৭. মণিৰতনঙ্গপঞ্হো

৭. ‘‘ভন্তে নাগসেন, ‘মণিৰতনস্স তীণি অঙ্গানি গহেতব্বানী’তি যং ৱদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহাৰাজ, মণিৰতনং একন্তপৰিসুদ্ধং, এৱমেৱ খো, মহাৰাজ, যোগিনা যোগাৱচৰেন একন্তপৰিসুদ্ধাজীৱেন ভৱিতব্বং. ইদং, মহাৰাজ, মণিৰতনস্স পঠমং অঙ্গং গহেতব্বং.

‘‘পুন চপৰং, মহাৰাজ, মণিৰতনং ন কেনচি সদ্ধিং মিস্সীযতি, এৱমেৱ খো, মহাৰাজ, যোগিনা যোগাৱচৰেন পাপেহি পাপসহাযেহি সদ্ধিং ন মিস্সিতব্বং. ইদং, মহাৰাজ, মণিৰতনস্স দুতিযং অঙ্গং গহেতব্বং.

‘‘পুন চপৰং, মহাৰাজ, মণিৰতনং জাতিৰতনেহি যোজীযতি, এৱমেৱ খো, মহাৰাজ, যোগিনা যোগাৱচৰেন উত্তমৱৰজাতিমন্তেহি সদ্ধিং সংৱসিতব্বং, পটিপন্নকফলট্ঠসেক্খফলসমঙ্গীহি সোতাপন্নসকদাগামিঅনাগামিঅৰহন্ততেৱিজ্জছড়ভিঞ্ঞসমণমণিৰতনেহি সদ্ধিং সংৱসিতব্বং. ইদং, মহাৰাজ, মণিৰতনস্স ততিযং অঙ্গং গহেতব্বং. ভাসিতম্পেতং, মহাৰাজ, ভগৱতা দেৱাতিদেৱেন সুত্তনিপাতে –

‘‘‘সুদ্ধা সুদ্ধেহি সংৱাসং, কপ্পযৱ্হো পতিস্সতা;

ততো সমগ্গা নিপকা, দুক্খস্সন্তং কৰিস্সথা’’’তি.

মণিৰতনপঞ্হো সত্তমো.