২. সব্বঞ্ঞূভাৱপঞ্হো

২. ৰাজা আহ ‘‘ভন্তে নাগসেন, বুদ্ধো সব্বঞ্ঞূ সব্বদস্সাৱী’’তি? ‘‘আম, মহাৰাজ, ভগৱা সব্বঞ্ঞূ সব্বদস্সাৱী’’তি. ‘‘অথ কিস্স নু খো, ভন্তে নাগসেন, সাৱকানং অনুপুব্বেন সিক্খাপদং পঞ্ঞপেসী’’তি? ‘‘অত্থি পন তে মহাৰাজ, কোচি ৱেজ্জো, যো ইমিস্সং পথৱিযং সব্বভেসজ্জানি জানাতী’’তি? ‘‘আম, ভন্তে, অত্থী’’তি. ‘‘কিংনু খো, মহাৰাজ, সো ৱেজ্জো গিলানকং সম্পত্তে কালে ভেসজ্জং পাযেতি, উদাহু অসম্পত্তে কালে’’তি? ‘‘সম্পত্তে কালে, ভন্তে, গিলানকং ভেসজ্জং পাযেতি, নো অসম্পত্তে কালে’’তি? ‘‘এৱমেৱ খো, মহাৰাজ, ভগৱা সব্বঞ্ঞূ সব্বদস্সাৱী ন অসম্পত্তে কালে সাৱকানং সিক্খাপদং পঞ্ঞাপেতি, সম্পত্তে কালে সাৱকানং সিক্খাপদং পঞ্ঞাপেতি যাৱজীৱং অনতিক্কমনীয’’ন্তি.

‘‘কল্লোসি, ভন্তে নাগসেনা’’তি.

সব্বঞ্ঞূভাৱপঞ্হো দুতিযো.