৩৮. ৱীৰিযাৰম্ভঞাণনিদ্দেসো

৮৯. কথং অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং? অনুপ্পন্নানং পাপকানং অকুসলানং ধম্মানং অনুপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নানং পাপকানং অকুসলানং ধম্মানং পহানায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. অনুপ্পন্নানং কুসলানং ধম্মানং উপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নানং কুসলানং ধম্মানং ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং.

অনুপ্পন্নস্স কামচ্ছন্দস্স অনুপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নস্স কামচ্ছন্দস্স পহানায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. অনুপ্পন্নস্স নেক্খম্মস্স উপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নস্স নেক্খম্মস্স ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং…পে….

অনুপ্পন্নানং সব্বকিলেসানং অনুপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নানং সব্বকিলেসানং পহানায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং…পে… অনুপ্পন্নস্স অৰহত্তমগ্গস্স উপ্পাদায অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. উপ্পন্নস্স অৰহত্তমগ্গস্স ঠিতিযা অসম্মোসায ভিয্যোভাৱায ৱেপুল্লায ভাৱনায পাৰিপূৰিযা অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘অসল্লীনত্তপহিতত্তপগ্গহট্ঠে পঞ্ঞা ৱীৰিযাৰম্ভে ঞাণং’’.

ৱীৰিযাৰম্ভঞাণনিদ্দেসো অট্ঠতিংসতিমো.