৩৫. পৰিনিব্বানঞাণনিদ্দেসো

৮৬. কথং সম্পজানস্স পৱত্তপৰিযাদানে পঞ্ঞা পৰিনিব্বানে ঞাণং? ইধ সম্পজানো নেক্খম্মেন কামচ্ছন্দস্স পৱত্তং পৰিযাদিযতি, অব্যাপাদেন ব্যাপাদস্স পৱত্তং পৰিযাদিযতি, আলোকসঞ্ঞায থিনমিদ্ধস্স পৱত্তং পৰিযাদিযতি, অৱিক্খেপেন উদ্ধচ্চস্স পৱত্তং পৰিযাদিযতি, ধম্মৱৱত্থানেন ৱিচিকিচ্ছায…পে… ঞাণেন অৱিজ্জায… পামোজ্জেন অৰতিযা … পঠমেন ঝানেন নীৱৰণানং পৱত্তং পৰিযাদিযতি…পে… অৰহত্তমগ্গেন সব্বকিলেসানং পৱত্তং পৰিযাদিযতি.

অথ ৱা পন সম্পজানস্স অনুপাদিসেসায নিব্বানধাতুযা পৰিনিব্বাযন্তস্স ইদঞ্চেৱ চক্খুপৱত্তং পৰিযাদিযতি, অঞ্ঞঞ্চ চক্খুপৱত্তং ন উপ্পজ্জতি. ইদঞ্চেৱ সোতপৱত্তং…পে… ঘানপৱত্তং… জিৱ্হাপৱত্তং… কাযপৱত্তং… মনোপৱত্তং পৰিযাদিযতি, অঞ্ঞঞ্চ মনোপৱত্তং ন উপ্পজ্জতি. ইদং সম্পজানস্স পৱত্তপৰিযাদানে পঞ্ঞা পৰিনিব্বানে ঞাণং. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘সম্পজানস্স পৱত্তপৰিযাদানে পঞ্ঞা পৰিনিব্বানে ঞাণং’’.

পৰিনিব্বানঞাণনিদ্দেসো পঞ্চতিংসতিমো.