৩৭. সল্লেখট্ঠঞাণনিদ্দেসো

৮৮. কথং পুথুনানত্তেকত্ততেজপৰিযাদানে পঞ্ঞা সল্লেখট্ঠে [পুথুনানত্তেকত্ততেজপৰিযাদানে (ক.)] ঞাণং? পুথূতি – ৰাগো পুথু, দোসো পুথু, মোহো পুথু, কোধো…পে… উপনাহো… মক্খো… পড়াসো… ইস্সা… মচ্ছৰিযং… মাযা… সাঠেয্যং… থম্ভো… সাৰম্ভো… মানো… অতিমানো… মদো… পমাদো… সব্বে কিলেসা… সব্বে দুচ্চৰিতা… সব্বে অভিসঙ্খাৰা… সব্বে ভৱগামিকম্মা.

নানত্তেকত্তন্তি কামচ্ছন্দো নানত্তং, নেক্খম্মং একত্তং. ব্যাপাদো নানত্তং, অব্যাপাদো একত্তং. থিনমিদ্ধং নানত্তং, আলোকসঞ্ঞা একত্তং. উদ্ধচ্চং নানত্তং, অৱিক্খেপো একত্তং. ৱিচিকিচ্ছা নানত্তং, ধম্মৱৱত্থানং একত্তং. অৱিজ্জা নানত্তং, ঞাণং একত্তং. অৰতি নানত্তং, পামোজ্জং একত্তং. নীৱৰণা নানত্তং, পঠমং ঝানং একত্তং…পে… সব্বে কিলেসা নানত্তং, অৰহত্তমগ্গো একত্তং.

তেজোতি পঞ্চ তেজা – চৰণতেজো, গুণতেজো, পঞ্ঞাতেজো, পুঞ্ঞতেজো, ধম্মতেজো. চৰণতেজেন তেজিতত্তা দুস্সীল্যতেজং পৰিযাদিযতি. গুণতেজেন তেজিতত্তা অগুণতেজং পৰিযাদিযতি. পঞ্ঞাতেজেন তেজিতত্তা দুপ্পঞ্ঞতেজং পৰিযাদিযতি. পুঞ্ঞতেজেন তেজিতত্তা অপুঞ্ঞতেজং পৰিযাদিযতি. ধম্মতেজেন তেজিতত্তা অধম্মতেজং পৰিযাদিযতি.

সল্লেখোতি কামচ্ছন্দো অসল্লেখো, নেক্খম্মং সল্লেখো. ব্যাপাদো অসল্লেখো, অব্যাপাদো সল্লেখো. থিনমিদ্ধং অসল্লেখো, আলোকসঞ্ঞা সল্লেখো. উদ্ধচ্চং অসল্লেখো, অৱিক্খেপো সল্লেখো. ৱিচিকিচ্ছা অসল্লেখো, ধম্মৱৱত্থানং সল্লেখো. অৱিজ্জা অসল্লেখো, ঞাণং সল্লেখো. অৰতি অসল্লেখো, পামোজ্জং সল্লেখো. নীৱৰণা অসল্লেখো, পঠমং ঝানং সল্লেখো…পে… সব্বকিলেসা অসল্লেখো, অৰহত্তমগ্গো সল্লেখো. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘পুথুনানত্ততেজপৰিযাদানে পঞ্ঞা সল্লেখট্ঠে ঞাণং’’.

সল্লেখট্ঠঞাণনিদ্দেসো সত্ততিংসতিমো.