১৬. গোচৰনানত্তঞাণনিদ্দেসো

৬৭. কথং বহিদ্ধা ৱৱত্থানে পঞ্ঞা গোচৰনানত্তে ঞাণং? কথং বহিদ্ধা ধম্মে ৱৱত্থেতি? ৰূপে বহিদ্ধা ৱৱত্থেতি, সদ্দে বহিদ্ধা ৱৱত্থেতি, গন্ধে বহিদ্ধা ৱৱত্থেতি, ৰসে বহিদ্ধা ৱৱত্থেতি, ফোট্ঠব্বে বহিদ্ধা ৱৱত্থেতি, ধম্মে বহিদ্ধা ৱৱত্থেতি.

কথং ৰূপে বহিদ্ধা ৱৱত্থেতি? ৰূপা অৱিজ্জাসম্ভূতাতি ৱৱত্থেতি ৰূপা তণ্হাসম্ভূতাতি ৱৱত্থেতি, ৰূপা কম্মসম্ভূতাতি ৱৱত্থেতি, ৰূপা আহাৰসম্ভূতাতি ৱৱত্থেতি, ৰূপা চতুন্নং মহাভূতানং উপাদাযাতি ৱৱত্থেতি, ৰূপা উপ্পন্নাতি ৱৱত্থেতি, ৰূপা সমুদাগতাতি ৱৱত্থেতি. ৰূপা অহুত্ৱা সম্ভূতা, হুত্ৱা ন ভৱিস্সন্তীতি ৱৱত্থেতি. ৰূপে অন্তৱন্ততো ৱৱত্থেতি, ৰূপা অদ্ধুৱা অসস্সতা ৱিপৰিণামধম্মাতি ৱৱত্থেতি. ৰূপা অনিচ্চা সঙ্খতা পটিচ্চসমুপ্পন্না খযধম্মা ৱযধম্মা ৱিৰাগধম্মা নিৰোধধম্মাতি ৱৱত্থেতি. ৰূপে অনিচ্চতো ৱৱত্থেতি, নো নিচ্চতো; দুক্খতো ৱৱত্থেতি, নো সুখতো; অনত্ততো ৱৱত্থেতি, নো অত্ততো; নিব্বিন্দতি, নো নন্দতি; ৱিৰজ্জতি, নো ৰজ্জতি; নিৰোধেতি, নো সমুদেতি; পটিনিস্সজ্জতি, নো আদিযতি. অনিচ্চতো ৱৱত্থেন্তো নিচ্চসঞ্ঞং পজহতি, দুক্খতো ৱৱত্থেন্তো সুখসঞ্ঞং পজহতি, অনত্ততো ৱৱত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৱিৰজ্জন্তো ৰাগং পজহতি, নিৰোধেন্তো সমুদযং পজহতি, পটিনিস্সজ্জন্তো আদানং পজহতি. এৱং ৰূপে বহিদ্ধা ৱৱত্থেতি.

কথং সদ্দে বহিদ্ধা ৱৱত্থেতি? সদ্দা অৱিজ্জাসম্ভূতাতি ৱৱত্থেতি…পে… সদ্দা চতুন্নং মহাভূতানং উপাদাযাতি ৱৱত্থেতি, সদ্দা উপ্পন্নাতি ৱৱত্থেতি, সদ্দা সমুদাগতাতি ৱৱত্থেতি. সদ্দা অহুত্ৱা সম্ভূতা, হুত্ৱা ন ভৱিস্সন্তীতি ৱৱত্থেতি. সদ্দে অন্তৱন্ততো ৱৱত্থেতি, সদ্দা অদ্ধুৱা অসস্সতা ৱিপৰিণামধম্মাতি ৱৱত্থেতি, সদ্দা অনিচ্চা সঙ্খতা পটিচ্চসমুপ্পন্না খযধম্মা ৱযধম্মা ৱিৰাগধম্মা নিৰোধধম্মাতি ৱৱত্থেতি. সদ্দে অনিচ্চতো ৱৱত্থেতি, নো নিচ্চতো…পে… এৱং সদ্দে বহিদ্ধা ৱৱত্থেতি.

কথং গন্ধে বহিদ্ধা ৱৱত্থেতি? গন্ধা অৱিজ্জাসম্ভূতাতি ৱৱত্থেতি, গন্ধা তণ্হাসম্ভূতাতি ৱৱত্থেতি…পে… এৱং গন্ধে বহিদ্ধা ৱৱত্থেতি. কথং ৰসে বহিদ্ধা ৱৱত্থেতি? ৰসা অৱিজ্জাসম্ভূতাতি ৱৱত্থেতি, ৰসা তণ্হাসম্ভূতাতি ৱৱত্থেতি…পে… এৱং ৰসে বহিদ্ধা ৱৱত্থেতি. কথং ফোট্ঠব্বে বহিদ্ধা ৱৱত্থেতি? ফোট্ঠব্বা অৱিজ্জাসম্ভূতাতি ৱৱত্থেতি, ফোট্ঠব্বা তণ্হাসম্ভূতাতি ৱৱত্থেতি, ফোট্ঠব্বা কম্মসম্ভূতাতি ৱৱত্থেতি, ফোট্ঠব্বা আহাৰসম্ভূতাতি ৱৱত্থেতি, ফোট্ঠব্বা উপ্পন্নাতি ৱৱত্থেতি. ফোট্ঠব্বা সমুদাগতাতি ৱৱত্থেতি…পে… এৱং ফোট্ঠব্বে বহিদ্ধা ৱৱত্থেতি.

কথং ধম্মে বহিদ্ধা ৱৱত্থেতি? ধম্মা অৱিজ্জাসম্ভূতাতি ৱৱত্থেতি, ধম্মা তণ্হাসম্ভূতাতি ৱৱত্থেতি, ধম্মা কম্মসম্ভূতাতি ৱৱত্থেতি, ধম্মা আহাৰসম্ভূতাতি ৱৱত্থেতি, ধম্মা উপ্পন্নাতি ৱৱত্থেতি, ধম্মা সমুদাগতাতি ৱৱত্থেতি. ধম্মা অহুত্ৱা সম্ভূতা, হুত্ৱা ন ভৱিস্সন্তীতি ৱৱত্থেতি. ধম্মে অন্তৱন্ততো ৱৱত্থেতি, ধম্মা অদ্ধুৱা অসস্সতা ৱিপৰিণামধম্মাতি ৱৱত্থেতি, ধম্মা অনিচ্চা সঙ্খতা পটিচ্চসমুপ্পন্না খযধম্মা ৱযধম্মা ৱিৰাগধম্মা নিৰোধধম্মাতি ৱৱত্থেতি. ধম্মে অনিচ্চতো ৱৱত্থেতি, নো নিচ্চতো; দুক্খতো ৱৱত্থেতি, নো সুখতো; অনত্ততো ৱৱত্থেতি, নো অত্ততো; নিব্বিন্দতি, নো নন্দতি; ৱিৰজ্জতি, নো ৰজ্জতি; নিৰোধেতি, নো সমুদেতি; পটিনিস্সজ্জতি, নো আদিযতি…পে… অনিচ্চতো ৱৱত্থেন্তো নিচ্চসঞ্ঞং পজহতি, দুক্খতো ৱৱত্থেন্তো সুখসঞ্ঞং পজহতি, অনত্ততো ৱৱত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৱিৰজ্জন্তো ৰাগং পজহতি, নিৰোধেন্তো সমুদযং পজহতি, পটিনিস্সজ্জন্তো আদানং পজহতি. এৱং ধম্মে বহিদ্ধা ৱৱত্থেতি. তং ঞাতট্ঠেন ঞাণং, পজাননট্ঠেন পঞ্ঞা. তেন ৱুচ্চতি – ‘‘বহিদ্ধা ৱৱত্থানে পঞ্ঞা গোচৰনানত্তে ঞাণং’’.

গোচৰনানত্তঞাণনিদ্দেসো সোড়সমো.