৩. সমাধিভাৱনামযঞাণনিদ্দেসো

৪৩. কথং সংৱৰিত্ৱা সমাদহনে পঞ্ঞা সমাধিভাৱনামযে ঞাণং? একো সমাধি – চিত্তস্স একগ্গতা. দ্ৱে সমাধী – লোকিযো সমাধি, লোকুত্তৰো সমাধি. তযো সমাধী – সৱিতক্কসৱিচাৰো সমাধি, অৱিতক্কৱিচাৰমত্তো সমাধি, অৱিতক্কঅৱিচাৰো সমাধি. চত্তাৰো সমাধী – হানভাগিযো সমাধি, ঠিতিভাগিযো সমাধি, ৱিসেসভাগিযো সমাধি, নিব্বেধভাগিযো সমাধি. পঞ্চ সমাধী – পীতিফৰণতা, সুখফৰণতা, চেতোফৰণতা, আলোকফৰণতা, পচ্চৱেক্খণানিমিত্তং [পচ্চৱেক্খনানিমিত্তং (ক.)].

ছ সমাধী – বুদ্ধানুস্সতিৱসেন চিত্তস্স একগ্গতা অৱিক্খেপো সমাধি, ধম্মানুস্সতিৱসেন চিত্তস্স একগ্গতা অৱিক্খেপো সমাধি, সঙ্ঘানুস্সতিৱসেন চিত্তস্স একগ্গতা অৱিক্খেপো সমাধি, সীলানুস্সতিৱসেন চিত্তস্স একগ্গতা অৱিক্খেপো সমাধি, চাগানুস্সতিৱসেন চিত্তস্স একগ্গতা অৱিক্খেপো সমাধি, দেৱতানুস্সতিৱসেন চিত্তস্স একগ্গতা অৱিক্খেপো সমাধি. সত্ত সমাধী – সমাধিকুসলতা, সমাধিস্স সমাপত্তিকুসলতা, সমাধিস্স ঠিতিকুসলতা, সমাধিস্স ৱুট্ঠানকুসলতা, সমাধিস্স কল্লতাকুসলতা [কল্লিতকুসলতা (স্যা. ক.)], সমাধিস্স গোচৰকুসলতা, সমাধিস্স অভিনীহাৰকুসলতা. অট্ঠ সমাধী – পথৱীকসিণৱসেন চিত্তস্স একগ্গতা অৱিক্খেপো সমাধি, আপোকসিণৱসেন…পে… তেজোকসিণৱসেন… ৱাযোকসিণৱসেন… নীলকসিণৱসেন… পীতকসিণৱসেন… লোহিতকসিণৱসেন… ওদাতকসিণৱসেন চিত্তস্স একগ্গতা অৱিক্খেপো সমাধি. নৱ সমাধী – ৰূপাৱচৰো সমাধি অত্থি হীনো, অত্থি মজ্ঝোমো, অত্থি পণীতো; অৰূপাৱচৰো সমাধি অত্থি হীনো, অত্থি মজ্ঝোমো, অত্থি পণীতো; সুঞ্ঞতো সমাধি, অনিমিত্তো সমাধি, অপ্পণিহিতো সমাধি. দস সমাধী – উদ্ধুমাতকসঞ্ঞাৱসেন চিত্তস্স একগ্গতা অৱিক্খেপো সমাধি, ৱিনীলকসঞ্ঞাৱসেন…পে… ৱিপুব্বকসঞ্ঞাৱসেন… ৱিচ্ছিদ্দকসঞ্ঞাৱসেন… ৱিক্খাযিতকসঞ্ঞাৱসেন… ৱিক্খিত্তকসঞ্ঞাৱসেন… হতৱিক্খিত্তকসঞ্ঞাৱসেন… লোহিতকসঞ্ঞাৱসেন… পুড়ৱকসঞ্ঞাৱসেন [পুড়ুৱক সঞ্ঞাৱসেন (ক.)] … অট্ঠিকসঞ্ঞাৱসেন চিত্তস্স একগ্গতা অৱিক্খেপো সমাধি. ইমে পঞ্চপঞ্ঞাস সমাধি.

৪৪. অপি চ, পঞ্চৱীসতি সমাধিস্স সমাধিট্ঠা – পৰিগ্গহট্ঠেন সমাধি, পৰিৱাৰট্ঠেন সমাধি, পৰিপূৰট্ঠেন সমাধি, একগ্গট্ঠেন সমাধি, অৱিক্খেপট্ঠেন সমাধি, অৱিসাৰট্ঠেন সমাধি, অনাৱিলট্ঠেন সমাধি, অনিঞ্জনট্ঠেন সমাধি, ৱিমুত্তট্ঠেন সমাধি, একত্তুপট্ঠানৱসেন চিত্তস্স ঠিতত্তা সমাধি, সমং এসতীতি সমাধি, ৱিসমং নেসতীতি সমাধি, সমং এসিতত্তা সমাধি, ৱিসমং নেসিতত্তা সমাধি, সমং আদিযতীতি সমাধি, ৱিসমং নাদিযতীতি সমাধি, সমং আদিন্নত্তা সমাধি, ৱিসমং অনাদিন্নত্তা সমাধি, সমং পটিপজ্জতীতি সমাধি, ৱিসমং নপ্পটিপজ্জতীতি সমাধি, সমং পটিপন্নত্তা সমাধি, ৱিসমং নপ্পটিপন্নত্তা সমাধি, সমং ঝাযতীতি সমাধি, ৱিসমং ঝাপেতীতি সমাধি, সমং ঝাতত্তা সমাধি, ৱিসমং ঝাপিতত্তা সমাধি, সমো চ হিতো চ সুখো চাতি সমাধি. ইমে পঞ্চৱীসতি সমাধিস্স সমাধিট্ঠা. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘সংৱৰিত্ৱা সমাদহনে পঞ্ঞা সমাধিভাৱনামযে ঞাণং’’.

সমাধিভাৱনামযঞাণনিদ্দেসো ততিযো.