৩. বীজঙ্গপঞ্হো

৩. ‘‘ভন্তে নাগসেন, ‘বীজস্স দ্ৱে অঙ্গানি গহেতব্বানী’তি যং ৱদেসি, কতমানি তানি দ্ৱে অঙ্গানি গহেতব্বানী’’তি? ‘‘যথা, মহাৰাজ, বীজং অপ্পকম্পি সমানং ভদ্দকে খেত্তে ৱুত্তং দেৱে সম্মা ধাৰং পৱেচ্ছন্তে সুবহূনি ফলানি অনুদস্সতি, এৱমেৱ খো, মহাৰাজ, যোগিনা যোগাৱচৰেন যথা পটিপাদিতং সীলং কেৱলং সামঞ্ঞফলমনুদস্সতি. এৱং সম্মা পটিপজ্জিতব্বং. ইদং, মহাৰাজ, বীজস্স পঠমং অঙ্গং গহেতব্বং.

‘‘পুন চপৰং, মহাৰাজ, বীজং সুপৰিসোধিতে খেত্তে ৰোপিতং খিপ্পমেৱ সংৱিৰূহতি, এৱমেৱ খো, মহাৰাজ, যোগিনা যোগাৱচৰেন মানসং সুপৰিগ্গহিতং সুঞ্ঞাগাৰে পৰিসোধিতং সতিপট্ঠানখেত্তৱৰে খিত্তং খিপ্পমেৱ ৱিৰূহতি. ইদং, মহাৰাজ, বীজস্স দুতিযং অঙ্গং গহেতব্বং. ভাসিতম্পেতং, মহাৰাজ, থেৰেন অনুৰুদ্ধেন –

‘‘‘যথাপি খেত্তে [যথা খেত্তে (সী.)] পৰিসুদ্ধে, বীজঞ্চস্স পতিট্ঠিতং;

ৱিপুলং তস্স ফলং হোতি, অপি তোসেতি কস্সকং.

‘‘‘তথেৱ যোগিনো চিত্তং, সুঞ্ঞাগাৰে ৱিসোধিতং;

সতিপট্ঠানখেত্তম্হি, খিপ্পমেৱ ৱিৰূহতী’’’তি.

বীজঙ্গপঞ্হো ততিযো.