হোন্তি, ভাৱনা হোন্তি, বহুলীকতা হোন্তি, অলঙ্কাৰা হোন্তি, পৰিক্খাৰা হোন্তি, পৰিৱাৰা হোন্তি, পাৰিপূৰী হোন্তি, সহগতা হোন্তি, সহজাতা হোন্তি, সংসট্ঠা হোন্তি, সম্পযুত্তা হোন্তি, পক্খন্দনা হোন্তি, পসীদনা হোন্তি, সন্তিট্ঠনা হোন্তি, ৱিমুচ্চনা হোন্তি, ‘‘এতং সন্ত’’ন্তি ফস্সনা হোন্তি, যানীকতা হোন্তি, ৱত্থুকতা হোন্তি, অনুট্ঠিতা হোন্তি, পৰিচিতা হোন্তি, সুসমাৰদ্ধা হোন্তি, সুভাৱিতা হোন্তি, স্ৱাধিট্ঠিতা হোন্তি, সুসমুগ্গতা হোন্তি, সুৱিমুত্তা হোন্তি নিব্বত্তেন্তি জোতেন্তি পতাপেন্তীতি.

মেত্তাকথা নিট্ঠিতা.