২. কাড়াযসঙ্গপঞ্হো

২. ‘‘ভন্তে নাগসেন, ‘কাড়াযসস্স [কাড়হংসস্স (ক.)] দ্ৱে অঙ্গানি গহেতব্বানী’তি যং ৱদেসি, কতমানি তানি দ্ৱে অঙ্গানি গহেতব্বানী’’তি? ‘‘যথা, মহাৰাজ, কাড়াযসো সুপীতো [সুথিতো (ক.)] ৱমতি [ৱহতি (স্যা. ক.)], এৱমেৱ খো, মহাৰাজ, যোগিনো যোগাৱচৰস্স মানসং যোনিসো মনসিকাৰেন [যোনিসো মনসিকাৰে (সী. স্যা. ক.)] অপীতং ৱমতি. ইদং, মহাৰাজ, কাড়াযসস্স পঠমং অঙ্গং গহেতব্বং.

‘‘পুন চপৰং, মহাৰাজ, কাড়াযসো সকিং পীতং উদকং ন ৱমতি, এৱমেৱ খো, মহাৰাজ, যোগিনা যোগাৱচৰেন যো সকিং উপ্পন্নো পসাদো, ন পুন সো ৱমিতব্বো ‘উড়াৰো সো ভগৱা সম্মাসম্বুদ্ধো, স্ৱাক্খাতো ধম্মো, সুপ্পটিপন্নো সঙ্ঘো’তি. ‘ৰূপং অনিচ্চং, ৱেদনা অনিচ্চা, সঞ্ঞা অনিচ্চা, সঙ্খাৰা অনিচ্চা, ৱিঞ্ঞাণং অনিচ্চন্তি যং সকিং উপ্পন্নং ঞাণং, ন পুন তং ৱমিতব্বং. ইদং, মহাৰাজ, কাড়াযসস্স দুতিযং অঙ্গং গহেতব্বং. ভাসিতম্পেতং, মহাৰাজ, ভগৱতা দেৱাতিদেৱেন –

‘‘‘দস্সনম্হি পৰিসোধিতো [পৰিসোধিকে (সী. ক.)] নৰো, অৰিযধম্মে নিযতো ৱিসেসগূ;

নপ্পৱেধতি অনেকভাগসো, সব্বসো চ মুখভাৱমেৱ সো’’’তি.

কাড়াযসঙ্গপঞ্হো দুতিযো.