২৫-২৮. পটিসম্ভিদাঞাণনিদ্দেসো

৭৬. কথং অত্থনানত্তে পঞ্ঞা অত্থপটিসম্ভিদে ঞাণং, ধম্মনানত্তে পঞ্ঞা ধম্মপটিসম্ভিদে ঞাণং, নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং, পটিভাননানত্তে পঞ্ঞা পটিভানপটিসম্ভিদে ঞাণং? সদ্ধিন্দ্ৰিযং ধম্মো, ৱীৰিযিন্দ্ৰিযং ধম্মো, সতিন্দ্ৰিযং ধম্মো, সমাধিন্দ্ৰিযং ধম্মো, পঞ্ঞিন্দ্ৰিযং ধম্মো. অঞ্ঞো সদ্ধিন্দ্ৰিযং ধম্মো, অঞ্ঞো ৱীৰিযিন্দ্ৰিযং ধম্মো, অঞ্ঞো সতিন্দ্ৰিযং ধম্মো, অঞ্ঞো সমাধিন্দ্ৰিযং ধম্মো, অঞ্ঞো পঞ্ঞিন্দ্ৰিযং ধম্মো. যেন ঞাণেন ইমে নানা ধম্মা ঞাতা, তেনেৱ ঞাণেন ইমে নানা ধম্মা পটিৱিদিতাতি. তেন ৱুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

অধিমোক্খট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৱিক্খেপট্ঠো অত্থো, দস্সনট্ঠো অত্থো. অঞ্ঞো অধিমোক্খট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৱিক্খেপট্ঠো অত্থো, অঞ্ঞো দস্সনট্ঠো অত্থো. যেন ঞাণেন ইমে নানা অত্থা ঞাতা, তেনেৱ ঞাণেন ইমে নানা অত্থা পটিৱিদিতাতি. তেন ৱুচ্চতি ‘‘অত্থনানত্তে পঞ্ঞা অত্থপটিসম্ভিদে ঞাণং’’.

পঞ্চ ধম্মে সন্দস্সেতুং ব্যঞ্জননিৰুত্তাভিলাপা, পঞ্চ অত্থে সন্দস্সেতুং ব্যঞ্জননিৰুত্তাভিলাপা. অঞ্ঞা ধম্মনিৰুত্তিযো, অঞ্ঞা অত্থনিৰুত্তিযো. যেন ঞাণেন ইমা নানা নিৰুত্তিযো ঞাতা, তেনেৱ ঞাণেন ইমা নানা নিৰুত্তিযো পটিৱিদিতাতি. তেন ৱুচ্চতি – ‘‘নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং’’.

পঞ্চসু ধম্মেসু ঞাণানি, পঞ্চসু অত্থেসু ঞাণানি, দসসু নিৰুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিৰুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৱ ঞাণেন ইমে নানা ঞাণা পটিৱিদিতাতি. তেন ৱুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

৭৭. সদ্ধাবলং ধম্মো, ৱীৰিযবলং ধম্মো, সতিবলং ধম্মো, সমাধিবলং ধম্মো, পঞ্ঞাবলং ধম্মো. অঞ্ঞো সদ্ধাবলং ধম্মো, অঞ্ঞো ৱীৰিযবলং ধম্মো, অঞ্ঞো সতিবলং ধম্মো, অঞ্ঞো সমাধিবলং ধম্মো, অঞ্ঞো পঞ্ঞাবলং ধম্মো. যেন ঞাণেন ইমে নানা ধম্মা ঞাতা, তেনেৱ ঞাণেন ইমে নানা ধম্মা পটিৱিদিতাতি. তেন ৱুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

অস্সদ্ধিযে অকম্পিযট্ঠো অত্থো. কোসজ্জে অকম্পিযট্ঠো অত্থো. পমাদে অকম্পিযট্ঠো অত্থো. উদ্ধচ্চে অকম্পিযট্ঠো অত্থো. অৱিজ্জায অকম্পিযট্ঠো অত্থো. অঞ্ঞো অস্সদ্ধিযে অকম্পিযট্ঠো অত্থো, অঞ্ঞো কোসজ্জে অকম্পিযট্ঠো অত্থো, অঞ্ঞো পমাদে অকম্পিযট্ঠো অত্থো, অঞ্ঞো উদ্ধচ্চে অকম্পিযট্ঠো অত্থো, অঞ্ঞো অৱিজ্জায অকম্পিযট্ঠো অত্থো. যেন ঞাণেন ইমে নানা অত্থা ঞাতা, তেনেৱ ঞাণেন ইমে নানা অত্থা পটিৱিদিতাতি. তেন ৱুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

পঞ্চসু [পঞ্চ (?)] ধম্মেসু ঞাণানি, পঞ্চসু [পঞ্চ (?)] অত্থেসু ঞাণানি, দসসু [দস (?)] নিৰুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিৰুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৱ ঞাণেন ইমে নানা ঞাণা পটিৱিদিতাতি. তেন ৱুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

সতিসম্বোজ্ঝঙ্গো ধম্মো, ধম্মৱিচযসম্বোজ্ঝঙ্গো ধম্মো, ৱীৰিযসম্বোজ্ঝঙ্গো ধম্মো, পীতিসম্বোজ্ঝঙ্গো ধম্মো, পস্সদ্ধিসম্বোজ্ঝঙ্গো ধম্মো, সমাধিসম্বোজ্ঝঙ্গো ধম্মো, উপেক্খাসম্বোজ্ঝঙ্গো ধম্মো. অঞ্ঞো সতিসম্বোজ্ঝঙ্গো ধম্মো, অঞ্ঞো ধম্মৱিচযসম্বোজ্ঝঙ্গো ধম্মো, অঞ্ঞো ৱীৰিযসম্বোজ্ঝঙ্গো ধম্মো, অঞ্ঞো পীতিসম্বোজ্ঝঙ্গো ধম্মো, অঞ্ঞো পস্সদ্ধিসম্বোজ্ঝঙ্গো ধম্মো, অঞ্ঞো সমাধিসম্বোজ্ঝঙ্গো ধম্মো, অঞ্ঞো উপেক্খাসম্বোজ্ঝঙ্গো ধম্মো. যেন ঞাণেন ইমে নানা ধম্মা ঞাতা, তেনেৱ ঞাণেন ইমে নানা ধম্মা পটিৱিদিতাতি. তেন ৱুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

উপট্ঠানট্ঠো অত্থো, পৱিচযট্ঠো অত্থো, পগ্গহট্ঠো অত্থো, ফৰণট্ঠো অত্থো, উপসমট্ঠো অত্থো, অৱিক্খেপট্ঠো অত্থো, পটিসঙ্খানট্ঠো অত্থো. অঞ্ঞো উপট্ঠানট্ঠো অত্থো, অঞ্ঞো পৱিচযট্ঠো অত্থো, অঞ্ঞো পগ্গহট্ঠো অত্থো, অঞ্ঞো ফৰণট্ঠো অত্থো, অঞ্ঞো উপসমট্ঠো অত্থো, অঞ্ঞো অৱিক্খেপট্ঠো অত্থো, অঞ্ঞো পটিসঙ্খানট্ঠো অত্থো. যেন ঞাণেন ইমে নানা অত্থা ঞাতা, তেনেৱ ঞাণেন ইমে নানা অত্থা পটিৱিদিতাতি. তেন ৱুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

সত্ত ধম্মে সন্দস্সেতুং ব্যঞ্জননিৰুত্তাভিলাপা, সত্ত অত্থে সন্দস্সেতুং ব্যঞ্জননিৰুত্তাভিলাপা. অঞ্ঞা ধম্মনিৰুত্তিযো, অঞ্ঞা অত্থনিৰুত্তিযো. যেন ঞাণেন ইমা নানা নিৰুত্তিযো ঞাতা, তেনেৱ ঞাণেন ইমা নানা নিৰুত্তিযো পটিৱিদিতাতি. তেন ৱুচ্চতি – ‘‘নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং’’.

সত্তসু ধম্মেসু ঞাণানি, সত্তসু অত্থেসু ঞাণানি, চুদ্দসসু নিৰুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিৰুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৱ ঞাণেন ইমে নানা ঞাণা পটিৱিদিতাতি. তেন ৱুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’.

সম্মাদিট্ঠি ধম্মো, সম্মাসঙ্কপ্পো ধম্মো, সম্মাৱাচা ধম্মো, সম্মাকম্মন্তো ধম্মো, সম্মাআজীৱো ধম্মো, সম্মাৱাযামো ধম্মো, সম্মাসতি ধম্মো, সম্মাসমাধি ধম্মো. অঞ্ঞো সম্মাদিট্ঠি ধম্মো, অঞ্ঞো সম্মাসঙ্কপ্পো ধম্মো, অঞ্ঞো সম্মাৱাচা ধম্মো, অঞ্ঞো সম্মাকম্মন্তো ধম্মো, অঞ্ঞো সম্মাআজীৱো ধম্মো, অঞ্ঞো সম্মাৱাযামো ধম্মো, অঞ্ঞো সম্মাসতি ধম্মো, অঞ্ঞো সম্মাসমাধি ধম্মো. যেন ঞাণেন ইমে নানা ধম্মা ঞাতা, তেনেৱ ঞাণেন ইমে নানা ধম্মা পটিৱিদিতাতি. তেন ৱুচ্চতি – ‘‘ধম্মনানত্তে পঞ্ঞা ধম্মপটিসম্ভিদে ঞাণং’’.

দস্সনট্ঠো অত্থো, অভিনিৰোপনট্ঠো অত্থো, পৰিগ্গহট্ঠো অত্থো, সমুট্ঠানট্ঠো অত্থো, ৱোদানট্ঠো অত্থো, পগ্গহট্ঠো অত্থো, উপট্ঠানট্ঠো অত্থো, অৱিক্খেপট্ঠো অত্থো. অঞ্ঞো দস্সনট্ঠো অত্থো, অঞ্ঞো অভিনিৰোপনট্ঠো অত্থো, অঞ্ঞো পৰিগ্গহট্ঠো অত্থো, অঞ্ঞো সমুট্ঠানট্ঠো অত্থো, অঞ্ঞো ৱোদানট্ঠো অত্থো, অঞ্ঞো পগ্গহট্ঠো অত্থো, অঞ্ঞো উপট্ঠানট্ঠো অত্থো, অঞ্ঞো অৱিক্খেপট্ঠো অত্থো. যেন ঞাণেন ইমে নানা অত্থা ঞাতা তেনেৱ ঞাণেন ইমে নানা অত্থা পটিৱিদিতাতি. তেন ৱুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং’’.

অট্ঠ ধম্মে সন্দস্সেতুং ব্যঞ্জননিৰুত্তাভিলাপা, অট্ঠ অত্থে সন্দস্সেতুং ব্যঞ্জননিৰুত্তাভিলাপা. অঞ্ঞা ধম্মনিৰুত্তিযো, অঞ্ঞা অত্থনিৰুত্তিযো. যেন ঞাণেন ইমা নানা নিৰুত্তিযো ঞাতা, তেনেৱ ঞাণেন ইমা নানা নিৰুত্তিযো পটিৱিদিতাতি. তেন ৱুচ্চতি – ‘‘নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং’’.

অট্ঠসু ধম্মেসু ঞাণানি, অট্ঠসু অত্থেসু ঞাণানি সোড়সসু নিৰুত্তীসু ঞাণানি. অঞ্ঞানি ধম্মেসু ঞাণানি, অঞ্ঞানি অত্থেসু ঞাণানি, অঞ্ঞানি নিৰুত্তীসু ঞাণানি. যেন ঞাণেন ইমে নানা ঞাণা ঞাতা, তেনেৱ ঞাণেন ইমে নানা ঞাণা পটিৱিদিতাতি. তেন ৱুচ্চতি – ‘‘পটিভাননানত্তে পঞ্ঞা পটিভানপটিসম্ভিদে ঞাণং’’. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘অত্থনানত্তে পঞ্ঞা অত্থপটিসম্ভিদে ঞাণং. ধম্মনানত্তে পঞ্ঞা ধম্মপটিসম্ভিদে ঞাণং. নিৰুত্তিনানত্তে পঞ্ঞা নিৰুত্তিপটিসম্ভিদে ঞাণং. পটিভাননানত্তে পঞ্ঞা পটিভানপটিসম্ভিদে ঞাণং’’.

পটিসম্ভিদাঞাণনিদ্দেসো অট্ঠৱীসতিমো.