১৩. উদযমাণৱপুচ্ছা

১৩০. ‘‘ঝাযিং ৱিৰজমাসীনং, [ইচ্চাযস্মা উদযো]

কতকিচ্চং অনাসৱং;

পাৰগুং সব্বধম্মানং, অত্থি পঞ্হেন আগমং;

অঞ্ঞাৱিমোক্খং পব্ৰূহি, অৱিজ্জায পভেদনং’’.

১৩১. ‘‘পহানং কামচ্ছন্দানং, [উদযাতি ভগৱা]

দোমনস্সান চূভযং;

থিনস্স চ পনূদনং, কুক্কুচ্চানং নিৱাৰণং.

১৩২. ‘‘উপেক্খাসতিসংসুদ্ধং, ধম্মতক্কপুৰেজৱং;

অঞ্ঞাৱিমোক্খং পব্ৰূমি, অৱিজ্জায পভেদনং’’.

১৩৩. ‘‘কিংসু সংযোজনো লোকো, কিংসু তস্স ৱিচাৰণং;

কিস্সস্স ৱিপ্পহানেন, নিব্বানং ইতি ৱুচ্চতি’’.

১৩৪. ‘‘নন্দিসংযোজনো লোকো, ৱিতক্কস্স ৱিচাৰণং;

তণ্হায ৱিপ্পহানেন, নিব্বানং ইতি ৱুচ্চতি’’.

১৩৫. ‘‘কথং সতস্স চৰতো, ৱিঞ্ঞাণং উপৰুজ্ঝতি;

ভগৱন্তং পুট্ঠুমাগম্ম, তং সুণোম ৱচো তৱ’’.

১৩৬. ‘‘অজ্ঝত্তঞ্চ বহিদ্ধা চ, ৱেদনং নাভিনন্দতো;

এৱং সতস্স চৰতো, ৱিঞ্ঞাণং উপৰুজ্ঝতী’’তি.

উদযমাণৱপুচ্ছা তেৰসমা.