৭. অঞ্ঞকাযসঙ্কমনপঞ্হো

৭. ৰাজা আহ ‘‘ভন্তে নাগসেন, অত্থি কোচি সত্তো যো ইমম্হা কাযা অঞ্ঞং কাযং সঙ্কমতী’’তি? ‘‘ন হি, মহাৰাজা’’তি. ‘‘যদি, ভন্তে নাগসেন, ইমম্হা কাযা অঞ্ঞং কাযং সঙ্কমন্তো নত্থি, ননু মুত্তো ভৱিস্সতি পাপকেহি কম্মেহী’’তি? ‘‘আম, মহাৰাজ, যদি ন পটিসন্দহেয্য, মুত্তো ভৱিস্সতি পাপকেহি কম্মেহীতি, যস্মা চ খো, মহাৰাজ, পটিসন্দহতি, তস্মা ন পৰিমুত্তো পাপকেহি কম্মেহী’’তি.

‘‘ওপম্মং কৰোহী’’তি. ‘‘যথা, মহাৰাজ, কোচিদেৱ পুৰিসো অঞ্ঞতৰস্স পুৰিসস্স অম্বং অৱহৰেয্য, কিং সো দণ্ডপ্পত্তো ভৱেয্যা’’তি? ‘‘আম, ভন্তে, দণ্ডপ্পত্তো ভৱেয্যা’’তি. ‘‘ন খো সো, মহাৰাজ, তানি অম্বানি অৱহৰি, যানি তেন ৰোপিতানি, কস্মা দণ্ডপ্পত্তো ভৱেয্যা’’তি? ‘‘তানি, ভন্তে, অম্বানি নিস্সায জাতানি, তস্মা দণ্ডপ্পত্তো ভৱেয্যা’’তি. ‘‘এৱমেৱ খো, মহাৰাজ, ইমিনা নামৰূপেন কম্মং কৰোতি সোভনং ৱা অসোভনং ৱা, তেন কম্মেন অঞ্ঞং নামৰূপং পটিসন্দহতি, তস্মা ন পৰিমুত্তো পাপকেহি কম্মেহী’’তি.

‘‘কল্লোসি, ভন্তে নাগসেনা’’তি.

অঞ্ঞকাযসঙ্কমনপঞ্হো সত্তমো.