১০. গোত্ৰভুঞাণনিদ্দেসো

৫৯. কথং বহিদ্ধা ৱুট্ঠানৱিৱট্টনে পঞ্ঞা গোত্ৰভুঞাণং? উপ্পাদং অভিভুয্যতীতি – গোত্ৰভু. পৱত্তং অভিভুয্যতীতি – গোত্ৰভু. নিমিত্তং অভিভুয্যতীতি – গোত্ৰভু. আযূহনং অভিভুয্যতীতি – গোত্ৰভু. পটিসন্ধিং অভিভুয্যতীতি – গোত্ৰভু. গতিং অভিভুয্যতীতি – গোত্ৰভু. নিব্বত্তিং অভিভুয্যতীতি – গোত্ৰভু. উপপত্তিং অভিভুয্যতীতি – গোত্ৰভু. জাতিং অভিভুয্যতীতি – গোত্ৰভু. জৰং অভিভুয্যতীতি – গোত্ৰভু. ব্যাধিং অভিভুয্যতীতি – গোত্ৰভু. মৰণং অভিভুয্যতীতি – গোত্ৰভু. সোকং অভিভুয্যতীতি – গোত্ৰভু. পৰিদেৱং অভিভুয্যতীতি – গোত্ৰভু. উপাযাসং অভিভুয্যতীতি – গোত্ৰভু. বহিদ্ধা সঙ্খাৰনিমিত্তং অভিভুয্যতীতি – গোত্ৰভু. অনুপ্পাদং পক্খন্দতীতি – গোত্ৰভু. অপ্পৱত্তং পক্খন্দতীতি – গোত্ৰভু…পে… নিৰোধং নিব্বানং পক্খন্দতীতি – গোত্ৰভু.

উপ্পাদং অভিভুয্যিত্ৱা অনুপ্পাদং পক্খন্দতীতি – গোত্ৰভু. পৱত্তং অভিভুয্যিত্ৱা অপ্পৱত্তং পক্খন্দতীতি – গোত্ৰভু. নিমিত্তং অভিভুয্যিত্ৱা অনিমিত্তং পক্খন্দতীতি – গোত্ৰভু …পে… বহিদ্ধা সঙ্খাৰনিমিত্তং অভিভুয্যিত্ৱা নিৰোধং নিব্বানং পক্খন্দতীতি – গোত্ৰভু.

উপ্পাদা ৱুট্ঠাতীতি – গোত্ৰভু. পৱত্তা ৱুট্ঠাতীতি – গোত্ৰভু. নিমিত্তা ৱুট্ঠাতীতি – গোত্ৰভু. আযূহনা ৱুট্ঠাতীতি – গোত্ৰভু. পটিসন্ধিযা ৱুট্ঠাতীতি – গোত্ৰভু. গতিযা ৱুট্ঠাতীতি – গোত্ৰভু. নিব্বত্তিযা ৱুট্ঠাতীতি – গোত্ৰভু. উপপত্তিযা ৱুট্ঠাতীতি – গোত্ৰভু. জাতিযা ৱুট্ঠাতীতি – গোত্ৰভু. জৰায ৱুট্ঠাতীতি – গোত্ৰভু. ব্যাধিম্হা ৱুট্ঠাতীতি – গোত্ৰভু. মৰণা ৱুট্ঠাতীতি – গোত্ৰভু. সোকা ৱুট্ঠাতীতি – গোত্ৰভু. পৰিদেৱা ৱুট্ঠাতীতি – গোত্ৰভু. উপাযাসা ৱুট্ঠাতীতি – গোত্ৰভু. বহিদ্ধা সঙ্খাৰনিমিত্তা ৱুট্ঠাতীতি – গোত্ৰভু. অনুপ্পাদং পক্খন্দতীতি – গোত্ৰভু. অপ্পৱত্তং পক্খন্দতীতি – গোত্ৰভু…পে… নিৰোধং নিব্বানং পক্খন্দতীতি – গোত্ৰভু.

উপ্পাদা ৱুট্ঠহিত্ৱা [ৱুট্ঠিত্ৱা (স্যা. ক.)] অনুপ্পাদং পক্খন্দতীতি – গোত্ৰভু. পৱত্তা ৱুট্ঠহিত্ৱা অপ্পৱত্তং পক্খন্দতীতি – গোত্ৰভু. নিমিত্তা ৱুট্ঠহিত্ৱা অনিমিত্তং পক্খন্দতীতি – গোত্ৰভু. আযূহনা ৱুট্ঠহিত্ৱা অনাযূহনং পক্খন্দতীতি – গোত্ৰভু. পটিসন্ধিযা ৱুট্ঠহিত্ৱা অপ্পটিসন্ধিং পক্খন্দতীতি – গোত্ৰভু. গতিযা ৱুট্ঠহিত্ৱা অগতিং পক্খন্দতীতি – গোত্ৰভু. নিব্বত্তিযা ৱুট্ঠহিত্ৱা অনিব্বত্তিং পক্খন্দতীতি – গোত্ৰভু. উপপত্তিযা ৱুট্ঠহিত্ৱা অনুপপত্তিং পক্খন্দতীতি – গোত্ৰভু. জাতিযা ৱুট্ঠহিত্ৱা অজাতিং পক্খন্দতীতি – গোত্ৰভু. জৰায ৱুট্ঠহিত্ৱা অজৰং পক্খন্দতীতি – গোত্ৰভু. ব্যাধিম্হা ৱুট্ঠহিত্ৱা অব্যাধিং পক্খন্দতীতি – গোত্ৰভু. মৰণা ৱুট্ঠহিত্ৱা অমতং পক্খন্দতীতি – গোত্ৰভু. সোকা ৱুট্ঠহিত্ৱা অসোকং পক্খন্দতীতি – গোত্ৰভু. পৰিদেৱা ৱুট্ঠহিত্ৱা অপৰিদেৱং পক্খন্দতীতি – গোত্ৰভু. উপাযাসা ৱুট্ঠহিত্ৱা অনুপাযাসং পক্খন্দতীতি – গোত্ৰভু. বহিদ্ধা সঙ্খাৰনিমিত্তা ৱুট্ঠহিত্ৱা নিৰোধং নিব্বানং পক্খন্দতীতি – গোত্ৰভু.

উপ্পাদা ৱিৱট্টতীতি – গোত্ৰভু. পৱত্তা ৱিৱট্টতীতি – গোত্ৰভু…পে… বহিদ্ধা সঙ্খাৰনিমিত্তা ৱিৱট্টতীতি – গোত্ৰভু. অনুপ্পাদং পক্খন্দতীতি – গোত্ৰভু. অপ্পৱত্তং পক্খন্দতীতি – গোত্ৰভু…পে… নিৰোধং নিব্বানং পক্খন্দতীতি – গোত্ৰভু.

উপ্পাদা ৱিৱট্টিত্ৱা অনুপ্পাদং পক্খন্দতীতি – গোত্ৰভু. পৱত্তা ৱিৱট্টিত্ৱা অপ্পৱত্তং পক্খন্দতীতি – গোত্ৰভু…পে… বহিদ্ধা সঙ্খাৰনিমিত্তা ৱিৱট্টিত্ৱা নিৰোধং নিব্বানং পক্খন্দতীতি – গোত্ৰভু.

৬০. কতি গোত্ৰভূ ধম্মা সমথৱসেন উপ্পজ্জন্তি? কতি গোত্ৰভূ ধম্মা ৱিপস্সনাৱসেন উপ্পজ্জন্তি? অট্ঠ গোত্ৰভূ ধম্মা সমথৱসেন উপ্পজ্জন্তি. দস গোত্ৰভূ ধম্মা ৱিপস্সনাৱসেন উপ্পজ্জন্তি.

কতমে অট্ঠ গোত্ৰভূ ধম্মা সমথৱসেন উপ্পজ্জন্তি? পঠমং ঝানং পটিলাভত্থায নীৱৰণে অভিভুয্যতীতি – গোত্ৰভু. দুতিযং ঝানং পটিলাভত্থায ৱিতক্কৱিচাৰে অভিভুয্যতীতি – গোত্ৰভু. ততিযং ঝানং পটিলাভত্থায পীতিং অভিভুয্যতীতি – গোত্ৰভু. চতুত্থং ঝানং পটিলাভত্থায সুখদুক্খে অভিভুয্যতীতি – গোত্ৰভু. আকাসানঞ্চাযতনসমাপত্তিং পটিলাভত্থায ৰূপসঞ্ঞং পটিঘসঞ্ঞং নানত্তসঞ্ঞং অভিভুয্যতীতি – গোত্ৰভু. ৱিঞ্ঞাণঞ্চাযতনসমাপত্তিং পটিলাভত্থায আকাসানঞ্চাযতনসঞ্ঞং অভিভুয্যতীতি – গোত্ৰভু. আকিঞ্চঞ্ঞাযতনসমাপত্তিং পটিলাভত্থায ৱিঞ্ঞাণঞ্চাযতনসঞ্ঞং অভিভুয্যতীতি – গোত্ৰভু. নেৱসঞ্ঞানাসঞ্ঞাযতনসমাপত্তিং পটিলাভত্থায আকিঞ্চঞ্ঞাযতনসঞ্ঞং অভিভুয্যতীতি – গোত্ৰভু. ইমে অট্ঠ গোত্ৰভূ ধম্মা সমথৱসেন উপ্পজ্জন্তি.

কতমে দস গোত্ৰভূ ধম্মা ৱিপস্সনাৱসেন উপ্পজ্জন্তি? সোতাপত্তিমগ্গং পটিলাভত্থায উপ্পাদং পৱত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জৰং ব্যাধিং মৰণং সোকং পৰিদেৱং উপাযাসং বহিদ্ধা সঙ্খাৰনিমিত্তং অভিভুয্যতীতি – গোত্ৰভু. সোতাপত্তিফলসমাপত্তত্থায উপ্পাদং পৱত্তং নিমিত্তং আযূহনং পটিসন্ধিং…পে… অভিভুয্যতীতি – গোত্ৰভু. সকদাগামিমগ্গং পটিলাভত্থায…পে… সকদাগামিফলসমাপত্তত্থায… অনাগামিমগ্গং পটিলাভত্থায… অনাগামিফলসমাপত্তত্থায… অৰহত্তমগ্গং পটিলাভত্থায উপ্পাদং পৱত্তং নিমিত্তং আযূহনং পটিসন্ধিং গতিং নিব্বত্তিং উপপত্তিং জাতিং জৰং ব্যাধিং মৰণং সোকং পৰিদেৱং উপাযাসং বহিদ্ধা সঙ্খাৰনিমিত্তং অভিভুয্যতীতি – গোত্ৰভু. অৰহত্তফলসমাপত্তত্থায… সুঞ্ঞতৱিহাৰসমাপত্তত্থায… অনিমিত্তৱিহাৰসমাপত্তত্থায উপ্পাদং পৱত্তং নিমিত্তং আযূহনং পটিসন্ধিং…পে… অভিভুয্যতীতি – গোত্ৰভু. ইমে দস গোত্ৰভূ ধম্মা ৱিপস্সনাৱসেন উপ্পজ্জন্তি.

কতি গোত্ৰভূ ধম্মা কুসলা, কতি অকুসলা, কতি অব্যাকতা? পন্নৰস গোত্ৰভূ ধম্মা কুসলা, তযো গোত্ৰভূ ধম্মা অব্যাকতা. নত্থি গোত্ৰভূ ধম্মা অকুসলাতি.

সামিসঞ্চ নিৰামিসং, পণিহিতঞ্চ অপ্পণিহিতং;

সঞ্ঞুত্তঞ্চ ৱিসঞ্ঞুত্তং, ৱুট্ঠিতঞ্চ অৱুট্ঠিতং.

অট্ঠ সমাধিস্স পচ্চযা, দস ঞাণস্স গোচৰা;

অট্ঠাৰস গোত্ৰভূ ধম্মা, তিণ্ণং ৱিমোক্খান পচ্চযা.

ইমে অট্ঠাৰসাকাৰা, পঞ্ঞা যস্স পৰিচ্চিতা;

কুসলো ৱিৱট্টে ৱুট্ঠানে, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘বহিদ্ধা ৱুট্ঠানৱিৱট্টনে পঞ্ঞা গোত্ৰভুঞাণং’’.

গোত্ৰভুঞাণনিদ্দেসো দসমো.