৬. কম্মজাদিপঞ্হো

৬. ‘‘ভন্তে নাগসেন, কতমে এত্থ কম্মজা, কতমে হেতুজা, কতমে উতুজা, কতমে ন কম্মজা, ন হেতুজা, ন উতুজা’’তি? ‘‘যে কেচি, মহাৰাজ, সত্তা সচেতনা, সব্বে তে কম্মজা; অগ্গি চ সব্বানি চ বীজজাতানি হেতুজানি; পথৱী চ পব্বতা চ উদকঞ্চ ৱাতো চ, সব্বে তে উতুজা; আকাসো চ নিব্বানঞ্চ ইমে দ্ৱে অকম্মজা অহেতুজা অনুতুজা. নিব্বানং পন, মহাৰাজ, ন ৱত্তব্বং কম্মজন্তি ৱা হেতুজন্তি ৱা উতুজন্তি ৱা উপ্পন্নন্তি ৱা অনুপ্পন্নন্তি ৱা উপ্পাদনীযন্তি ৱা অতীতন্তি ৱা অনাগতন্তি ৱা পচ্চুপ্পন্নন্তি ৱা চক্খুৱিঞ্ঞেয্যন্তি ৱা সোতৱিঞ্ঞেয্যন্তি ৱা ঘানৱিঞ্ঞেয্যন্তি ৱা জিৱ্হাৱিঞ্ঞেয্যন্তি ৱা কাযৱিঞ্ঞেয্যন্তি ৱা, অপি চ, মহাৰাজ, মনোৱিঞ্ঞেয্যং নিব্বানং, যং সো সম্মাপটিপন্নো অৰিযসাৱকো ৱিসুদ্ধেন ঞাণেন পস্সতী’’তি. ‘‘ৰমণীযো, ভন্তে নাগসেন, পঞ্হো সুৱিনিচ্ছিতো নিস্সংসযো একন্তগতো, ৱিমতি উপ্পচ্ছিন্না, ত্ৱং গণিৱৰপৱৰমাসজ্জা’’তি.

কম্মজাদিপঞ্হো ছট্ঠো.