৫৩. পুব্বেনিৱাসানুস্সতিঞাণনিদ্দেসো

১০৫. কথং পচ্চযপৱত্তানং ধম্মানং নানত্তেকত্তকম্মৱিপ্ফাৰৱসেন পৰিযোগাহণে পঞ্ঞা পুব্বেনিৱাসানুস্সতিঞাণং? ইধ ভিক্খু ছন্দসমাধি…পে… মুদুং কৰিত্ৱা কম্মনিযং এৱং পজানাতি – ‘‘ইমস্মিং সতি ইদং হোতি, ইমস্সুপ্পাদা ইদং উপ্পজ্জতি, যদিদং – অৱিজ্জাপচ্চযা সঙ্খাৰা, সঙ্খাৰপচ্চযা ৱিঞ্ঞাণং, ৱিঞ্ঞাণপচ্চযা নামৰূপং, নামৰূপপচ্চযা সড়াযতনং, সড়াযতনপচ্চযা ফস্সো, ফস্সপচ্চযা ৱেদনা, ৱেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা ভৱো, ভৱপচ্চযা জাতি, জাতিপচ্চযা জৰামৰণং সোকপৰিদেৱদুক্খদোমনস্সুপাযাসা সম্ভৱন্তি; এৱমেতস্স কেৱলস্স দুক্খক্খন্ধস্স সমুদযো হোতি’’.

সো তথাভাৱিতেন চিত্তেন পৰিসুদ্ধেন পৰিযোদাতেন পুব্বেনিৱাসানুস্সতিঞাণায চিত্তং অভিনীহৰতি অভিনিন্নামেতি. সো অনেকৱিহিতং পুব্বেনিৱাসং অনুস্সৰতি, সেয্যথিদং – একম্পি জাতিং দ্ৱেপি জাতিযো তিস্সোপি জাতিযো চতস্সোপি জাতিযো পঞ্চপি জাতিযো দসপি জাতিযো ৱীসম্পি জাতিযো তিংসম্পি জাতিযো চত্তালীসম্পি জাতিযো পঞ্ঞাসম্পি জাতিযো, জাতিসতম্পি জাতিসহস্সম্পি জাতিসতসহস্সম্পি, অনেকেপি সংৱট্টকপ্পে অনেকেপি ৱিৱট্টকপ্পে অনেকেপি সংৱট্টৱিৱট্টকপ্পে – ‘‘অমুত্ৰাসিং এৱংনামো এৱংগোত্তো এৱংৱণ্ণো এৱমাহাৰো এৱংসুখদুক্খপ্পটিসংৱেদী এৱমাযুপৰিযন্তো, সো ততো চুতো অমুত্ৰ উদপাদিং; তত্ৰাপাসিং এৱংনামো এৱংগোত্তো এৱংৱণ্ণো এৱমাহাৰো এৱংসুখদুক্খপ্পটিসংৱেদী এৱম আযুপৰিযন্তো, সো ততো চুতো ইধূপপন্নো’’তি. ইতি সাকাৰং সউদ্দেসং অনেকৱিহিতং পুব্বেনিৱাসং অনুস্সৰতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘পচ্চযপৱত্তানং ধম্মানং নানত্তেকত্তকম্মৱিপ্ফাৰৱসেন পৰিযোগাহণে পঞ্ঞা পুব্বেনিৱাসানুস্সতিঞাণং’’.

পুব্বেনিৱাসানুস্সতিঞাণনিদ্দেসো তেপঞ্ঞাসমো.