১৫. মোঘৰাজমাণৱপুচ্ছা

১৪১. ‘‘দ্ৱাহং সক্কং অপুচ্ছিস্সং, [ইচ্চাযস্মা মোঘৰাজা]

ন মে ব্যাকাসি চক্খুমা;

যাৱততিযঞ্চ দেৱীসি, ব্যাকৰোতীতি মে সুতং.

১৪২. ‘‘অযং লোকো পৰো লোকো, ব্ৰহ্মলোকো সদেৱকো;

দিট্ঠিং তে নাভিজানাতি, গোতমস্স যসস্সিনো.

১৪৩. ‘‘এৱং অভিক্কন্তদস্সাৱিং, অত্থি পঞ্হেন আগমং;

কথং লোকং অৱেক্খন্তং, মচ্চুৰাজা ন পস্সতি’’.

১৪৪. ‘‘সুঞ্ঞতো লোকং অৱেক্খস্সু, মোঘৰাজ সদা সতো;

অত্তানুদিট্ঠিং ঊহচ্চ, এৱং মচ্চুতৰো সিযা;

এৱং লোকং অৱেক্খন্তং, মচ্চুৰাজা ন পস্সতী’’তি.

মোঘৰাজমাণৱপুচ্ছা পন্নৰসমা.