৫. অগদঙ্গপঞ্হো

৫. ‘‘ভন্তে নাগসেন, ‘অগদস্স দ্ৱে অঙ্গানি গহেতব্বানী’তি যং ৱদেসি, কতমানি তানি দ্ৱে অঙ্গানি গহেতব্বানী’’তি. ‘‘যথা, মহাৰাজ, অগদে কিমী ন সণ্ঠহন্তি, এৱমেৱ খো, মহাৰাজ, যোগিনা যোগাৱচৰেন মানসে কিলেসা ন সণ্ঠপেতব্বা. ইদং, মহাৰাজ, অগদস্স পঠমং অঙ্গং গহেতব্বং.

‘‘পুন চপৰং, মহাৰাজ, অগদো দট্ঠফুট্ঠদিট্ঠঅসিতপীতখাযিতসাযিতং সব্বং ৱিসং পটিহনতি, এৱমেৱ খো, মহাৰাজ, যোগিনা যোগাৱচৰেন ৰাগদোসমোহমানদিট্ঠিৱিসং সব্বং পটিহনিতব্বং. ইদং, মহাৰাজ, অগদস্স দুতিযং অঙ্গং গহেতব্বং. ভাসিতম্পেতং, মহাৰাজ, ভগৱতা দেৱাতিদেৱেন –

‘‘‘সঙ্খাৰানং সভাৱত্থং, দট্ঠুকামেন যোগিনা;

অগদেনেৱ হোতব্বং, কিলেসৱিসনাসনে’’’তি.

অগদঙ্গপঞ্হো পঞ্চমো.