৫৬-৬৩. সচ্চঞাণচতুক্কদ্ৱযনিদ্দেসো

১০৮. কথং পৰিঞ্ঞট্ঠে পঞ্ঞা দুক্খে ঞাণং, পহানট্ঠে পঞ্ঞা সমুদযে ঞাণং, সচ্ছিকিৰিযট্ঠে পঞ্ঞা নিৰোধে ঞাণং, ভাৱনট্ঠে পঞ্ঞা মগ্গে ঞাণং? দুক্খস্স পীড়নট্ঠো সঙ্খতট্ঠো সন্তাপট্ঠো ৱিপৰিণামট্ঠো পৰিঞ্ঞাতট্ঠো; সমুদযস্স আযূহনট্ঠো নিদানট্ঠো সঞ্ঞোগট্ঠো পলিবোধট্ঠো পহানট্ঠো; নিৰোধস্স নিস্সৰণট্ঠো ৱিৱেকট্ঠো অসঙ্খতট্ঠো অমতট্ঠো সচ্ছিকিৰিযট্ঠো; মগ্গস্স নিয্যানট্ঠো হেতুট্ঠো দস্সনট্ঠো আধিপতেয্যট্ঠো ভাৱনট্ঠো. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘পৰিঞ্ঞট্ঠে পঞ্ঞা দুক্খে ঞাণং, পহানট্ঠে পঞ্ঞা সমুদযে ঞাণং, সচ্ছিকিৰিযট্ঠে পঞ্ঞা নিৰোধে ঞাণং, ভাৱনট্ঠে পঞ্ঞা মগ্গে ঞাণং’’.

১০৯. কথং দুক্খে ঞাণং, দুক্খসমুদযে ঞাণং, দুক্খনিৰোধে ঞাণং, দুক্খনিৰোধগামিনিযা পটিপদায ঞাণং? মগ্গসমঙ্গিস্স ঞাণং দুক্খে পেতং ঞাণং, দুক্খসমুদযে পেতং ঞাণং, দুক্খনিৰোধে পেতং ঞাণং, দুক্খনিৰোধগামিনিযা পটিপদায পেতং ঞাণং.

তত্থ কতমং দুক্খে ঞাণং? দুক্খং আৰব্ভ যা উপ্পজ্জতি পঞ্ঞা পজাননা ৱিচযো পৱিচযো ধম্মৱিচযো সল্লক্খণা উপলক্খণা পচ্চুপলক্খণা পণ্ডিচ্চং কোসল্লং নেপুঞ্ঞং ৱেভব্যা চিন্তা উপপৰিক্খা ভূৰি মেধা পৰিণাযিকা ৱিপস্সনা সম্পজঞ্ঞং পতোদো পঞ্ঞা পঞ্ঞিন্দ্ৰিযং পঞ্ঞাবলং পঞ্ঞাসত্থং পঞ্ঞাপাসাদো পঞ্ঞাআলোকো পঞ্ঞাওভাসো পঞ্ঞাপজ্জোতো পঞ্ঞাৰতনং অমোহো ধম্মৱিচযো সম্মাদিট্ঠি – ইদং ৱুচ্চতি দুক্খে ঞাণং. দুক্খসমুদযং আৰব্ভ…পে… দুক্খনিৰোধং আৰব্ভ…পে… দুক্খনিৰোধগামিনিং পটিপদং আৰব্ভ যা উপ্পজ্জতি পঞ্ঞা পজাননা…পে… অমোহো ধম্মৱিচযো সম্মাদিট্ঠি – ইদং ৱুচ্চতি দুক্খনিৰোধগামিনিযা পটিপদায ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘দুক্খে ঞাণং, দুক্খসমুদযে ঞাণং, দুক্খনিৰোধে ঞাণং, দুক্খনিৰোধগামিনিযা পটিপদায ঞাণং’’.

সচ্চঞাণচতুক্কদ্ৱযনিদ্দেসো তেসট্ঠিমো.