৪. নিব্বানৱগ্গো

১. ফস্সাদিৱিনিব্ভুজনপঞ্হো

১. ৰাজা আহ ‘‘ভন্তে নাগসেন, সক্কা ইমেসং ধম্মানং একতোভাৱগতানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং ‘অযং ফস্সো, অযং ৱেদনা, অযং সঞ্ঞা, অযং চেতনা, ইদং ৱিঞ্ঞাণং, অযং ৱিতক্কো, অযং ৱিচাৰো’তি’’? ‘‘ন সক্কা, মহাৰাজ, ইমেসং ধম্মানং একতোভাৱগতানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং ‘অযং ফস্সো, অযং ৱেদনা, অযং সঞ্ঞা, অযং চেতনা, ইদং ৱিঞ্ঞাণং, অযং ৱিতক্কো, অযং ৱিচাৰো’’’তি.

‘‘ওপম্মং কৰোহী’’তি. ‘‘যথা, মহাৰাজ, ৰঞ্ঞো সূদো অৰসং ৱা ৰসং ৱা [যূসং ৱা ৰসং ৱা (সী. স্যা. পী.)] কৰেয্য, সো তত্থ দধিম্পি পক্খিপেয্য, লোণম্পি পক্খিপেয্য, সিঙ্গিৱেৰম্পি পক্খিপেয্য, জীৰকম্পি পক্খিপেয্য, মৰিচম্পি পক্খিপেয্য, অঞ্ঞানিপি পকাৰানি পক্খিপেয্য, তমেনং ৰাজা এৱং ৱদেয্য, ‘দধিস্স মে ৰসং আহৰ, লোণস্স মে ৰসং আহৰ, সিঙ্গিৱেৰস্স মে ৰসং আহৰ, জীৰকস্স মে ৰসং আহৰ, মৰিচস্স মে ৰসং আহৰ, সব্বেসং মে পক্খিত্তানং ৰসং আহৰা’তি. সক্কা নু খো, মহাৰাজ, তেসং ৰসানং একতোভাৱগতানং ৱিনিব্ভুজিত্ৱা ৱিনিব্ভুজিত্ৱা ৰসং আহৰিতুং অম্বিলত্তং ৱা লৱণত্তং ৱা তিত্তকত্তং ৱা কটুকত্তং ৱা কসাযত্তং ৱা মধুৰত্তং ৱা’’তি? ‘‘ন হি, ভন্তে, সক্কা তেসং ৰসানং একতোভাৱগতানং ৱিনিব্ভুজিত্ৱা ৱিনিব্ভুজিত্ৱা ৰসং আহৰিতুং অম্বিলত্তং ৱা লৱণত্তং ৱা তিত্তকত্তং ৱা কটুকত্তং ৱা কসাযত্তং ৱা মধুৰত্তং ৱা, অপি চ খো পন সকেন সকেন লক্খণেন উপট্ঠহন্তী’’তি. ‘‘এৱমেৱ খো, মহাৰাজ, ন সক্কা ইমেসং ধম্মানং একতোভাৱগতানং ৱিনিব্ভুজিত্ৱা ৱিনিব্ভুজিত্ৱা নানাকৰণং পঞ্ঞাপেতুং ‘অযং ফস্সো, অযং ৱেদনা, অযং সঞ্ঞা, অযং চেতনা, ইদং ৱিঞ্ঞাণং, অযং ৱিতক্কো, অযং ৱিচাৰো’তি, অপি চ খো পন সকেন সকেন লক্খণেন উপট্ঠহন্তী’’তি.

‘‘কল্লোসি, ভন্তে নাগসেনা’’তি.

ফস্সাদিৱিনিব্ভুজনপঞ্হো পঠমো.

২. নাগসেনপঞ্হো

২. থেৰো আহ ‘‘লোণং, মহাৰাজ, চক্খুৱিঞ্ঞেয্য’’ন্তি. ‘‘আম, ভন্তে, চক্খুৱিঞ্ঞেয্য’’ন্তি. ‘‘সুট্ঠু খো, মহাৰাজ, জানাহী’’তি. ‘‘কিং পন, ভন্তে, জিৱ্হাৱিঞ্ঞেয্য’’ন্তি? ‘‘আম, মহাৰাজ, জিৱ্হাৱিঞ্ঞেয্য’’ন্তি. ‘‘কিং পন, ভন্তে, সব্বং লোণং জিৱ্হায ৱিজানাতী’’তি? ‘‘আম, মহাৰাজ, সব্বং লোণং জিৱ্হায ৱিজানাতি’’.

‘‘যদি, ভন্তে, সব্বং লোণং জিৱ্হায ৱিজানাতি, কিস্স পন তং সকটেহি বলীবদ্দা [বলিবদ্দা (সী. পী.)] আহৰন্তি, ননু লোণমেৱ আহৰিতব্ব’’ন্তি? ‘‘ন সক্কা, মহাৰাজ, লোণমেৱ আহৰিতুং একতোভাৱগতা এতে ধম্মা গোচৰনানত্তগতা লোণং গৰুভাৱো চাতি. সক্কা পন, মহাৰাজ, লোণং তুলায তুলযিতু’’ন্তি? ‘‘আম, ভন্তে, সক্কা’’তি. ‘‘ন সক্কা, মহাৰাজ, লোণং তুলায তুলযিতুং, গৰুভাৱো তুলায তুলিযতী’’তি.

‘‘কল্লোসি, ভন্তে নাগসেনা’’তি.

নাগসেনপঞ্হো দুতিযো.

৩. পঞ্চাযতনকম্মনিব্বত্তপঞ্হো

৩. ৰাজা আহ ‘‘ভন্তে নাগসেন, যানিমানি পঞ্চাযতনানি, কিং নু তানি নানাকম্মেহি নিব্বত্তানি, উদাহু একেন কম্মেনা’’তি? ‘‘নানাকম্মেহি, মহাৰাজ, নিব্বত্তানি, ন একেন কম্মেনা’’তি.

‘‘ওপম্মং কৰোহী’’তি. ‘‘তং কিং মঞ্ঞসি, মহাৰাজ, একস্মিং খেত্তে নানাবীজানি ৱপ্পেয্যুং, তেসং নানাবীজানং নানাফলানি নিব্বত্তেয্যু’’ন্তি? ‘‘আম, ভন্তে, নিব্বত্তেয্যু’’ন্তি. ‘‘এৱমেৱ খো, মহাৰাজ, যানি যানি পঞ্চাযতনানি, তানি তানি নানাকম্মেহি নিব্বত্তানি, ন একেন কম্মেনা’’তি.

‘‘কল্লোসি, ভন্তে নাগসেনা’’তি.

পঞ্চাযতনকম্মনিব্বত্তপঞ্হো ততিযো.

৪. কম্মনানাকৰণপঞ্হো

৪. ৰাজা আহ ‘‘ভন্তে নাগসেন, কেন কাৰণেন মনুস্সা ন সব্বে সমকা, অঞ্ঞে অপ্পাযুকা, অঞ্ঞে দীঘাযুকা, অঞ্ঞে বহ্ৱাবাধা অঞ্ঞে অপ্পাবাধা, অঞ্ঞে দুব্বণ্ণা, অঞ্ঞে ৱণ্ণৱন্তো, অঞ্ঞে অপ্পেসক্খা, অঞ্ঞে মহেসক্খা, অঞ্ঞে অপ্পভোগা, অঞ্ঞে মহাভোগা, অঞ্ঞে নীচকুলীনা, অঞ্ঞে মহাকুলীনা, অঞ্ঞে দুপ্পঞ্ঞা, অঞ্ঞে পঞ্ঞৱন্তো’’তি?

থেৰো আহ ‘‘কিস্স পন, মহাৰাজ, ৰুক্খা ন সব্বে সমকা, অঞ্ঞে অম্বিলা, অঞ্ঞে লৱণা, অঞ্ঞে তিত্তকা, অঞ্ঞে কটুকা, অঞ্ঞে কসাৱা, অঞ্ঞে মধুৰা’’তি? ‘‘মঞ্ঞামি, ভন্তে, বীজানং নানাকৰণেনা’’তি. ‘‘এৱমেৱ খো, মহাৰাজ, কম্মানং নানাকৰণেন মনুস্সা ন সব্বে সমকা, অঞ্ঞে অপ্পাযুকা, অঞ্ঞে দীঘাযুকা, অঞ্ঞে বহ্ৱাবাধা, অঞ্ঞে অপ্পাবাধা, অঞ্ঞে দুব্বণ্ণা, অঞ্ঞে ৱণ্ণৱন্তো, অঞ্ঞে অপ্পেসক্খা, অঞ্ঞে মহেসক্খা, অঞ্ঞে অপ্পভোগা, অঞ্ঞে মহাভোগা, অঞ্ঞে নীচকুলীনা, অঞ্ঞে মহাকুলীনা, অঞ্ঞে দুপ্পঞ্ঞা, অঞ্ঞে পঞ্ঞৱন্তো. ভাসিতম্পেতং মহাৰাজ ভগৱতা – ‘কম্মস্সকা, মাণৱ, সত্তা কম্মদাযাদা কম্মযোনী কম্মবন্ধূ কম্মপ্পটিসৰণা, কম্মং সত্তে ৱিভজতি যদিদং হীনপ্পণীততাযা’’’তি.

‘‘কল্লোসি, ভন্তে নাগসেনা’’তি.

কম্মনানাকৰণপঞ্হো চতুত্থো.

৫. ৱাযামকৰণপঞ্হো

৫. ৰাজা আহ ‘‘ভন্তে নাগসেন, তুম্হে ভণথ ‘কিন্তি ইমং দুক্খং নিৰুজ্ঝেয্য, অঞ্ঞঞ্চ দুক্খং নুপ্পজ্জেয্যা’তি. এতদত্থা, মহাৰাজ, অম্হাকং পব্বজ্জা’’তি. ‘‘কিং পটিকচ্চেৱ ৱাযমিতেন, ননু সম্পত্তে কালে ৱাযমিতব্ব’’ন্তি? থেৰো আহ ‘‘সম্পত্তে কালে, মহাৰাজ, ৱাযামো অকিচ্চকৰো ভৱতি, পটিকচ্চেৱ ৱাযামো কিচ্চকৰো ভৱতী’’তি.

‘‘ওপম্মং কৰোহী’’তি. ‘‘তং কিং মঞ্ঞসি, মহাৰাজ, যদা ত্ৱং পিপাসিতো ভৱেয্যাসি, তদা ত্ৱং উদপানং খণাপেয্যাসি, তড়াকং খণাপেয্যাসি ‘পানীযং পিৱিস্সামী’তি? ‘‘ন হি, ভন্তে’’তি. ‘‘এৱমেৱ খো, মহাৰাজ, সম্পত্তে কালে ৱাযামো অকিচ্চকৰো ভৱতি, পটিকচ্চেৱ ৱাযামো কিচ্চকৰো ভৱতী’’তি.

‘‘ভিয্যো ওপম্মং কৰোহী’’তি. ‘‘তং কিং মঞ্ঞসি, মহাৰাজ, যদা ত্ৱং বুভুক্খিতো ভৱেয্যাসি, তদা ত্ৱং খেত্তং কসাপেয্যাসি, সালিং ৰোপাপেয্যাসি, ধঞ্ঞং অতিহৰাপেয্যাসি ‘ভত্তং ভুঞ্জিস্সামী’তি? ‘‘ন হি, ভন্তে’’তি. ‘‘এৱমেৱ খো, মহাৰাজ, সম্পত্তে কালে ৱাযামো অকিচ্চকৰো ভৱতি, পটিকচ্চেৱ ৱাযামো কিচ্চকৰো ভৱতীতি.

‘‘ভিয্যো ওপম্মং কৰোহী’’তি. ‘‘তং কিং মঞ্ঞসি, মহাৰাজ, যদা তে সঙ্গামো পচ্চুপট্ঠিতো ভৱেয্য, তদা ত্ৱং পৰিখং খণাপেয্যাসি, পাকাৰং কাৰাপেয্যাসি, গোপুৰং কাৰাপেয্যাসি, অট্টালকং কাৰাপেয্যাসি, ধঞ্ঞং অতিহৰাপেয্যাসি, তদা ত্ৱং হত্থিস্মিং সিক্খেয্যাসি, অস্সস্মিং সিক্খেয্যাসি, ৰথস্মিং সিক্খেয্যাসি, ধনুস্মিং সিক্খেয্যাসি, থৰুস্মিং সিক্খেয্যাসী’’তি? ‘‘ন হি, ভন্তে’’তি. ‘‘এৱমেৱ খো, মহাৰাজ, সম্পত্তে কালে ৱাযামো অকিচ্চকৰো ভৱতি, পটিকচ্চেৱ ৱাযামো কিচ্চকৰো ভৱতি. ভাসিতম্পেতং মহাৰাজ ভগৱতা –

‘‘‘পটিকচ্চেৱ তং কযিৰা, যং জঞ্ঞা হিতমত্তনো;

ন সাকটিকচিন্তায, মন্তা ধীৰো পৰক্কমে.

‘‘‘যথা সাকটিকো মট্ঠং [নাম (সী. পী. ক.) সং. নি. ১.১০৩], সমং হিত্ৱা মহাপথং;

ৱিসমং মগ্গমাৰুয্হ, অক্খচ্ছিন্নোৱ ঝাযতি.

‘‘‘এৱং ধম্মা অপক্কম্ম, অধম্মমনুৱত্তিয;

মন্দো মচ্চু মুখং পত্তো, অক্খচ্ছিন্নোৱ ঝাযতী’’’তি [সোচতীতি (সব্বত্থ)].

‘‘কল্লোসি, ভন্তে নাগসেনা’’তি.

ৱাযামকৰণপঞ্হো পঞ্চমো.

৬. নেৰযিকগ্গিউণ্হভাৱপঞ্হো

৬. ৰাজা আহ ‘‘ভন্তে নাগসেন, তুম্হে ভণথ ‘পাকতিকঅগ্গিতো নেৰযিকো অগ্গি মহাভিতাপতৰো হোতি, খুদ্দকোপি পাসাণো পাকতিকে অগ্গিম্হি পক্খিত্তো দিৱসম্পি পচ্চমানো [ধমমানো (সী. পী.)] ন ৱিলযং গচ্ছতি, কূটাগাৰমত্তোপি পাসাণো নেৰযিকগ্গিম্হি পক্খিত্তো খণেন ৱিলযং গচ্ছতী’তি, এতং ৱচনং ন সদ্দহামি, এৱঞ্চ পন ৱদেথ ‘যে চ তত্থ উপ্পন্না সত্তা, তে অনেকানিপি ৱস্সসহস্সানি নিৰযে পচ্চমানা ন ৱিলযং গচ্ছন্তী’তি, তম্পি ৱচনং ন সদ্দহামী’’তি.

থেৰো আহ ‘‘তং কিং মঞ্ঞসি, মহাৰাজ, যা তা সন্তি মকৰিনিযোপি সুসুমাৰিনিযোপি কচ্ছপিনিযোপি মোৰিনিযোপি কপোতিনিযোপি, কিংনু তা কক্খড়ানি পাসাণানি সক্খৰাযো চ খাদন্তী’’তি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তৰগতানি ৱিলযং গচ্ছন্তী’’তি? ‘‘আম, ভন্তে, ৱিলযং গচ্ছন্তী’’তি. ‘‘যো পন তাসং কুচ্ছিযং গব্ভো, সোপি ৱিলযং গচ্ছতী’’তি? ‘‘ন হি ভন্তে’’তি. ‘‘কেন কাৰণেনা’’তি? ‘‘মঞ্ঞামি, ভন্তে, কম্মাধিকতেন ন ৱিলযং গচ্ছতী’’তি. ‘‘এৱমেৱ খো, মহাৰাজ, কম্মাধিকতেন নেৰযিকা সত্তা অনেকানিপি ৱস্সসহস্সানি নিৰযে পচ্চমানা ন ৱিলযং গচ্ছন্তি. ভাসিতম্পেতং, মহাৰাজ, ভগৱতা – ‘সো ন তাৱ কালং কৰোতি, যাৱ ন তং পাপকম্মং ব্যন্তীহোতী’’’তি.

‘‘ভিয্যো ওপম্মং কৰোহী’’তি. ‘‘তং কিং মঞ্ঞসি, মহাৰাজ, যা তা সন্তি সীহিনিযোপি ব্যগ্ঘিনিযোপি দীপিনিযোপি কুক্কুৰিনিযোপি, কিংনু তা কক্খড়ানি অট্ঠিকানি মংসানি খাদন্তীতি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তৰগতানি ৱিলযং গচ্ছন্তী’’তি? ‘‘আম, ভন্তে, ৱিলযং গচ্ছন্তী’’তি. ‘‘যো পন তাসং কুচ্ছিযং গব্ভো, সোপি ৱিলযং গচ্ছতী’’তি? ‘‘ন হি ভন্তে’’তি. ‘‘কেন কাৰণেনা’’তি? ‘‘মঞ্ঞামি, ভন্তে, কম্মাধিকতেন ন ৱিলযং গচ্ছতী’’তি. ‘‘এৱমেৱ খো, মহাৰাজ, কম্মাধিকতেন নেৰযিকা সত্তা অনেকানিপি ৱস্সসহস্সানি নিৰযে পচ্চমানা ন ৱিলযং গচ্ছন্তী’’তি.

‘‘ভিয্যো ওপম্মং কৰোহী’’তি. ‘‘তং কিং মঞ্ঞসি, মহাৰাজ, যা তা সন্তি যোনকসুখুমালিনিযোপি খত্তিযসুখুমালিনিযোপি ব্ৰাহ্মণসুখুমালিনিযোপি গহপতিসুখুমালিনিযোপি, কিংনু তা কক্খড়ানি খজ্জকানি মংসানি খাদন্তী’’তি? ‘‘আম, ভন্তে, খাদন্তী’’তি. ‘‘কিং পন তানি তাসং কুচ্ছিযং কোট্ঠব্ভন্তৰগতানি ৱিলযং গচ্ছন্তী’’তি? ‘‘আম, ভন্তে, ৱিলযং গচ্ছন্তী’’তি. ‘‘যো পন তাসং কুচ্ছিযং গব্ভো সোপি ৱিলযং গচ্ছতী’’তি? ‘‘ন হি ভন্তে’’তি. ‘‘কেন কাৰণেনা’’তি. ‘‘মঞ্ঞামি, ভন্তে, কম্মাধিকতেন ন ৱিলযং গচ্ছতী’’তি. ‘‘এৱমেৱ খো, মহাৰাজ, কম্মাধিকতেন নেৰযিকা সত্তা অনেকানিপি ৱস্সসহস্সানি নিৰযে পচ্চমানা ন ৱিলযং গচ্ছন্তি. ভাসিতম্পেতং, মহাৰাজ, ভগৱতা – ‘‘সো ন তাৱ কালং কৰোতি, যাৱ ন তং পাপকম্মং ব্যন্তীহোতী’’তি.

‘‘কল্লোসি, ভন্তে নাগসেনা’’তি.

নেৰযিকগ্গিউণ্হভাৱপঞ্হো ছট্ঠো.

৭. পথৱিসন্ধাৰকপঞ্হো

৭. ৰাজা আহ ‘‘ভন্তে নাগসেন, তুম্হে ভণথ ‘অযং মহা পথৱী উদকে পতিট্ঠিতা, উদকং ৱাতে পতিট্ঠিতং, ৱাতো আকাসে পতিট্ঠিতো’তি, এতম্পি ৱচনং ন সদ্দহামী’’তি. থেৰো ধম্মকৰকেন [ধম্মকৰণেন (ক.)] উদকং গহেত্ৱা ৰাজানং মিলিন্দং সঞ্ঞাপেসি ‘‘যথা, মহাৰাজ, ইমং উদকং ৱাতেন আধাৰিতং, এৱং তম্পি উদকং ৱাতেন আধাৰিত’’ন্তি.

‘‘কল্লোসি, ভন্তে নাগসেনা’’তি.

পথৱিসন্ধাৰকপঞ্হো সত্তমো.

৮. নিৰোধনিব্বানপঞ্হো

৮. ৰাজা আহ ‘‘ভন্তে নাগসেন, নিৰোধো নিব্বান’’ন্তি? ‘‘আম, মহাৰাজ, নিৰোধো নিব্বান’’ন্তি. ‘‘কথং, ভন্তে, নাগসেন, নিৰোধো নিব্বান’’ন্তি? ‘‘সব্বে বালপুথুজ্জনা খো, মহাৰাজ, অজ্ঝত্তিকবাহিৰে আযতনে অভিনন্দন্তি অভিৱদন্তি অজ্ঝোসায তিট্ঠন্তি, তে তেন সোতেন ৱুয্হন্তি, ন পৰিমুচ্চন্তি জাতিযা জৰায মৰণেন সোকেন পৰিদেৱেন দুক্খেহি দোমনস্সেহি উপাযাসেহি ন পৰিমুচ্চন্তি দুক্খস্মাতি ৱদামি. সুতৱা চ খো, মহাৰাজ, অৰিযসাৱকো অজ্ঝত্তিকবাহিৰে আযতনে নাভিনন্দতি নাভিৱদতি নাজ্ঝোসায তিট্ঠতি, তস্স তং অনভিনন্দতো অনভিৱদতো অনজ্ঝোসায তিট্ঠতো তণ্হা নিৰুজ্ঝতি, তণ্হানিৰোধা উপাদাননিৰোধো, উপাদাননিৰোধা ভৱনিৰোধো, ভৱনিৰোধা জাতিনিৰোধো, জাতিনিৰোধা জৰামৰণং সোকপৰিদেৱদুক্খদোমনস্সুপাযাসা নিৰুজ্ঝন্তি, এৱমেতস্স কেৱলস্স দুক্খক্খন্ধস্স নিৰোধো হোতি, এৱং খো, মহাৰাজ, নিৰোধো নিব্বান’’ন্তি.

‘‘কল্লোসি, ভন্তে নাগসেনা’’তি.

নিৰোধনিব্বানপঞ্হো অট্ঠমো.

৯. নিব্বানলভনপঞ্হো

৯. ৰাজা আহ ‘‘ভন্তে নাগসেন, সব্বেৱ লভন্তি নিব্বান’’ন্তি? ‘‘ন খো, মহাৰাজ, সব্বেৱ লভন্তি নিব্বানং, অপি চ খো, মহাৰাজ, যো সম্মা পটিপন্নো অভিঞ্ঞেয্যে ধম্মে অভিজানাতি, পৰিঞ্ঞেয্যে ধম্মে পৰিজানাতি, পহাতব্বে ধম্মে পজহতি, ভাৱেতব্বে ধম্মে ভাৱেতি, সচ্ছিকাতব্বে ধম্মে সচ্ছিকৰোতি, সো লভতি নিব্বান’’ন্তি.

‘‘কল্লোসি, ভন্তে নাগসেনা’’তি.

নিব্বানলভনপঞ্হো নৱমো.

১০. নিব্বানসুখজাননপঞ্হো

১০. ৰাজা আহ ‘‘ভন্তে নাগসেন, যো ন লভতি নিব্বানং, জানাতি সো ‘সুখং নিব্বান’’’ন্তি? ‘‘আম, মহাৰাজ, যো ন লভতি নিব্বানং, জানাতি সো ‘সুখং নিব্বান’’’ন্তি. ‘‘কথং, ভন্তে নাগসেন, অলভন্তো জানাতি ‘সুখং নিব্বান’’’ন্তি? ‘‘তং কিং মঞ্ঞসি, মহাৰাজ, যেসং নচ্ছিন্না হত্থপাদা, জানেয্যুং তে, মহাৰাজ, ‘দুক্খং হত্থপাদচ্ছেদন’’’ন্তি? ‘‘আম, ভন্তে, জানেয্যু’’ন্তি. ‘‘কথং জানেয্যু’’ন্তি? ‘‘অঞ্ঞেসং, ভন্তে, ছিন্নহত্থপাদানং পৰিদেৱিতসদ্দং সুত্ৱা জানন্তি ‘দুক্খং হত্থপাদচ্ছেদন’’’ন্তি. ‘‘এৱমেৱ খো, মহাৰাজ, যেসং দিট্ঠং নিব্বানং, তেসং সদ্দং সুত্ৱা জানাতি ‘সুখং নিব্বান’’’ন্তি.

‘‘কল্লোসি, ভন্তে নাগসেনা’’তি.

নিব্বানসুখজাননপঞ্হো দসমো.

নিব্বানৱগ্গো চতুত্থো.

ইমস্মিং ৱগ্গে দস পঞ্হা.