১২. ওতৰণহাৰসম্পাতো

৭৪. তত্থ কতমো ওতৰণো হাৰসম্পাতো?

‘‘তস্মা ৰক্খিতচিত্তস্স, সম্মাসঙ্কপ্পগোচৰো’’তি গাথা. ‘‘তস্মা ৰক্খিতচিত্তস্স, সম্মাসঙ্কপ্পগোচৰো’’. ‘‘সম্মাদিট্ঠিপুৰেক্খাৰো’’তি সম্মাদিট্ঠিযা গহিতায গহিতানি ভৱন্তি পঞ্চিন্দ্ৰিযানি, অযং ইন্দ্ৰিযেহি ওতৰণা.

তানিযেৱ ইন্দ্ৰিযানি ৱিজ্জা, ৱিজ্জুপ্পাদা অৱিজ্জানিৰোধো, অৱিজ্জানিৰোধা সঙ্খাৰনিৰোধো, সঙ্খাৰনিৰোধা ৱিঞ্ঞাণনিৰোধো, এৱং সব্বং, অযং পটিচ্চসমুপ্পাদেন ওতৰণা.

তানিযেৱ পঞ্চিন্দ্ৰিযানি তীহি খন্ধেহি সঙ্গহিতানি – সীলক্খন্ধেন সমাধিক্খন্ধেন পঞ্ঞাক্খন্ধেন. অযং খন্ধেহি ওতৰণা.

তানি যেৱ পঞ্চিন্দ্ৰিযানি সঙ্খাৰপৰিযাপন্নানি. যে সঙ্খাৰা অনাসৱা নো চ ভৱঙ্গা, তে সঙ্খাৰা ধম্মধাতুসঙ্গহিতা, অযং ধাতূহি ওতৰণা.

সা ধম্মধাতু ধম্মাযতনপৰিযাপন্না, যং আযতনং অনাসৱং নো চ ভৱঙ্গং, অযং আযতনেহি ওতৰণা.

নিযুত্তো ওতৰণো হাৰসম্পাতো.