৩৬. সমসীসট্ঠঞাণনিদ্দেসো

৮৭. কথং সব্বধম্মানং সম্মা সমুচ্ছেদে নিৰোধে চ অনুপট্ঠানতা পঞ্ঞা সমসীসট্ঠে ঞাণং? সব্বধম্মানন্তি – পঞ্চক্খন্ধা, দ্ৱাদসাযতনানি, অট্ঠাৰস ধাতুযো, কুসলা ধম্মা, অকুসলা ধম্মা, অব্যাকতা ধম্মা, কামাৱচৰা ধম্মা, ৰূপাৱচৰা ধম্মা, অৰূপাৱচৰা ধম্মা, অপৰিযাপন্না ধম্মা. সম্মা সমুচ্ছেদেতি নেক্খম্মেন কামচ্ছন্দং সম্মা সমুচ্ছিন্দতি. অব্যাপাদেন ব্যাপাদং সম্মা সমুচ্ছিন্দতি. আলোকসঞ্ঞায থিনমিদ্ধং সম্মা সমুচ্ছিন্দতি. অৱিক্খেপেন উদ্ধচ্চং সম্মা সমুচ্ছিন্দতি. ধম্মৱৱত্থানেন ৱিচিকিচ্ছং সম্মা সমুচ্ছিন্দতি. ঞাণেন অৱিজ্জং সম্মা সমুচ্ছিন্দতি. পামোজ্জেন অৰতিং সম্মা সমুচ্ছিন্দতি. পঠমেন ঝানেন নীৱৰণে সম্মা সমুচ্ছিন্দতি…পে… অৰহত্তমগ্গেন সব্বকিলেসে সম্মা সমুচ্ছিন্দতি.

নিৰোধেতি নেক্খম্মেন কামচ্ছন্দং নিৰোধেতি. অব্যাপাদেন ব্যাপাদং নিৰোধেতি. আলোকসঞ্ঞায থিনমিদ্ধং নিৰোধেতি. অৱিক্খেপেন উদ্ধচ্চং নিৰোধেতি. ধম্মৱৱত্থানেন ৱিচিকিচ্ছং নিৰোধেতি. ঞাণেন অৱিজ্জং নিৰোধেতি. পামোজ্জেন অৰতিং নিৰোধেতি. পঠমেন ঝানেন নীৱৰণে নিৰোধেতি…পে… অৰহত্তমগ্গেন সব্বকিলেসে নিৰোধেতি.

অনুপট্ঠানতাতি নেক্খম্মং পটিলদ্ধস্স কামচ্ছন্দো ন উপট্ঠাতি. অব্যাপাদং পটিলদ্ধস্স ব্যাপাদো ন উপট্ঠাতি. আলোকসঞ্ঞং পটিলদ্ধস্স থিনমিদ্ধং ন উপট্ঠাতি. অৱিক্খেপং পটিলদ্ধস্স উদ্ধচ্চং ন উপট্ঠাতি. ধম্মৱৱত্থানং পটিলদ্ধস্স ৱিচিকিচ্ছা ন উপট্ঠাতি. ঞাণং পটিলদ্ধস্স অৱিজ্জা ন উপট্ঠাতি. পামোজ্জং পটিলদ্ধস্স অৰতি ন উপট্ঠাতি. পঠমং ঝানং পটিলদ্ধস্স নীৱৰণা ন উপট্ঠহন্তি…পে… অৰহত্তমগ্গং পটিলদ্ধস্স সব্বকিলেসা ন উপট্ঠহন্তি.

সমন্তি কামচ্ছন্দস্স পহীনত্তা নেক্খম্মং সমং. ব্যাপাদস্স পহীনত্তা অব্যাপাদো সমং. থিনমিদ্ধস্স পহীনত্তা আলোকসঞ্ঞা সমং. উদ্ধচ্চস্স পহীনত্তা অৱিক্খেপো সমং. ৱিচিকিচ্ছায পহীনত্তা ধম্মৱৱত্থানং সমং. অৱিজ্জায পহীনত্তা ঞাণং সমং. অৰতিযা পহীনত্তা পামোজ্জং সমং. নীৱৰণানং পহীনত্তা পঠমং ঝানং সমং…পে… সব্বকিলেসানং পহীনত্তা অৰহত্তমগ্গো সমং.

সীসন্তি তেৰস সীসানি – পলিবোধসীসঞ্চ তণ্হা, ৱিনিবন্ধনসীসঞ্চ মানো, পৰামাসসীসঞ্চ দিট্ঠি, ৱিক্খেপসীসঞ্চ উদ্ধচ্চং, সংকিলেসসীসঞ্চ অৱিজ্জা, অধিমোক্খসীসঞ্চ সদ্ধা, পগ্গহসীসঞ্চ ৱীৰিযং, উপট্ঠানসীসঞ্চ সতি, অৱিক্খেপসীসঞ্চ সমাধি, দস্সনসীসঞ্চ পঞ্ঞা, পৱত্তসীসঞ্চ জীৱিতিন্দ্ৰিযং, গোচৰসীসঞ্চ ৱিমোক্খো, সঙ্খাৰসীসঞ্চ নিৰোধো. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘সব্বধম্মানং সম্মা সমুচ্ছেদে নিৰোধে চ অনুপট্ঠানতা পঞ্ঞা সমসীসট্ঠে ঞাণং’’.

সমসীসট্ঠঞাণনিদ্দেসো ছত্তিংসতিমো.