১. অস্সাদদিট্ঠিনিদ্দেসো

১২৮. অস্সাদদিট্ঠিযা কতমেহি পঞ্চতিংসায আকাৰেহি অভিনিৱেসো হোতি? যং ৰূপং পটিচ্চ উপ্পজ্জতি সুখং সোমনস্সং, অযং ৰূপস্স অস্সাদোতি – অভিনিৱেসপৰামাসো দিট্ঠি. দিট্ঠি ন অস্সাদো, অস্সাদো ন দিট্ঠি. অঞ্ঞা দিট্ঠি, অঞ্ঞো অস্সাদো. যা চ দিট্ঠি যো চ অস্সাদো – অযং ৱুচ্চতি অস্সাদদিট্ঠি.

অস্সাদদিট্ঠি মিচ্ছাদিট্ঠি দিট্ঠিৱিপত্তি. তায দিট্ঠিৱিপত্তিযা সমন্নাগতো পুগ্গলো দিট্ঠিৱিপন্নো. দিট্ঠিৱিপন্নো পুগ্গলো ন সেৱিতব্বো ন ভজিতব্বো ন পযিৰুপাসিতব্বো. তং কিস্স হেতু? দিট্ঠি হিস্স পাপিকা. যো দিট্ঠিযা ৰাগো [যা দিট্ঠি যো ৰাগো (স্যা.)], সো ন দিট্ঠি. দিট্ঠি ন ৰাগো. অঞ্ঞা দিট্ঠি, অঞ্ঞো ৰাগো. যা চ দিট্ঠি যো চ ৰাগো – অযং ৱুচ্চতি দিট্ঠিৰাগো. তায চ দিট্ঠিযা তেন চ ৰাগেন সমন্নাগতো পুগ্গলো দিট্ঠিৰাগৰত্তো. দিট্ঠিৰাগৰত্তে পুগ্গলে দিন্নং দানং ন মহপ্ফলং হোতি ন মহানিসংসং. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠিকস্স পুৰিসপুগ্গলস্স দ্ৱেৱ গতিযো – নিৰযো ৱা তিৰচ্ছানযোনি ৱা. মিচ্ছাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং, যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স পাপিকা. সেয্যথাপি নিম্ববীজং ৱা কোসাতকীবীজং ৱা তিত্তকালাবুবীজং ৱা অল্লায পথৱিযা নিক্খিত্তং যং চেৱ পথৱিৰসং উপাদিযতি, যঞ্চ আপোৰসং উপাদিযতি, সব্বং তং তিত্তকত্তায কটুকত্তায অসাতত্তায [অসাৰতায (স্যা.)] সংৱত্ততি. তং কিস্স হেতু? বীজং হিস্স পাপিকং. এৱমেৱং মিচ্ছাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং, যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠি দিট্ঠিগতং, দিট্ঠিগহনং, দিট্ঠিকন্তাৰং, দিট্ঠিৱিসূকং, দিট্ঠিৱিপ্ফন্দিতং, দিট্ঠিসঞ্ঞোজনং, দিট্ঠিসল্লং, দিট্ঠিসম্বাধো, দিট্ঠিপলিবোধো, দিট্ঠিবন্ধনং, দিট্ঠিপপাতো, দিট্ঠানুসযো, দিট্ঠিসন্তাপো, দিট্ঠিপৰিড়াহো, দিট্ঠিগন্থো, দিট্ঠুপাদানং, দিট্ঠাভিনিৱেসো, দিট্ঠিপৰামাসো – ইমেহি অট্ঠাৰসহি আকাৰেহি পৰিযুট্ঠিতচিত্তস্স সঞ্ঞোগো.

১২৯. অত্থি সঞ্ঞোজনানি চেৱ দিট্ঠিযো চ, অত্থি সঞ্ঞোজনানি ন চ দিট্ঠিযো. কতমানি সঞ্ঞোজনানি চেৱ দিট্ঠিযো চ? সক্কাযদিট্ঠি, সীলব্বতপৰামাসো – ইমানি সঞ্ঞোজনানি চেৱ দিট্ঠিযো চ. কতমানি সঞ্ঞোজনানি, ন চ দিট্ঠিযো? কামৰাগসঞ্ঞোজনং, পটিঘসঞ্ঞোজনং, মানসঞ্ঞোজনং, ৱিচিকিচ্ছাসঞ্ঞোজনং, ভৱৰাগসঞ্ঞোজনং, ইস্সাসঞ্ঞোজনং, মচ্ছৰিযসঞ্ঞোজনং, অনুনযসঞ্ঞোজনং, অৱিজ্জাসঞ্ঞোজনং – ইমানি সঞ্ঞোজনানি, ন চ দিট্ঠিযো.

যং ৱেদনং পটিচ্চ…পে… যং সঞ্ঞং পটিচ্চ…পে… যং সঙ্খাৰে [যে সঙ্খাৰে (ক.) সং. নি. ৩.২৮ পস্সিতব্বা] পটিচ্চ…পে… যং ৱিঞ্ঞাণং পটিচ্চ… যং চক্খুং পটিচ্চ… যং সোতং পটিচ্চ… যং ঘানং পটিচ্চ… যং জিৱ্হং পটিচ্চ… যং কাযং পটিচ্চ… যং মনং পটিচ্চ… যং ৰূপে পটিচ্চ… যং সদ্দে পটিচ্চ… যং গন্ধে পটিচ্চ … যং ৰসে পটিচ্চ… যং ফোট্ঠব্বে পটিচ্চ… যং ধম্মে পটিচ্চ… যং চক্খুৱিঞ্ঞাণং পটিচ্চ… যং সোতৱিঞ্ঞাণং পটিচ্চ… যং ঘানৱিঞ্ঞাণং পটিচ্চ… যং জিৱ্হাৱিঞ্ঞাণং পটিচ্চ… যং কাযৱিঞ্ঞাণং পটিচ্চ… যং মনোৱিঞ্ঞাণং পটিচ্চ … যং চক্খুসম্ফস্সং পটিচ্চ… যং সোতসম্ফস্সং পটিচ্চ… যং ঘানসম্ফস্সং পটিচ্চ… যং জিৱ্হাসম্ফস্সং পটিচ্চ… যং কাযসম্ফস্সং পটিচ্চ… যং মনোসম্ফস্সং পটিচ্চ… যং চক্খুসম্ফস্সজং ৱেদনং পটিচ্চ… যং সোতসম্ফস্সজং ৱেদনং পটিচ্চ… যং ঘানসম্ফস্সজং ৱেদনং পটিচ্চ… যং জিৱ্হাসম্ফস্সজং ৱেদনং পটিচ্চ… যং কাযসম্ফস্সজং ৱেদনং পটিচ্চ… যং মনোসম্ফস্সজং ৱেদনং পটিচ্চ উপ্পজ্জতি সুখং সোমনস্সং, অযং মনোসম্ফস্সজায ৱেদনায অস্সাদোতি – অভিনিৱেসপৰামাসো দিট্ঠি. দিট্ঠি ন অস্সাদো, অস্সাদো ন দিট্ঠি. অঞ্ঞা দিট্ঠি, অঞ্ঞো অস্সাদো. যা চ দিট্ঠি যো চ অস্সাদো – অযং ৱুচ্চতি অস্সাদদিট্ঠি.

অস্সাদদিট্ঠি মিচ্ছাদিট্ঠি দিট্ঠিৱিপত্তি. তায দিট্ঠিৱিপত্তিযা সমন্নাগতো পুগ্গলো দিট্ঠিৱিপন্নো. দিট্ঠিৱিপন্নো পুগ্গলো ন সেৱিতব্বো ন ভজিতব্বো ন পযিৰুপাসিতব্বো. তং কিস্স হেতু? দিট্ঠি হিস্স পাপিকা. যো দিট্ঠিযা ৰাগো, সো ন দিট্ঠি. দিট্ঠি ন ৰাগো. অঞ্ঞা দিট্ঠি, অঞ্ঞো ৰাগো. যা চ দিট্ঠি যো চ ৰাগো, অযং ৱুচ্চতি দিট্ঠিৰাগো. তায চ দিট্ঠিযা তেন চ ৰাগেন সমন্নাগতো পুগ্গলো দিট্ঠিৰাগৰত্তো. দিট্ঠিৰাগৰত্তে পুগ্গলে দিন্নং দানং ন মহপ্ফলং হোতি ন মহানিসংসং. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠিকস্স পুৰিসপুগ্গলস্স দ্ৱেৱ গতিযো – নিৰযো ৱা তিৰচ্ছানযোনি ৱা. মিচ্ছাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং, যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স পাপিকা. সেয্যথাপি নিম্ববীজং ৱা কোসাতকীবীজং ৱা তিত্তকালাবুবীজং ৱা অল্লায পথৱিযা নিক্খিত্তং যঞ্চেৱ পথৱিৰসং উপাদিযতি যঞ্চ আপোৰসং উপাদিযতি, সব্বং তং তিত্তকত্তায কটুকত্তায অসাতত্তায সংৱত্ততি. তং কিস্স হেতু? বীজং হিস্স পাপিকং. এৱমেৱং মিচ্ছাদিট্ঠিকস্স পুৰিসপুগ্গলস্স যঞ্চেৱ কাযকম্মং যথাদিট্ঠি সমত্তং সমাদিন্নং যঞ্চ ৱচীকম্মং…পে… যঞ্চ মনোকম্মং যথাদিট্ঠি সমত্তং সমাদিন্নং, যা চ চেতনা যা চ পত্থনা যো চ পণিধি যে চ সঙ্খাৰা, সব্বে তে ধম্মা অনিট্ঠায অকন্তায অমনাপায অহিতায দুক্খায সংৱত্তন্তি. তং কিস্স হেতু? দিট্ঠি হিস্স পাপিকা অস্সাদদিট্ঠি মিচ্ছাদিট্ঠি.

মিচ্ছাদিট্ঠি দিট্ঠিগতং দিট্ঠিগহনং…পে… দিট্ঠাভিনিৱেসো দিট্ঠিপৰামাসো – ইমেহি অট্ঠাৰসহি আকাৰেহি পৰিযুট্ঠিতচিত্তস্স সঞ্ঞোগো.

অত্থি সঞ্ঞোজনানি চেৱ দিট্ঠিযো চ, অত্থি সঞ্ঞোজনানি ন চ দিট্ঠিযো. কতমানি সঞ্ঞোজনানি চেৱ দিট্ঠিযো চ? সক্কাযদিট্ঠি, সীলব্বতপৰামাসো – ইমানি সঞ্ঞোজনানি চেৱ দিট্ঠিযো চ. কতমানি সঞ্ঞোজনানি, ন চ দিট্ঠিযো? কামৰাগসঞ্ঞোজনং, পটিঘসঞ্ঞোজনং, মানসঞ্ঞোজনং, ৱিচিকিচ্ছাসঞ্ঞোজনং, ভৱৰাগসঞ্ঞোজনং, ইস্সাসঞ্ঞোজনং, মচ্ছৰিযসঞ্ঞোজনং, অনুনযসঞ্ঞোজনং, অৱিজ্জাসঞ্ঞোজনং – ইমানি সঞ্ঞোজনানি, ন চ দিট্ঠিযো. অস্সাদদিট্ঠিযা ইমেহি পঞ্চতিংসায আকাৰেহি অভিনিৱেসো হোতি.

অস্সাদদিট্ঠিনিদ্দেসো পঠমো.