৭০. যমকপাটিহীৰঞাণনিদ্দেসো

১১৬. কতমং তথাগতস্স যমকপাটিহীৰে ঞাণং? ইধ তথাগতো যমকপাটিহীৰং কৰোতি অসাধাৰণং সাৱকেহি. উপৰিমকাযতো অগ্গিক্খন্ধো পৱত্ততি, হেট্ঠিমকাযতো উদকধাৰা পৱত্ততি; হেট্ঠিমকাযতো অগ্গিক্খন্ধো পৱত্ততি, উপৰিমকাযতো উদকধাৰা পৱত্ততি; পুৰত্থিমকাযতো অগ্গিক্খন্ধো পৱত্ততি, পচ্ছিমকাযতো উদকধাৰা পৱত্ততি; পচ্ছিমকাযতো অগ্গিক্খন্ধো পৱত্ততি, পুৰত্থিমকাযতো উদকধাৰা পৱত্ততি; দক্খিণঅক্খিতো অগ্গিক্খন্ধো পৱত্ততি, ৱামঅক্খিতো উদকধাৰা পৱত্ততি; ৱামঅক্খিতো অগ্গিক্খন্ধো পৱত্ততি, দক্খিণঅক্খিতো উদকধাৰা পৱত্ততি; দক্খিণকণ্ণসোততো অগ্গিক্খন্ধো পৱত্ততি, ৱামকণ্ণসোততো উদকধাৰা পৱত্ততি; ৱামকণ্ণসোততো অগ্গিক্খন্ধো পৱত্ততি, দক্খিণকণ্ণসোততো উদকধাৰা পৱত্ততি; দক্খিণনাসিকাসোততো অগ্গিক্খন্ধো পৱত্ততি, ৱামনাসিকাসোততো উদকধাৰা পৱত্ততি; ৱামনাসিকাসোততো অগ্গিক্খন্ধো পৱত্ততি, দক্খিণনাসিকাসোততো উদকধাৰা পৱত্ততি; দক্খিণঅংসকূটতো অগ্গিক্খন্ধো পৱত্ততি, ৱামঅংসকূটতো উদকধাৰা পৱত্ততি; ৱামঅংসকূটতো অগ্গিক্খন্ধো পৱত্ততি, দক্খিণঅংসকূটতো উদকধাৰা পৱত্ততি; দক্খিণহত্থতো অগ্গিক্খন্ধো পৱত্ততি, ৱামহত্থতো উদকধাৰা পৱত্ততি; ৱামহত্থতো অগ্গিক্খন্ধো পৱত্ততি, দক্খিণহত্থতো উদকধাৰা পৱত্ততি; দক্খিণপস্সতো অগ্গিক্খন্ধো পৱত্ততি, ৱামপস্সতো উদকধাৰা পৱত্ততি; ৱামপস্সতো অগ্গিক্খন্ধো পৱত্ততি, দক্খিণপস্সতো উদকধাৰা পৱত্ততি; দক্খিণপাদতো অগ্গিক্খন্ধো পৱত্ততি, ৱামপাদতো উদকধাৰা পৱত্ততি; ৱামপাদতো অগ্গিক্খন্ধো পৱত্ততি, দক্খিণপাদতো উদকধাৰা পৱত্ততি; অঙ্গুলঙ্গুলেহি অগ্গিক্খন্ধো পৱত্ততি, অঙ্গুলন্তৰিকাহি উদকধাৰা পৱত্ততি; অঙ্গুলন্তৰিকাহি অগ্গিক্খন্ধো পৱত্ততি, অঙ্গুলঙ্গুলেহি উদকধাৰা পৱত্ততি; একেকলোমতো অগ্গিক্খন্ধো পৱত্ততি, একেকলোমতো উদকধাৰা পৱত্ততি; লোমকূপতো লোমকূপতো অগ্গিক্খন্ধো পৱত্ততি, লোমকূপতো লোমকূপতো উদকধাৰা পৱত্ততি.

ছন্নং ৱণ্ণানং – নীলানং, পীতকানং, লোহিতকানং, ওদাতানং, মঞ্জিট্ঠানং [মঞ্জেট্ঠানং (স্যা. ক.)], পভস্সৰানং ভগৱা চঙ্কমতি, নিম্মিতো তিট্ঠতি ৱা নিসীদতি ৱা সেয্যং ৱা কপ্পেতি. ভগৱা তিট্ঠতি, নিম্মিতো চঙ্কমতি ৱা নিসীদতি ৱা সেয্যং ৱা কপ্পেতি. ভগৱা নিসীদতি, নিম্মিতো চঙ্কমতি ৱা তিট্ঠতি ৱা সেয্যং ৱা কপ্পেতি. ভগৱা সেয্যং কপ্পেতি, নিম্মিতো চঙ্কমতি ৱা তিট্ঠতি ৱা নিসীদতি ৱা. নিম্মিতো চঙ্কমতি, ভগৱা তিট্ঠতি ৱা নিসীদতি ৱা সেয্যং ৱা কপ্পেতি. নিম্মিতো তিট্ঠতি, ভগৱা চঙ্কমতি ৱা নিসীদতি ৱা সেয্যং ৱা কপ্পেতি. নিম্মিতো নিসীদতি, ভগৱা চঙ্কমতি ৱা তিট্ঠতি ৱা সেয্যং ৱা কপ্পেতি. নিম্মিতো সেয্যং কপ্পেতি, ভগৱা চঙ্কমতি ৱা তিট্ঠতি ৱা নিসীদতি ৱা. ইদং তথাগতস্স যমকপাটিহীৰে ঞাণং.

যমকপাটিহীৰঞাণনিদ্দেসো সত্ততিমো.