১১. মগ্গঞাণনিদ্দেসো

৬১. কথং দুভতো ৱুট্ঠানৱিৱট্টনে পঞ্ঞা মগ্গে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’. অভিনিৰোপনট্ঠেন সম্মাসঙ্কপ্পো মিচ্ছাসঙ্কপ্পা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

পৰিগ্গহট্ঠেন সম্মাৱাচা মিচ্ছাৱাচায ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

সমুট্ঠানট্ঠেন সম্মাকম্মন্তো মিচ্ছাকম্মন্তা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

ৱোদানট্ঠেন সম্মাআজীৱো মিচ্ছাআজীৱা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

পগ্গহট্ঠেন সম্মাৱাযামো মিচ্ছাৱাযামা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

উপট্ঠানট্ঠেন সম্মাসতি মিচ্ছাসতিযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

অৱিক্খেপট্ঠেন সম্মাসমাধি মিচ্ছাসমাধিতো ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

সকদাগামিমগ্গক্খণে দস্সনট্ঠেন সম্মাদিট্ঠি …পে… অৱিক্খেপট্ঠেন সম্মাসমাধি ওড়াৰিকা কামৰাগসঞ্ঞোজনা পটিঘসঞ্ঞোজনা ওড়াৰিকা কামৰাগানুসযা পটিঘানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

অনাগামিমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি অনুসহগতা কামৰাগসঞ্ঞোজনা পটিঘসঞ্ঞোজনা অনুসহগতা কামৰাগানুসযা পটিঘানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

অৰহত্তমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি ৰূপৰাগা অৰূপৰাগা মানা উদ্ধচ্চা অৱিজ্জায মানানুসযা ভৱৰাগানুসযা অৱিজ্জানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

৬২. অজাতং ঝাপেতি জাতেন, ঝানং তেন পৱুচ্চতি;

ঝানৱিমোক্খে কুসলতা, নানাদিট্ঠীসু ন কম্পতি.

সমাদহিত্ৱা যথা চে ৱিপস্সতি, ৱিপস্সমানো তথা চে সমাদহে;

ৱিপস্সনা চ সমথো তদা অহু, সমানভাগা যুগনদ্ধা ৱত্তৰে.

দুক্খা সঙ্খাৰা সুখো, নিৰোধো ইতি দস্সনং [নিৰোধোতি দস্সনং (স্যা. ক.)];

দুভতো ৱুট্ঠিতা পঞ্ঞা, ফস্সেতি অমতং পদং.

ৱিমোক্খচৰিযং জানাতি, নানত্তেকত্তকোৱিদো;

দ্ৱিন্নং ঞাণানং কুসলতা, নানাদিট্ঠীসু ন কম্পতীতি.

তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘দুভতো ৱুট্ঠানৱিৱট্টনে পঞ্ঞা মগ্গে ঞাণং’’.

মগ্গঞাণনিদ্দেসো একাদসমো.