৪. ধম্মট্ঠিতিঞাণনিদ্দেসো

৪৫. কথং পচ্চযপৰিগ্গহে পঞ্ঞা ধম্মট্ঠিতিঞাণং? অৱিজ্জা সঙ্খাৰানং উপ্পাদট্ঠিতি চ পৱত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৱহাকাৰেহি অৱিজ্জা পচ্চযো, সঙ্খাৰা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৱিজ্জা সঙ্খাৰানং উপ্পাদট্ঠিতি চ পৱত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৱহাকাৰেহি অৱিজ্জা পচ্চযো, সঙ্খাৰা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

সঙ্খাৰা ৱিঞ্ঞাণস্স…পে… ৱিঞ্ঞাণং নামৰূপস্স… নামৰূপং সড়াযতনস্স… সড়াযতনং ফস্সস্স… ফস্সো ৱেদনায… ৱেদনা তণ্হায… তণ্হা উপাদানস্স… উপাদানং ভৱস্স… ভৱো জাতিযা… জাতি জৰামৰণস্স উপ্পাদট্ঠিতি চ পৱত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৱহাকাৰেহি জাতি পচ্চযো, জৰামৰণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি জৰামৰণস্স উপ্পাদট্ঠিতি চ পৱত্তট্ঠিতি চ নিমিত্তট্ঠিতি চ আযূহনট্ঠিতি চ সঞ্ঞোগট্ঠিতি চ পলিবোধট্ঠিতি চ সমুদযট্ঠিতি চ হেতুট্ঠিতি চ পচ্চযট্ঠিতি চ. ইমেহি নৱহাকাৰেহি জাতি পচ্চযো, জৰামৰণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

৪৬. অৱিজ্জা হেতু, সঙ্খাৰা হেতুসমুপ্পন্না. উভোপেতে ধম্মা হেতুসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৱিজ্জা হেতু, সঙ্খাৰা হেতুসমুপ্পন্না. উভোপেতে ধম্মা হেতুসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

সঙ্খাৰা হেতু, ৱিঞ্ঞাণং হেতুসমুপ্পন্নং…পে… ৱিঞ্ঞাণং হেতু, নামৰূপং হেতুসমুপ্পন্নং… নামৰূপং হেতু, সড়াযতনং হেতুসমুপ্পন্নং… সড়াযতনং হেতু, ফস্সো হেতুসমুপ্পন্নো… ফস্সো হেতু, ৱেদনা হেতুসমুপ্পন্না… ৱেদনা হেতু, তণ্হা হেতুসমুপ্পন্না… তণ্হা হেতু, উপাদানং হেতুসমুপ্পন্নং… উপাদানং হেতু, ভৱো হেতুসমুপ্পন্নো… ভৱো হেতু, জাতি হেতুসমুপ্পন্না… জাতি হেতু, জৰামৰণং হেতুসমুপ্পন্নং. উভোপেতে ধম্মা হেতুসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি হেতু, জৰামৰণং হেতুসমুপ্পন্নং. উভোপেতে ধম্মা হেতুসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

অৱিজ্জা পটিচ্চা, সঙ্খাৰা পটিচ্চসমুপ্পন্না. উভোপেতে ধম্মা পটিচ্চসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৱিজ্জা পটিচ্চা, সঙ্খাৰা পটিচ্চসমুপ্পন্না. উভোপেতে ধম্মা পটিচ্চসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

সঙ্খাৰা পটিচ্চা, ৱিঞ্ঞাণং পটিচ্চসমুপ্পন্নং…পে… ৱিঞ্ঞাণং পটিচ্চা, নামৰূপং পটিচ্চসমুপ্পন্নং… নামৰূপং পটিচ্চা, সড়াযতনং পটিচ্চসমুপ্পন্নং… সড়াযতনং পটিচ্চা, ফস্সো পটিচ্চসমুপ্পন্নো… ফস্সো পটিচ্চা, ৱেদনা পটিচ্চসমুপ্পন্না… ৱেদনা পটিচ্চা, তণ্হা পটিচ্চসমুপ্পন্না… তণ্হা পটিচ্চা, উপাদানং পটিচ্চসমুপ্পন্নং… উপাদানং পটিচ্চা, ভৱো পটিচ্চসমুপ্পন্নো… ভৱো পটিচ্চা, জাতি পটিচ্চসমুপ্পন্না… জাতি পটিচ্চা, জৰামৰণং পটিচ্চসমুপ্পন্নং. উভোপেতে ধম্মা পটিচ্চসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি পটিচ্চা, জৰামৰণং পটিচ্চসমুপ্পন্নং. উভোপেতে ধম্মা পটিচ্চসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

অৱিজ্জা পচ্চযো, সঙ্খাৰা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং অৱিজ্জা পচ্চযো, সঙ্খাৰা পচ্চযসমুপ্পন্না. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

সঙ্খাৰা পচ্চযা, ৱিঞ্ঞাণং পচ্চযসমুপ্পন্নং…পে… ৱিঞ্ঞাণং পচ্চযো, নামৰূপং পচ্চযসমুপ্পন্নং… নামৰূপং পচ্চযো, সড়াযতনং পচ্চযসমুপ্পন্নং… সড়াযতনং পচ্চযো, ফস্সো পচ্চযসমুপ্পন্নো… ফস্সো পচ্চযো, ৱেদনা পচ্চযসমুপ্পন্না… ৱেদনা পচ্চযো, তণ্হা পচ্চযসমুপ্পন্না… তণ্হা পচ্চযো, উপাদানং পচ্চযসমুপ্পন্নং… উপাদানং পচ্চযো, ভৱো পচ্চযসমুপ্পন্নো… ভৱো পচ্চযো, জাতি পচ্চযসমুপ্পন্না… জাতি পচ্চযো, জৰামৰণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং. অতীতম্পি অদ্ধানং… অনাগতম্পি অদ্ধানং জাতি পচ্চযো, জৰামৰণং পচ্চযসমুপ্পন্নং. উভোপেতে ধম্মা পচ্চযসমুপ্পন্নাতি – পচ্চযপৰিগ্গহে পঞ্ঞা ধম্মট্ঠিতিঞাণং.

৪৭. পুৰিমকম্মভৱস্মিং মোহো অৱিজ্জা, আযূহনা সঙ্খাৰা, নিকন্তি তণ্হা, উপগমনং উপাদানং, চেতনা ভৱো. ইমে পঞ্চ ধম্মা পুৰিমকম্মভৱস্মিং ইধ পটিসন্ধিযা পচ্চযা. ইধ পটিসন্ধি ৱিঞ্ঞাণং, ওক্কন্তি নামৰূপং, পসাদো আযতনং, ফুট্ঠো ফস্সো, ৱেদযিতং ৱেদনা. ইমে পঞ্চ ধম্মা ইধুপপত্তিভৱস্মিং পুৰেকতস্স কম্মস্স পচ্চযা. ইধ পৰিপক্কত্তা আযতনানং মোহো অৱিজ্জা, আযূহনা সঙ্খাৰা, নিকন্তি তণ্হা উপগমনং উপাদানং, চেতনা ভৱো. ইমে পঞ্চ ধম্মা ইধ কম্মভৱস্মিং আযতিং পটিসন্ধিযা পচ্চযা. আযতিং পটিসন্ধি ৱিঞ্ঞাণং, ওক্কন্তি নামৰূপং, পসাদো আযতনং, ফুট্ঠো ফস্সো, ৱেদযিতং ৱেদনা. ইমে পঞ্চ ধম্মা আযতিং উপপত্তিভৱস্মিং ইধ কতস্স কম্মস্স পচ্চযা. ইতিমে চতুসঙ্খেপে তযো অদ্ধে তিসন্ধিং ৱীসতিযা আকাৰেহি পটিচ্চসমুপ্পাদং জানাতি পস্সতি অঞ্ঞাতি পটিৱিজ্ঝতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘পচ্চযপৰিগ্গহে পঞ্ঞা ধম্মট্ঠিতিঞাণং’’.

ধম্মট্ঠিতিঞাণনিদ্দেসো চতুত্থো.