১৮. পাৰাযনানুগীতিগাথা

১৫৬. ‘‘পাৰাযনমনুগাযিস্সং, [ইচ্চাযস্মা পিঙ্গিযো]

যথাদ্দক্খি তথাক্খাসি, ৱিমলো ভূৰিমেধসো;

নিক্কামো নিব্বনো [নিব্বুতো (স্যা.)] নাগো, কিস্স হেতু মুসা ভণে.

১৫৭. ‘‘পহীনমলমোহস্স, মানমক্খপ্পহাযিনো;

হন্দাহং কিত্তযিস্সামি, গিৰং ৱণ্ণূপসঞ্হিতং.

১৫৮. ‘‘তমোনুদো বুদ্ধো সমন্তচক্খু, লোকন্তগূ সব্বভৱাতিৱত্তো;

অনাসৱো সব্বদুক্খপ্পহীনো, সচ্চৱ্হযো ব্ৰহ্মে উপাসিতো মে.

১৫৯. ‘‘দিজো যথা কুব্বনকং পহায, বহুপ্ফলং কাননমাৱসেয্য;

এৱম্পহং অপ্পদস্সে পহায, মহোদধিং হংসোৰিৱ অজ্ঝপত্তো.

১৬০. ‘‘যেমে পুব্বে ৱিযাকংসু, হুৰং গোতমসাসনা;

ইচ্চাসি ইতি ভৱিস্সতি;

সব্বং তং ইতিহীতিহং, সব্বং তং তক্কৱড্ঢনং.

১৬১. ‘‘একো তমনুদাসিনো, জুতিমা সো পভঙ্কৰো;

গোতমো ভূৰিপঞ্ঞাণো, গোতমো ভূৰিমেধসো.

১৬২. ‘‘যো মে ধম্মমদেসেসি, সন্দিট্ঠিকমকালিকং;

তণ্হক্খযমনীতিকং, যস্স নত্থি উপমা ক্ৱচি’’.

১৬৩. ‘‘কিং নু তম্হা ৱিপ্পৱসসি, মুহুত্তমপি পিঙ্গিয;

গোতমা ভূৰিপঞ্ঞাণা, গোতমা ভূৰিমেধসা.

১৬৪. ‘‘যো তে ধম্মমদেসেসি, সন্দিট্ঠিকমকালিকং;

তণ্হক্খযমনীতিকং, যস্স নত্থি উপমা ক্ৱচি’’.

১৬৫. ‘‘নাহং তম্হা ৱিপ্পৱসামি, মুহুত্তমপি ব্ৰাহ্মণ;

গোতমা ভূৰিপঞ্ঞাণা, গোতমা ভূৰিমেধসা.

১৬৬. ‘‘যো মে ধম্মমদেসেসি, সন্দিট্ঠিকমকালিকং;

তণ্হক্খযমনীতিকং, যস্স নত্থি উপমা ক্ৱচি.

১৬৭. ‘‘পস্সামি নং মনসা চক্খুনাৱ, ৰত্তিন্দিৱং ব্ৰাহ্মণ অপ্পমত্তো.

নমস্সমানো ৱিৱসেমি ৰত্তিং, তেনেৱ মঞ্ঞামি অৱিপ্পৱাসং.

১৬৮. ‘‘সদ্ধা চ পীতি চ মনো সতি চ,

নাপেন্তিমে গোতমসাসনম্হা;

যং যং দিসং ৱজতি ভূৰিপঞ্ঞো, স তেন তেনেৱ নতোহমস্মি.

১৬৯. ‘‘জিণ্ণস্স মে দুব্বলথামকস্স, তেনেৱ কাযো ন পলেতি তত্থ;

সঙ্কপ্পযন্তায [সংকপ্পযত্তায (সী.)] ৱজামি নিচ্চং, মনো হি মে ব্ৰাহ্মণ তেন যুত্তো.

১৭০. ‘‘পঙ্কে সযানো পৰিফন্দমানো, দীপা দীপং উপল্লৱিং;

অথদ্দসাসিং সম্বুদ্ধং, ওঘতিণ্ণমনাসৱং.

১৭১. ‘‘যথা অহূ ৱক্কলি মুত্তসদ্ধো, ভদ্ৰাৱুধো আড়ৱিগোতমো চ;

এৱমেৱ ত্ৱম্পি পমুঞ্চস্সু সদ্ধং, গমিস্সসি ত্ৱং পিঙ্গিয মচ্চুধেয্যস্স পাৰং’’ [মচ্চুধেয্যপাৰং (সী.)].

১৭২. ‘‘এস ভিয্যো পসীদামি, সুত্ৱান মুনিনো ৱচো;

ৱিৱট্টচ্ছদো সম্বুদ্ধো, অখিলো পটিভানৱা.

১৭৩. ‘‘অধিদেৱে অভিঞ্ঞায, সব্বং ৱেদি পৰোপৰং;

পঞ্হানন্তকৰো সত্থা, কঙ্খীনং পটিজানতং.

১৭৪. ‘‘অসংহীৰং অসংকুপ্পং, যস্স নত্থি উপমা ক্ৱচি;

অদ্ধা গমিস্সামি ন মেত্থ কঙ্খা, এৱং মং ধাৰেহি অধিমুত্তচিত্ত’’ন্তি [অজিতমাণৱপুচ্ছায পট্ঠায যাৱপাৰাযনানুগীতিগাতাপৰিযোসানা স্যা. … পোত্থকে নত্থি].

পাৰাযনানুগীতিগাথা নিট্ঠিতা.