৯. সঙ্খাৰুপেক্খাঞাণনিদ্দেসো

৫৪. কথং মুঞ্চিতুকম্যতাপটিসঙ্খাসন্তিট্ঠনা [মুচ্চিতুকম্যতাপটিসঙ্খাসন্তিট্ঠনা (ক.)] পঞ্ঞা সঙ্খাৰুপেক্খাসু ঞাণং? উপ্পাদং মুঞ্চিতুকম্যতাপটিসঙ্খাসন্তিট্ঠনা [উপ্পাদমুঞ্চিতুকম্যতা… (স্যা.)] পঞ্ঞা সঙ্খাৰুপেক্খাসু ঞাণং, পৱত্তং মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং, নিমিত্তং মুঞ্চিতুকম্যতা…পে… আযূহনং মুঞ্চিতুকম্যতা… পটিসন্ধিং মুঞ্চিতুকম্যতা… গতিং মুঞ্চিতুকম্যতা… নিব্বত্তিং মুঞ্চিতুকম্যতা… উপপত্তিং মুঞ্চিতুকম্যতা… জাতিং মুঞ্চিতুকম্যতা… জৰং মুঞ্চিতুকম্যতা… ব্যাধিং মুঞ্চিতুকম্যতা… মৰণং মুঞ্চিতুকম্যতা… সোকং মুঞ্চিতুকম্যতা… পৰিদেৱং মুঞ্চিতুকম্যতা…পে… উপাযাসং মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং.

উপ্পাদো দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. পৱত্তং দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং…পে… উপাযাসো দুক্খন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং.

উপ্পাদো ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. পৱত্তং ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং…পে… উপাযাসো ভযন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং.

উপ্পাদো সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. পৱত্তং সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং…পে… উপাযাসো সামিসন্তি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং.

উপ্পাদো সঙ্খাৰাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. পৱত্তং সঙ্খাৰাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং…পে… উপাযাসো সঙ্খাৰাতি – মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং.

উপ্পাদো সঙ্খাৰা, তে সঙ্খাৰে অজ্ঝুপেক্খতীতি – সঙ্খাৰুপেক্খা. যে চ সঙ্খাৰা যা চ উপেক্খা উভোপেতে সঙ্খাৰা, তে সঙ্খাৰে অজ্ঝুপেক্খতীতি – সঙ্খাৰুপেক্খা. পৱত্তং সঙ্খাৰা…পে… নিমিত্তং সঙ্খাৰা… আযূহনা সঙ্খাৰা… পটিসন্ধি সঙ্খাৰা… গতি সঙ্খাৰা… নিব্বত্তি সঙ্খাৰা… উপপত্তি সঙ্খাৰা… জাতি সঙ্খাৰা… জৰা সঙ্খাৰা… ব্যাধি সঙ্খাৰা… মৰণং সঙ্খাৰা… সোকো সঙ্খাৰা… পৰিদেৱো সঙ্খাৰা…পে… উপাযাসো সঙ্খাৰা, তে সঙ্খাৰে অজ্ঝুপেক্খতীতি – সঙ্খাৰুপেক্খা. যে চ সঙ্খাৰা যা চ উপেক্খা উভোপেতে সঙ্খাৰা, তে সঙ্খাৰে অজ্ঝুপেক্খতীতি – সঙ্খাৰুপেক্খা.

৫৫. কতিহাকাৰেহি সঙ্খাৰুপেক্খায চিত্তস্স অভিনীহাৰো হোতি? অট্ঠহাকাৰেহি সঙ্খাৰুপেক্খায চিত্তস্স অভিনীহাৰো হোতি. পুথুজ্জনস্স কতিহাকাৰেহি সঙ্খাৰুপেক্খায চিত্তস্স অভিনীহাৰো হোতি? সেক্খস্স কতিহাকাৰেহি সঙ্খাৰুপেক্খায চিত্তস্স অভিনীহাৰো হোতি? ৱীতৰাগস্স কতিহাকাৰেহি সঙ্খাৰুপেক্খায চিত্তস্স অভিনীহাৰো হোতি? পুথুজ্জনস্স দ্ৱীহাকাৰেহি সঙ্খাৰুপেক্খায চিত্তস্স অভিনীহাৰো হোতি. সেক্খস্স তীহাকাৰেহি সঙ্খাৰুপেক্খায চিত্তস্স অভিনীহাৰো হোতি. ৱীতৰাগস্স তীহাকাৰেহি সঙ্খাৰুপেক্খায চিত্তস্স অভিনীহাৰো হোতি.

পুথুজ্জনস্স কতমেহি দ্ৱীহাকাৰেহি সঙ্খাৰুপেক্খায চিত্তস্স অভিনীহাৰো হোতি? পুথুজ্জনো সঙ্খাৰুপেক্খং অভিনন্দতি ৱা ৱিপস্সতি ৱা. পুথুজ্জনস্স ইমেহি দ্ৱীহাকাৰেহি সঙ্খাৰুপেক্খায চিত্তস্স অভিনীহাৰো হোতি. সেক্খস্স কতমেহি তীহাকাৰেহি সঙ্খাৰুপেক্খায চিত্তস্স অভিনীহাৰো হোতি? সেক্খো সঙ্খাৰুপেক্খং অভিনন্দতি ৱা ৱিপস্সতি ৱা পটিসঙ্খায ৱা ফলসমাপত্তিং সমাপজ্জতি. সেক্খস্স ইমেহি তীহাকাৰেহি সঙ্খাৰুপেক্খায চিত্তস্স অভিনীহাৰো হোতি. ৱীতৰাগস্স কতমেহি তীহাকাৰেহি সঙ্খাৰুপেক্খায চিত্তস্স অভিনীহাৰো হোতি? ৱীতৰাগো সঙ্খাৰুপেক্খং ৱিপস্সতি ৱা পটিসঙ্খায ৱা ফলসমাপত্তিং সমাপজ্জতি, তদজ্ঝুপেক্খিত্ৱা সুঞ্ঞতৱিহাৰেন ৱা অনিমিত্তৱিহাৰেন ৱা অপ্পণিহিতৱিহাৰেন ৱা ৱিহৰতি. ৱীতৰাগস্স ইমেহি তীহাকাৰেহি সঙ্খাৰুপেক্খায চিত্তস্স অভিনীহাৰো হোতি.

৫৬. কথং পুথুজ্জনস্স চ সেক্খস্স চ সঙ্খাৰুপেক্খায চিত্তস্স অভিনীহাৰো একত্তং হোতি? পুথুজ্জনস্স সঙ্খাৰুপেক্খং অভিনন্দতো চিত্তং কিলিস্সতি, ভাৱনায পৰিপন্থো হোতি, পটিৱেধস্স অন্তৰাযো হোতি, আযতিং পটিসন্ধিযা পচ্চযো হোতি. সেক্খস্সপি সঙ্খাৰুপেক্খং অভিনন্দতো চিত্তং কিলিস্সতি, ভাৱনায পৰিপন্থো হোতি, উত্তৰিপটিৱেধস্স অন্তৰাযো হোতি, আযতিং পটিসন্ধিযা পচ্চযো হোতি. এৱং পুথুজ্জনস্স চ সেক্খস্স চ সঙ্খাৰুপেক্খায চিত্তস্স অভিনীহাৰো একত্তং হোতি অভিনন্দট্ঠেন.

কথং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো একত্তং হোতি? পুথুজ্জনো সঙ্খাৰুপেক্খং অনিচ্চতোপি দুক্খতোপি অনত্ততোপি ৱিপস্সতি. সেক্খোপি সঙ্খাৰুপেক্খং অনিচ্চতোপি দুক্খতোপি অনত্ততোপি ৱিপস্সতি. ৱীতৰাগোপি সঙ্খাৰুপেক্খং অনিচ্চতোপি দুক্খতোপি অনত্ততোপি ৱিপস্সতি. এৱং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো একত্তং হোতি অনুপস্সনট্ঠেন.

কথং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি? পুথুজ্জনস্স সঙ্খাৰুপেক্খা কুসলা হোতি. সেক্খস্সপি সঙ্খাৰুপেক্খা কুসলা হোতি. ৱীতৰাগস্স সঙ্খাৰুপেক্খা অব্যাকতা হোতি. এৱং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি কুসলাব্যাকতট্ঠেন.

কথং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি? পুথুজ্জনস্স সঙ্খাৰুপেক্খা কিঞ্চিকালে সুৱিদিতা হোতি, কিঞ্চিকালে ন সুৱিদিতা হোতি. সেক্খস্সপি সঙ্খাৰুপেক্খা কিঞ্চিকালে সুৱিদিতা হোতি, কিঞ্চিকালে ন সুৱিদিতা হোতি. ৱীতৰাগস্স সঙ্খাৰুপেক্খা অচ্চন্তং সুৱিদিতা হোতি. এৱং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি ৱিদিতট্ঠেন চ অৱিদিতট্ঠেন চ.

কথং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি? পুথুজ্জনো সঙ্খাৰুপেক্খং অতিত্তত্তা ৱিপস্সতি. সেক্খোপি সঙ্খাৰুপেক্খং অতিত্তত্তা ৱিপস্সতি. ৱীতৰাগো সঙ্খাৰুপেক্খং তিত্তত্তা ৱিপস্সতি. এৱং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি তিত্তট্ঠেন চ অতিত্তট্ঠেন চ.

কথং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি? পুথুজ্জনো সঙ্খাৰুপেক্খং তিণ্ণং সংযোজনানং পহানায সোতাপত্তিমগ্গং পটিলাভত্থায ৱিপস্সতি. সেক্খো সঙ্খাৰুপেক্খং তিণ্ণং সঞ্ঞোজনানং পহীনত্তা উত্তৰিপটিলাভত্থায ৱিপস্সতি. ৱীতৰাগো সঙ্খাৰুপেক্খং সব্বকিলেসানং পহীনত্তা দিট্ঠধম্মসুখৱিহাৰত্থায ৱিপস্সতি. এৱং পুথুজ্জনস্স চ সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি পহীনট্ঠেন চ অপ্পহীনট্ঠেন চ.

কথং সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি? সেক্খো সঙ্খাৰুপেক্খং অভিনন্দতি ৱা ৱিপস্সতি ৱা পটিসঙ্খায ৱা ফলসমাপত্তিং সমাপজ্জতি. ৱীতৰাগো সঙ্খাৰুপেক্খং ৱিপস্সতি ৱা পটিসঙ্খায ৱা ফলসমাপত্তিং সমাপজ্জতি, তদজ্ঝুপেক্খিত্ৱা সুঞ্ঞতৱিহাৰেন ৱা অনিমিত্তৱিহাৰেন ৱা অপ্পণিহিতৱিহাৰেন ৱা ৱিহৰতি. এৱং সেক্খস্স চ ৱীতৰাগস্স চ সঙ্খাৰুপেক্খায চিত্তস্স অভিনীহাৰো নানত্তং হোতি ৱিহাৰসমাপত্তট্ঠেন.

৫৭. কতি সঙ্খাৰুপেক্খা সমথৱসেন উপ্পজ্জন্তি? কতি সঙ্খাৰুপেক্খা ৱিপস্সনাৱসেন উপ্পজ্জন্তি? অট্ঠ সঙ্খাৰুপেক্খা সমথৱসেন উপ্পজ্জন্তি. দস সঙ্খাৰুপেক্খা ৱিপস্সনাৱসেন উপ্পজ্জন্তি.

কতমা অট্ঠ সঙ্খাৰুপেক্খা সমথৱসেন উপ্পজ্জন্তি? পঠমং ঝানং পটিলাভত্থায নীৱৰণে পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. দুতিযং ঝানং পটিলাভত্থায ৱিতক্কৱিচাৰে পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. ততিযং ঝানং পটিলাভত্থায পীতিং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. চতুত্থং ঝানং পটিলাভত্থায সুখদুক্খে পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. আকাসানঞ্চাযতনসমাপত্তিং পটিলাভত্থায ৰূপসঞ্ঞং পটিঘসঞ্ঞং নানত্তসঞ্ঞং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. ৱিঞ্ঞাণঞ্চাযতনসমাপত্তিং পটিলাভত্থায আকাসানঞ্চাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. আকিঞ্চঞ্ঞাযতনসমাপত্তিং পটিলাভত্থায ৱিঞ্ঞাণঞ্চাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. নেৱসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. ইমা অট্ঠ সঙ্খাৰুপেক্খা সমথৱসেন উপ্পজ্জন্তি.

কতমা দস সঙ্খাৰুপেক্খা ৱিপস্সনাৱসেন উপ্পজ্জন্তি? সোতাপত্তিমগ্গং পটিলাভত্থায উপ্পাদং পৱত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জৰং ব্যাধিং মৰণং সোকং পৰিদেৱং উপাযাসং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. সোতাপত্তিফলসমাপত্তত্থায উপ্পাদং পৱত্তং নিমিত্তং আযূহনং পটিসন্ধিং…পে… পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. সকদাগামিমগ্গং পটিলাভত্থায…পে… সকদাগামিফলসমাপত্তত্থায…পে… অনাগামিমগ্গং পটিলাভত্থায…পে… অনাগামিফলসমাপত্তত্থায …পে… অৰহত্তমগ্গং পটিলাভত্থায উপ্পাদং পৱত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জৰং ব্যাধিং মৰণং সোকং পৰিদেৱং উপাযাসং পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. অৰহত্তফলসমাপত্তত্থায…পে… সুঞ্ঞতৱিহাৰসমাপত্তত্থায…পে… অনিমিত্তৱিহাৰসমাপত্তত্থায উপ্পাদং পৱত্তং নিমিত্তং আযূহনং পটিসন্ধিং…পে… পটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং. ইমা দস সঙ্খাৰুপেক্খা ৱিপস্সনাৱসেন উপ্পজ্জন্তি.

৫৮. কতি সঙ্খাৰুপেক্খা কুসলা, কতি অকুসলা, কতি অব্যাকতা? পন্নৰস সঙ্খাৰুপেক্খা কুসলা, তিস্সো সঙ্খাৰুপেক্খা অব্যাকতা. নত্থি সঙ্খাৰুপেক্খা অকুসলা.

পটিসঙ্খাসন্তিট্ঠনা পঞ্ঞা, অট্ঠ চিত্তস্স গোচৰা;

পুথুজ্জনস্স দ্ৱে হোন্তি, তযো সেক্খস্স গোচৰা;

তযো চ ৱীতৰাগস্স, যেহি চিত্তং ৱিৱট্টতি.

অট্ঠ সমাধিস্স পচ্চযা, দস ঞাণস্স গোচৰা;

অট্ঠাৰস সঙ্খাৰুপেক্খা, তিণ্ণং ৱিমোক্খান পচ্চযা.

ইমে অট্ঠাৰসাকাৰা, পঞ্ঞা যস্স পৰিচ্চিতা;

কুসলো সঙ্খাৰুপেক্খাসু, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘মুঞ্চিতুকম্যতাপটিসঙ্খাসন্তিট্ঠনা পঞ্ঞা সঙ্খাৰুপেক্খাসু ঞাণং’’.

সঙ্খাৰুপেক্খাঞাণনিদ্দেসো নৱমো.