৬৮. ইন্দ্ৰিযপৰোপৰিযত্তঞাণনিদ্দেসো

১১১. কতমং তথাগতস্স ইন্দ্ৰিযপৰোপৰিযত্ত ঞাণং? ইধ তথাগতো সত্তে পস্সতি অপ্পৰজক্খে মহাৰজক্খে তিক্খিন্দ্ৰিযে মুদিন্দ্ৰিযে স্ৱাকাৰে দ্ৱাকাৰে সুৱিঞ্ঞাপযে দুৱিঞ্ঞাপযে অপ্পেকচ্চে পৰলোকৱজ্জভযদস্সাৱিনো অপ্পেকচ্চে ন পৰলোকৱজ্জভযদস্সাৱিনো.

অপ্পৰজক্খে মহাৰজক্খেতি সদ্ধো পুগ্গলো অপ্পৰজক্খো, অস্সদ্ধো পুগ্গলো মহাৰজক্খো. আৰদ্ধৱীৰিযো পুগ্গলো অপ্পৰজক্খো, কুসীতো পুগ্গলো মহাৰজক্খো. উপট্ঠিতস্সতি পুগ্গলো অপ্পৰজক্খো, মুট্ঠস্সতি পুগ্গলো মহাৰজক্খো. সমাহিতো পুগ্গলো অপ্পৰজক্খো, অসমাহিতো পুগ্গলো মহাৰজক্খো. পঞ্ঞৱা পুগ্গলো অপ্পৰজক্খো, দুপ্পঞ্ঞো পুগ্গলো মহাৰজক্খো.

তিক্খিন্দ্ৰিযে মুদিন্দ্ৰিযেতি সদ্ধো পুগ্গলো তিক্খিন্দ্ৰিযো, অস্সদ্ধো পুগ্গলো মুদিন্দ্ৰিযো. আৰদ্ধৱীৰিযো পুগ্গলো তিক্খিন্দ্ৰিযো, কুসীতো পুগ্গলো মুদিন্দ্ৰিযো. উপট্ঠিতস্সতি পুগ্গলো তিক্খিন্দ্ৰিযো, মুট্ঠস্সতি পুগ্গলো মুদিন্দ্ৰিযো. সমাহিতো পুগ্গলো তিক্খিন্দ্ৰিযো, অসমাহিতো পুগ্গলো মুদিন্দ্ৰিযো. পঞ্ঞৱা পুগ্গলো তিক্খিন্দ্ৰিযো, দুপ্পঞ্ঞো পুগ্গলো মুদিন্দ্ৰিযো.

স্ৱাকাৰে দ্ৱাকাৰেতি সদ্ধো পুগ্গলো স্ৱাকাৰো, অস্সদ্ধো পুগ্গলো দ্ৱাকাৰো. আৰদ্ধৱীৰিযো পুগ্গলো স্ৱাকাৰো, কুসীতো পুগ্গলো দ্ৱাকাৰো. উপট্ঠিতস্সতি পুগ্গলো স্ৱাকাৰো, মুট্ঠস্সতি পুগ্গলো দ্ৱাকাৰো. সমাহিতো পুগ্গলো স্ৱাকাৰো, অসমাহিতো পুগ্গলো দ্ৱাকাৰো. পঞ্ঞৱা পুগ্গলো স্ৱাকাৰো, দুপ্পঞ্ঞো পুগ্গলো দ্ৱাকাৰো.

সুৱিঞ্ঞাপযে দুৱিঞ্ঞাপযেতি সদ্ধো পুগ্গলো সুৱিঞ্ঞাপযো, অস্সদ্ধো পুগ্গলো দুৱিঞ্ঞাপযো. আৰদ্ধৱীৰিযো পুগ্গলো সুৱিঞ্ঞাপযো, কুসীতো পুগ্গলো দুৱিঞ্ঞাপযো. উপট্ঠিতস্সতি পুগ্গলো সুৱিঞ্ঞাপযো, মুট্ঠস্সতি পুগ্গলো দুৱিঞ্ঞাপযো. সমাহিতো পুগ্গলো সুৱিঞ্ঞাপযো, অসমাহিতো পুগ্গলো দুৱিঞ্ঞাপযো. পঞ্ঞৱা পুগ্গলো সুৱিঞ্ঞাপযো, দুপ্পঞ্ঞো পুগ্গলো দুৱিঞ্ঞাপযো.

অপ্পেকচ্চে পৰলোকৱজ্জভযদস্সাৱিনো, অপ্পেকচ্চে ন পৰলোকৱজ্জভযদস্সাৱিনোতি সদ্ধো পুগ্গলো পৰলোকৱজ্জভযদস্সাৱী, অস্সদ্ধো পুগ্গলো ন পৰলোকৱজ্জভযদস্সাৱী. আৰদ্ধৱীৰিযো পুগ্গলো পৰলোকৱজ্জভযদস্সাৱী, কুসীতো পুগ্গলো ন পৰলোকৱজ্জভযদস্সাৱী. উপট্ঠিতস্সতি পুগ্গলো পৰলোকৱজ্জভযদস্সাৱী, মুট্ঠস্সতি পুগ্গলো ন পৰলোকৱজ্জভযদস্সাৱী. সমাহিতো পুগ্গলো পৰলোকৱজ্জভযদস্সাৱী, অসমাহিতো পুগ্গলো ন পৰলোকৱজ্জভযদস্সাৱী. পঞ্ঞৱা পুগ্গলো পৰলোকৱজ্জভযদস্সাৱী, দুপ্পঞ্ঞো পুগ্গলো ন পৰলোকৱজ্জভযদস্সাৱী.

১১২. লোকোতি – খন্ধলোকো, ধাতুলোকো, আযতনলোকো, ৱিপত্তিভৱলোকো, ৱিপত্তিসম্ভৱলোকো, সম্পত্তিভৱলোকো, সম্পত্তিসম্ভৱলোকো.

একো লোকো – সব্বে সত্তা আহাৰট্ঠিতিকা. দ্ৱে লোকা – নামঞ্চ, ৰূপঞ্চ. তযো লোকা – তিস্সো ৱেদনা. চত্তাৰো লোকা – চত্তাৰো আহাৰা. পঞ্চ লোকা – পঞ্চুপাদানক্খন্ধা. ছ লোকা – ছ অজ্ঝত্তিকানি আযতনানি. সত্ত লোকা – সত্ত ৱিঞ্ঞাণট্ঠিতিযো. অট্ঠ লোকা – অট্ঠ লোকধম্মা. নৱ লোকা – নৱ সত্তাৱাসা. দস লোকা – দসাযতনানি. দ্ৱাদসলোকা – দ্ৱাদসাযতনানি. অট্ঠাৰস লোকা – অট্ঠাৰস ধাতুযো.

ৱজ্জন্তি সব্বে কিলেসা ৱজ্জা, সব্বে দুচ্চৰিতা ৱজ্জা, সব্বে অভিসঙ্খাৰা ৱজ্জা, সব্বে ভৱগামিকম্মা ৱজ্জা. ইতি ইমস্মিঞ্চ লোকে ইমস্মিঞ্চ ৱজ্জে তিব্বা ভযসঞ্ঞা পচ্চুপট্ঠিতা হোতি, সেয্যথাপি উক্খিত্তাসিকে ৱধকে. ইমেহি পঞ্ঞাসায আকাৰেহি ইমানি পঞ্চিন্দ্ৰিযানি জানাতি পস্সতি অঞ্ঞাতি পটিৱিজ্ঝতি – ইদং তথাগতস্স ইন্দ্ৰিযপৰোপৰিযত্তে ঞাণং.

ইন্দ্ৰিযপৰোপৰিযত্তঞাণনিদ্দেসো অট্ঠসট্ঠিমো.