১২. ফলঞাণনিদ্দেসো

৬৩. কথং পযোগপ্পটিপ্পস্সদ্ধিপঞ্ঞা ফলে ঞাণং? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাদিট্ঠি. মগ্গস্সেতং ফলং.

অভিনিৰোপনট্ঠেন সম্মাসঙ্কপ্পো মিচ্ছাসঙ্কপ্পা ৱুট্ঠাতি তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসঙ্কপ্পো. মগ্গস্সেতং ফলং.

পৰিগ্গহট্ঠেন সম্মাৱাচা মিচ্ছাৱাচায ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাৱাচা. মগ্গস্সেতং ফলং.

সমুট্ঠানট্ঠেন সম্মাকম্মন্তো মিচ্ছাকম্মন্তা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাকম্মন্তো. মগ্গস্সেতং ফলং.

ৱোদানট্ঠেন সম্মাআজীৱো মিচ্ছাআজীৱা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাআজীৱো. মগ্গস্সেতং ফলং.

পগ্গহট্ঠেন সম্মাৱাযামো মিচ্ছাৱাযামা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাৱাযামো. মগ্গস্সেতং ফলং.

উপট্ঠানট্ঠেন সম্মাসতি মিচ্ছাসতিযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসতি. মগ্গস্সেতং ফলং.

অৱিক্খেপট্ঠেন সম্মাসমাধি মিচ্ছাসমাধিতো ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

সকদাগামিমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি ওড়াৰিকা কামৰাগসঞ্ঞোজনা পটিঘসঞ্ঞোজনা ওড়াৰিকা কামৰাগানুসযা পটিঘানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

অনাগামিমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি অনুসহগতা কামৰাগসঞ্ঞোজনা পটিঘসঞ্ঞোজনা অনুসহগতা কামৰাগানুসযা পটিঘানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং.

অৰহত্তমগ্গক্খণে দস্সনট্ঠেন সম্মাদিট্ঠি…পে… অৱিক্খেপট্ঠেন সম্মাসমাধি ৰূপৰাগা অৰূপৰাগা মানা উদ্ধচ্চা অৱিজ্জায মানানুসযা ভৱৰাগানুসযা অৱিজ্জানুসযা ৱুট্ঠাতি, তদনুৱত্তককিলেসেহি চ খন্ধেহি চ ৱুট্ঠাতি, বহিদ্ধা চ সব্বনিমিত্তেহি ৱুট্ঠাতি. তংপযোগপ্পটিপ্পস্সদ্ধত্তা উপ্পজ্জতি সম্মাসমাধি. মগ্গস্সেতং ফলং. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘পযোগপ্পটিপ্পস্সদ্ধিপঞ্ঞা ফলে ঞাণং’’.

ফলঞাণনিদ্দেসো দ্ৱাদসমো.