১৪. পোসালমাণৱপুচ্ছা

১৩৭. ‘‘যো অতীতং আদিসতি, [ইচ্চাযস্মা পোসালো]

অনেজো ছিন্নসংসযো;

পাৰগুং সব্বধম্মানং, অত্থি পঞ্হেন আগমং.

১৩৮. ‘‘ৱিভূতৰূপসঞ্ঞিস্স, সব্বকাযপ্পহাযিনো;

অজ্ঝত্তঞ্চ বহিদ্ধা চ, নত্থি কিঞ্চীতি পস্সতো;

ঞাণং সক্কানুপুচ্ছামি, কথং নেয্যো তথাৱিধো’’.

১৩৯. ‘‘ৱিঞ্ঞাণট্ঠিতিযো সব্বা, [পোসালাতি ভগৱা]

অভিজানং তথাগতো;

তিট্ঠন্তমেনং জানাতি, ৱিমুত্তং তপ্পৰাযণং.

১৪০. ‘‘আকিঞ্চঞ্ঞসম্ভৱং ঞত্ৱা, নন্দী সংযোজনং ইতি;

এৱমেতং অভিঞ্ঞায, ততো তত্থ ৱিপস্সতি;

এতং [এৱং (স্যা. ক.)] ঞাণং তথং তস্স, ব্ৰাহ্মণস্স ৱুসীমতো’’তি.

পোসালমাণৱপুচ্ছা চুদ্দসমা.