৭১. মহাকৰুণাঞাণনিদ্দেসো

১১৭. কতমং তথাগতস্স মহাকৰুণাসমাপত্তিযা ঞাণং? বহুকেহি আকাৰেহি পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. আদিত্তো লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. উয্যুত্তো লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. পযাতো লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. কুম্মগ্গপ্পটিপন্নো [কুম্মগ্গং পটিপন্নো (স্যা.)] লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. উপনীযতি লোকো অদ্ধুৱোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. অতাণো [অত্তাণো (স্যা.)] লোকো অনভিস্সৰোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. অস্সকো লোকো, সব্বং পহায গমনীযন্তি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. ঊনো লোকো অতীতো তণ্হাদাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. অতাযনো লোকসন্নিৱাসোতি – পস্সন্তানং…পে… অলেণো লোকসন্নিৱাসোতি – পস্সন্তানং …পে… অসৰণো লোকসন্নিৱাসোতি – পস্সন্তানং…পে… অসৰণীভূতো লোকসন্নিৱাসোতি – পস্সন্তানং…পে….

উদ্ধতো লোকো অৱূপসন্তোতি – পস্সন্তানং…পে… সসল্লো লোকসন্নিৱাসো, ৱিদ্ধো পুথুসল্লেহি; তস্স নত্থঞ্ঞো কোচি সল্লানং উদ্ধতা, অঞ্ঞত্ৰ মযাতি – পস্সন্তানং…পে… অৱিজ্জন্ধকাৰাৱৰণো লোকসন্নিৱাসো অণ্ডভূতো কিলেসপঞ্জৰপক্খিত্তো; তস্স নত্থঞ্ঞো কোচি আলোকং দস্সেতা, অঞ্ঞত্ৰ মযাতি – পস্সন্তানং…পে… অৱিজ্জাগতো লোকসন্নিৱাসো অণ্ডভূতো পৰিযোনদ্ধো তন্তাকুলকজাতো [তন্তাকুলজাতো (স্যা.)] কুলাগণ্ডিকজাতো [গুড়াগুণ্ঠিকজাতো (স্যা.), গুলাগুণ্ডিকজাতো (ক. সী. অট্ঠ.) দী. নি. ২.৯৫ পস্সিতব্বা] মুঞ্জপব্বজভূতো অপাযং দুগ্গতিং ৱিনিপাতং সংসাৰং নাতিৱত্ততীতি – পস্সন্তানং…পে… অৱিজ্জাৱিসদোসসংলিত্তো লোকসন্নিৱাসো কিলেসকললীভূতোতি – পস্সন্তানং…পে… ৰাগদোসমোহজটাজটিতো লোকসন্নিৱাসো; তস্স নত্থঞ্ঞো কোচি জটং ৱিজটেতা, অঞ্ঞত্ৰ মযাতি – পস্সন্তানং…পে….

তণ্হাসঙ্ঘাটপটিমুক্কো লোকসন্নিৱাসোতি – পস্সন্তানং…পে… তণ্হাজালেন ওত্থটো [ওত্থতো (ক.)] লোকসন্নিৱাসোতি – পস্সন্তানং…পে… তণ্হাসোতেন ৱুয্হতি লোকসন্নিৱাসোতি – পস্সন্তানং…পে… তণ্হাসঞ্ঞোজনেন সঞ্ঞুত্তো লোকসন্নিৱাসোতি – পস্সন্তানং…পে… তণ্হানুসযেন অনুসটো লোকসন্নিৱাসোতি – পস্সন্তানং…পে… তণ্হাসন্তাপেন সন্তপ্পতি লোকসন্নিৱাসোতি – পস্সন্তানং…পে… তণ্হাপৰিড়াহেন পৰিডয্হতি লোকসন্নিৱাসোতি – পস্সন্তানং…পে….

দিট্ঠিসঙ্ঘাটপটিমুক্কো লোকসন্নিৱাসোতি – পস্সন্তানং…পে… দিট্ঠিজালেন ওত্থটো লোকসন্নিৱাসোতি – পস্সন্তানং…পে… দিট্ঠিসোতেন ৱুয্হতি লোকসন্নিৱাসোতি – পস্সন্তানং…পে… দিট্ঠিসঞ্ঞোজনেন সঞ্ঞুত্তো লোকসন্নিৱাসোতি – পস্সন্তানং…পে… দিট্ঠানুসযেন অনুসটো লোকসন্নিৱাসোতি – পস্সন্তানং…পে… দিট্ঠিসন্তাপেন সন্তপ্পতি লোকসন্নিৱাসোতি – পস্সন্তানং…পে… দিট্ঠিপৰিড়াহেন পৰিডয্হতি লোকসন্নিৱাসোতি – পস্সন্তানং…পে….

জাতিযা অনুগতো লোকসন্নিৱাসোতি – পস্সন্তানং…পে… জৰায অনুসটো লোকসন্নিৱাসোতি – পস্সন্তানং…পে… ব্যাধিনা অভিভূতো লোকসন্নিৱাসোতি – পস্সন্তানং …পে… মৰণেন অব্ভাহতো লোকসন্নিৱাসোতি – পস্সন্তানং…পে… দুক্খে পতিট্ঠিতো লোকসন্নিৱাসোতি – পস্সন্তানং…পে….

তণ্হায উড্ডিতো লোকসন্নিৱাসোতি – পস্সন্তানং…পে… জৰাপাকাৰপৰিক্খিত্তো লোকসন্নিৱাসোতি – পস্সন্তানং…পে… মচ্চুপাসেন পৰিক্খিত্তো লোকসন্নিৱাসোতি – পস্সন্তানং…পে… মহাবন্ধনবন্ধো লোকসন্নিৱাসো – ৰাগবন্ধনেন দোসবন্ধনেন মোহবন্ধনেন মানবন্ধনেন দিট্ঠিবন্ধনেন কিলেসবন্ধনেন দুচ্চৰিতবন্ধনেন; তস্স নত্থঞ্ঞো কোচি বন্ধনং মোচেতা, অঞ্ঞত্ৰ মযাতি – পস্সন্তানং…পে… মহাসম্বাধপ্পটিপন্নো লোকসন্নিৱাসো; তস্স নত্থঞ্ঞো কোচি ওকাসং দস্সেতা, অঞ্ঞত্ৰ মযাতি – পস্সন্তানং… মহাপলিবোধেন পলিবুদ্ধো লোকসন্নিৱাসো; তস্স নত্থঞ্ঞো কোচি পলিবোধং ছেতা, অঞ্ঞত্ৰ মযাতি – পস্সন্তানং…পে… মহাপপাতে পতিতো লোকসন্নিৱাসো; তস্স নত্থঞ্ঞো কোচি পপাতা উদ্ধতা, অঞ্ঞত্ৰ মযাতি – পস্সন্তানং…পে… মহাকন্তাৰপ্পটিপন্নো লোকসন্নিৱাসো; তস্স নত্থঞ্ঞো কোচি কন্তাৰং তাৰেতা, অঞ্ঞত্ৰ মযাতি – পস্সন্তানং…পে… মহাসংসাৰপ্পটিপন্নো লোকসন্নিৱাসো; তস্স নত্থঞ্ঞো কোচি সংসাৰা মোচেতা, অঞ্ঞত্ৰ মযাতি – পস্সন্তানং…পে… মহাৱিদুগ্গে সম্পৰিৱত্ততি লোকসন্নিৱাসো; তস্স নত্থঞ্ঞো কোচি ৱিদুগ্গা উদ্ধতা, অঞ্ঞত্ৰ মযাতি – পস্সন্তানং…পে… মহাপলিপে [মহাপল্লেপে (স্যা.)] পলিপন্নো লোকসন্নিৱাসো; তস্স নত্থঞ্ঞো কোচি পলিপা উদ্ধতা, অঞ্ঞত্ৰ মযাতি – পস্সন্তানং…পে….

অব্ভাহতো লোকসন্নিৱাসোতি – পস্সন্তানং…পে… আদিত্তো লোকসন্নিৱাসো – ৰাগগ্গিনা দোসগ্গিনা মোহগ্গিনা জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি; তস্স নত্থঞ্ঞো কোচি নিব্বাপেতা, অঞ্ঞত্ৰ মযাতি – পস্সন্তানং…পে… উন্নীতকো লোকসন্নিৱাসো হঞ্ঞতি নিচ্চমতাণো পত্তদণ্ডো তক্কৰোতি – পস্সন্তানং…পে… ৱজ্জবন্ধনবদ্ধো লোকসন্নিৱাসো আঘাতনপচ্চুপট্ঠিতো; তস্স নত্থঞ্ঞো কোচি বন্ধনং মোচেতা, অঞ্ঞত্ৰ মযাতি – পস্সন্তানং…পে… অনাথো লোকসন্নিৱাসো পৰমকাৰুঞ্ঞপ্পত্তো; তস্স নত্থঞ্ঞো কোচি তাযেতা, অঞ্ঞত্ৰ মযাতি – পস্সন্তানং…পে… দুক্খাভিতুন্নো [দুক্খাভিতুণ্ণো (ক.)] লোকসন্নিৱাসো চিৰৰত্তং পীড়িতোতি – পস্সন্তানং…পে… গধিতো লোকসন্নিৱাসো নিচ্চং পিপাসিতোতি – পস্সন্তানং…পে….

অন্ধো লোকসন্নিৱাসো অচক্খুকোতি – পস্সন্তানং…পে… হতনেত্তো লোকসন্নিৱাসো অপৰিণাযকোতি – পস্সন্তানং…পে… ৱিপথপক্খন্দো [ৱিপথং পক্খন্তো (স্যা.)] লোকসন্নিৱাসো অঞ্জসাপৰদ্ধো; তস্স নত্থঞ্ঞো কোচি অৰিযপথং আনেতা, অঞ্ঞত্ৰ মযাতি – পস্সন্তানং…পে… মহোঘপক্খন্দো লোকসন্নিৱাসো; তস্স নত্থঞ্ঞো কোচি ওঘা উদ্ধতা, অঞ্ঞত্ৰ মযাতি – পস্সন্তানং…পে….

১১৮. দ্ৱীহি দিট্ঠিগতেহি পৰিযুট্ঠিতো লোকসন্নিৱাসোতি – পস্সন্তানং…পে… তীহি দুচ্চৰিতেহি ৱিপ্পটিপন্নো লোকসন্নিৱাসোতি – পস্সন্তানং…পে… চতূহি যোগেহি যুত্তো লোকসন্নিৱাসো চতুযোগযোজিতোতি – পস্সন্তানং…পে… চতূহি গন্থেহি [গণ্ঠেহি (স্যা.)] গন্থিতো লোকসন্নিৱাসোতি – পস্সন্তানং…পে… চতূহি উপাদানেহি উপাদিযতি লোকসন্নিৱাসোতি – পস্সন্তানং…পে… পঞ্চগতিসমাৰুড়্হো লোকসন্নিৱাসোতি – পস্সন্তানং…পে… পঞ্চহি কামগুণেহি ৰজ্জতি লোকসন্নিৱাসোতি – পস্সন্তানং…পে… পঞ্চহি নীৱৰণেহি ওত্থটো লোকসন্নিৱাসোতি – পস্সন্তানং…পে… ছহি ৱিৱাদমূলেহি ৱিৱদতি লোকসন্নিৱাসোতি – পস্সন্তানং…পে… ছহি তণ্হাকাযেহি ৰজ্জতি লোকসন্নিৱাসোতি – পস্সন্তানং…পে… ছহি দিট্ঠিগতেহি পৰিযুট্ঠিতো লোকসন্নিৱাসোতি – পস্সন্তানং …পে… সত্তহি অনুসযেহি অনুসটো লোকসন্নিৱাসোতি – পস্সন্তানং…পে… সত্তহি সঞ্ঞোজনেহি সঞ্ঞুত্তো লোকসন্নিৱাসোতি – পস্সন্তানং…পে… সত্তহি মানেহি উন্নতো [উণ্ণতো (স্যা. ক.)] লোকসন্নিৱাসোতি – পস্সন্তানং…পে… অট্ঠহি লোকধম্মেহি সম্পৰিৱত্ততি লোকসন্নিৱাসোতি – পস্সন্তানং…পে… অট্ঠহি মিচ্ছত্তেহি নিয্যাতো লোকসন্নিৱাসোতি – পস্সন্তানং…পে… অট্ঠহি পুৰিসদোসেহি দুস্সতি লোকসন্নিৱাসোতি – পস্সন্তানং…পে… নৱহি আঘাতৱত্থূহি আঘাতিতো লোকসন্নিৱাসোতি – পস্সন্তানং …পে… নৱৱিধমানেহি উন্নতো লোকসন্নিৱাসোতি – পস্সন্তানং…পে… নৱহি তণ্হামূলকেহি ধম্মেহি ৰজ্জতি লোকসন্নিৱাসোতি – পস্সন্তানং…পে… দসহি কিলেসৱত্থূহি কিলিস্সতি লোকসন্নিৱাসোতি – পস্সন্তানং…পে… দসহি আঘাতৱত্থূহি আঘাতিতো লোকসন্নিৱাসোতি – পস্সন্তানং…পে… দসহি অকুসলকম্মপথেহি সমন্নাগতো লোকসন্নিৱাসোতি – পস্সন্তানং…পে… দসহি সঞ্ঞোজনেহি সঞ্ঞুত্তো লোকসন্নিৱাসোতি – পস্সন্তানং…পে… দসহি মিচ্ছত্তেহি নিয্যাতো লোকসন্নিৱাসোতি – পস্সন্তানং…পে… দসৱত্থুকায মিচ্ছাদিট্ঠিযা সমন্নাগতো লোকসন্নিৱাসোতি – পস্সন্তানং…পে… দসৱত্থুকায অন্তগ্গাহিকায দিট্ঠিযা সমন্নাগতো লোকসন্নিৱাসোতি – পস্সন্তানং…পে… অট্ঠসততণ্হাপপঞ্চসতেহি পপঞ্চিতো লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. দ্ৱাসট্ঠিযা দিট্ঠিগতেহি পৰিযুট্ঠিতো লোকসন্নিৱাসোতি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি.

অহঞ্চম্হি তিণ্ণো, লোকো চ অতিণ্ণো অহং চম্হি মুত্তো, লোকো চ অমুত্তো; অহঞ্চম্হি দন্তো, লোকো চ অদন্তো; অহং চম্হি সন্তো, লোকো চ অসন্তো; অহং চম্হি অস্সত্থো, লোকো চ অনস্সত্থো; অহং চম্হি পৰিনিব্বুতো, লোকো চ অপৰিনিব্বুতো; পহোমি খ্ৱাহং তিণ্ণো তাৰেতুং, মুত্তো মোচেতুং, দন্তো দমেতুং, সন্তো সমেতুং, অস্সত্থো অস্সাসেতুং, পৰিনিব্বুতো পৰে চ পৰিনিব্বাপেতুন্তি – পস্সন্তানং বুদ্ধানং ভগৱন্তানং সত্তেসু মহাকৰুণা ওক্কমতি. ইদং তথাগতস্স মহাকৰুণাসমাপত্তিযা ঞাণং.

মহাকৰুণাঞাণনিদ্দেসো একসত্ততিমো.