৬৪-৬৭. সুদ্ধিকপটিসম্ভিদাঞাণনিদ্দেসো

১১০. কথং অত্থপটিসম্ভিদে ঞাণং, ধম্মপটিসম্ভিদে ঞাণং, নিৰুত্তিপটিসম্ভিদে ঞাণং, পটিভানপটিসম্ভিদে ঞাণং? অত্থেসু ঞাণং অত্থপটিসম্ভিদা, ধম্মেসু ঞাণং ধম্মপটিসম্ভিদা, নিৰুত্তীসু ঞাণং নিৰুত্তিপটিসম্ভিদা, পটিভানেসু ঞাণং পটিভানপটিসম্ভিদা. অত্থনানত্তে পঞ্ঞা অত্থপটিসম্ভিদে ঞাণং, ধম্মনানত্তে পঞ্ঞা ধম্মপটিসম্ভিদে ঞাণং, নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং, পটিভাননানত্তে পঞ্ঞা পটিভানপটিসম্ভিদে ঞাণং, অত্থৱৱত্থানে পঞ্ঞা অত্থপটিসম্ভিদে ঞাণং, ধম্মৱৱত্থানে পঞ্ঞা ধম্মপটিসম্ভিদে ঞাণং নিৰুত্তিৱৱত্থানে পঞ্ঞা নিৰুত্তিপটিসম্ভিদে ঞাণং, পটিভানৱৱত্থানে পঞ্ঞা পটিভানপটিসম্ভিদে ঞাণং.

অত্থসল্লক্খণে পঞ্ঞা অত্থপটিসম্ভিদে ঞাণং, ধম্মসল্লক্খণে পঞ্ঞা ধম্মপটিসম্ভিদে ঞাণং, নিৰুত্তিসল্লক্খণে পঞ্ঞা নিৰুত্তিপটিসম্ভিদে ঞাণং, পটিভানসল্লক্খণে পঞ্ঞা পটিভানপটিসম্ভিদে ঞাণং. অত্থূপলক্খণে পঞ্ঞা অত্থপটিসম্ভিদে ঞাণং, ধম্মূপলক্খণে পঞ্ঞা ধম্মপটিসম্ভিদে ঞাণং, নিৰুত্তূপলক্খণে পঞ্ঞা নিৰুত্তিপটিসম্ভিদে ঞাণং, পটিভানূপলক্খণে পঞ্ঞা পটিভানপটিসম্ভিদে ঞাণং.

অত্থপ্পভেদে পঞ্ঞা অত্থপটিসম্ভিদে ঞাণং, ধম্মপ্পভেদে পঞ্ঞা ধম্মপটিসম্ভিদে ঞাণং, নিৰুত্তিপ্পভেদে পঞ্ঞা নিৰুত্তিপটিসম্ভিদে ঞাণং, পটিভানপ্পভেদে পঞ্ঞা পটিভানপটিসম্ভিদে ঞাণং. অত্থপ্পভাৱনে পঞ্ঞা অত্থপটিসম্ভিদে ঞাণং, ধম্মপ্পভাৱনে পঞ্ঞা ধম্মপটিসম্ভিদে ঞাণং, নিৰুত্তিপ্পভাৱনে পঞ্ঞা নিৰুত্তিপটিসম্ভিদে ঞাণং, পটিভানপ্পভাৱনে পঞ্ঞা পটিভানপটিসম্ভিদে ঞাণং.

অত্থজোতনে পঞ্ঞা অত্থপটিসম্ভিদে ঞাণং, ধম্মজোতনে পঞ্ঞা ধম্মপটিসম্ভিদে ঞাণং, নিৰুত্তিজোতনে পঞ্ঞা নিৰুত্তিপটিসম্ভিদে ঞাণং, পটিভানজোতনে পঞ্ঞা পটিভানপটিসম্ভিদে ঞাণং. অত্থৱিৰোচনে পঞ্ঞা অত্থপটিসম্ভিদে ঞাণং, ধম্মৱিৰোচনে পঞ্ঞা ধম্মপটিসম্ভিদে ঞাণং, নিৰুত্তিৱিৰোচনে পঞ্ঞা নিৰুত্তিপটিসম্ভিদে ঞাণং, পটিভানৱিৰোচনে পঞ্ঞা পটিভানপটিসম্ভিদে ঞাণং. অত্থপ্পকাসনে পঞ্ঞা অত্থপটিসম্ভিদে ঞাণং, ধম্মপ্পকাসনে পঞ্ঞা ধম্মপটিসম্ভিদে ঞাণং, নিৰুত্তিপ্পকাসনে পঞ্ঞা নিৰুত্তিপটিসম্ভিদে ঞাণং, পটিভানপ্পকাসনে পঞ্ঞা পটিভানপটিসম্ভিদে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘অত্থপটিসম্ভিদে ঞাণং, ধম্মপটিসম্ভিদে ঞাণং, নিৰুত্তিপটিসম্ভিদে ঞাণং, পটিভানপটিসম্ভিদে ঞাণং’’.

সুদ্ধিকপটিসম্ভিদাঞাণনিদ্দেসো সত্তসট্ঠিমো.